28
(Xng 26:3-13, Tid 7:12-24)
1 ?Nanu" Aseing Mangsoo ri tam" gyo: wigi akhid" nyid" ngo wigi nanu" ri byid: da" nya: amyeing" joem ri jhug zug tung" cang nyid nghoid rigi nyang: gi nanu" ri mougmyid tho' mo gootu: byumyu" ja: khang" moo" tho' je gyi: sheung: nhang: wa.
2 Nanu" Aseing Mangsoo ri tam" gyo: cang yhe: nyid ge'. Houg: lang" he: mainkaid jeju" dangain" gi nanu" shid re" nghoid ri" wa.
3 ?Aseing gi nanu" voogung joem yo' nanu" yoothung" yoolang: joem ri mainkaid byid: wa zi nghoid.
4 ?Aseing gi nanu" ri zooshang: yi myoo" sho' gug zoo athang agoin- nu: yo' yang myoo" sho' mainkaid byid: wa zi nghoid.
5 Aseing gi nanu" da" gug shi" mei: shi" yo' nanu" soin' to" da" zoo: noem joem moo mainkaid byid: wa zi nghoid.
6 ?Aseing gi nanu" koid da" ja: khang" moo" ri mainkaid byid: wa zi nghoid.
7 ?Nanu" gyivoo yi nanu" ri khaid zain: lo uri nyangnu" ri Aseing wigi oung: pyam byid: wa. Nyangnu" gi dashoid khyo" za: re" khaid zain: nghoid loug we' nyangnu" gi nanu" jang mo shoid khang" moo" khyo" phang: thu loo" goo" wa zi nghoid.
8 ?Nanu" Aseing Mangsoo gi nanu" moo" zoo" moo mainkaid byid: wigi nanu" da" jhi: joem moo shivoo: yo' byeung" nhang: wa. Nyang: gi nanu" ri nyang: byid: wa mung" moo mainkaid byid: wa zi nghoid.
9 ?Nanu" gi nanu" Aseing Mangsoo ri tam" gyo: wigi nyang: amyeing" dang: ja: khang" moo" ri koid nghoid rigi nyang: dangsoo" byid: to" bye: ziyo' dakhyoo" ti" nanu" ri nya: byumyu" bui" nhang: wa.
10 Houg: lang" mougmyid tho' mo byumyu" dangain" gi nanu" ri Aseing wigi nya: byumyu" bui" wa shid re" khyen: yu ziri zang" myang boem lho: nanu" ri nyangnu" gyoug re" boem goo" wa.
11 Aseing gi nanu" ri byid: wa ga: nanu" phoug" phyid" yiri dangsoo" byid: to" da" mung" moo: zoo: yi myoo" sho' nu: myoo" sho' yo' gug shi" mei: shi" athang agoin mainkaid byid: wa zi nghoid.
12 Nyang: gi ayo, yo' ayo, moo mougkhung: mo jonu" byeung" da" nya: jhi: mo moug: vo khyo' kaid nhang: wigi nanu" moo" zoo" dangain" ziri mainkaid byid: loo wa. Houg: lang" nanu" gi byumyu" myoo" sho' ri yo" jhid" byid: goo" wa. Nghoid loug we' nanu" gi hang" jang mo we' ajhid" yu ca" wa.
13 Nanu" Aseing Mangsoo gi nanu" ri byumyu" yi da" agung moo vhujhung: yi bui" nhang: wa. Thang: cang bang: abui" nhang: wa. Nanu" gi akhid" nyid" ngoo nanu" ri byid: nyid da" nya: amyeing" dang: dangain" ri jhug zug tung" tam" gyo: cang yhe: nghoid rigi khanham nghoid loug nyid pyoo: yab pyo: wigi khanham we' ajoem: loo" wa.
14 Nghoid loug we' nanu" gi hau: joem ri khakhyo" nghoid nghoid atam" gyoo: age koid wa anghoid lang" gootu: yu phara" joem ri age no'- age dei byid: wa.
(Xng 26:14-46)
15 ?Nghoid loug we' nanu" gi nanu" Aseing Mangsoo ri atam" gyo: wigi akhid" nyid" ngoo nanu" ri byid: nyid da" nya: amyeing" joem yo' tarha" joem dangain" ri jhug zug tung" acang nghoid rigi nanu" moo he: akhyeing" ashoeb zi dangain" bui" lo wa zi nghoid.
16 ?Aseing gi nanu" voogung joem yo' yoothung" joem ri nheing" khoin" kaid wa nghoid.
17 ?Aseing gi nanu" da" gugshi" meishi" yo' nanu" soin' to" da" zoo: noem joem moo: nheing" khoin" kaid byid: wa zi nghoid.
18 ?Aseing gi nanu" da" zoo yi myid: yi moo: we' shivoo: moo: we' nu: yo' yang moo: we' dajhi' za: byid: khyo" wigi nheing khoin" kaid byid: wa zi nghoid.
19 ?Aseing gi nanu" koid da" ja: khang moo" nheing" khoin" kaid byid: wa zi nghoid.
20 ?Nanu" gi akhyeing" ashoeb zi koid wigi Aseing ri ngeug he: pyam nghoid rigi nyang: gi nanu" adang moo byo, yoin" lo" zi nhung khoid ziyo' nanu" koid moo" ja: khang" moo" ri yau: khi" nhang: wa zigi nanu" bain sho' myab myab doem: lo" da" ayo, ju" sho' nghoid wa.
21 Nyang: gi nanu" yhe: seing: yu loo wa zi za: danghoid lo: da" mung" moo nanu" mo dayug we' adeing loo: sho' nanu" adang moo noophyoo" daja: thang: daja: nhang: kaid byid: loo wa.
22 Aseing gi nanu" ri dab lo ja: noo joem yo' gung yam: lo ziyo' nooyoem" yo' shen" yhen wa nghoid. Nyang: gi nanu" da" shivoo: joem ri phyo' shoin' pyam wa shid re" moug: kyug myid kyug ziyo' lid lung ri nhang: kaid byid: wa nghoid. He: byo, yoin" lo" zigi nanu" shid: sho' nanu" yo' dage" jo, jo, wa zi nghoid.
23 Moug: dacab we' avoo wa. Houg: lho: nanu" da" myidjang gi joto' yhang: ti" thain: wa nghoid.
24 Moug: voo wa gungthid Aseing gi nanu" shid: doem: sho' pheilhoug: uglid yo' midcoo: uglid nhang: khyo' kaid byid: wa zi nghoid.
25 ?Aseing gi nanu" da" gyivoo joem wigi nanu" adang moo oung: pyam nhang: wa zi nghoid. Nanu" gi nyangnu" ri dashoid khyo" khaid zain: nghoid loug we' nanu" gi nyangnu" jang mo shoid khang" moo" khyo: phang: loo" ca" goo" wa. Houg: lho: mougmyid dang mo byumyu" dangain" gi nanu" moo bue" ziri shau" myang wigi gyoug dain loo goo" wa.
26 Nanu" shid: lang" ngho' joem yo' siyoo gougnyhoug joem re" wigi nanu" manggung ri zo: pyam wa nghoid. Houg: lho: houg: moo hau: joem ri khaid pyam byid: wa hang" dayug we' anyid wa.
27 Aseing gi Egutu byumyu" yi adang moo koid ziyo' dakhyo" nanu" adang moo byeing joem ri nhang: kaid byid: wa. Nyang: gi nanu" gung moo byeing myug boeb thu nhang: wa. Nanu" gung dagung goin" i" myug wigi yoo: goo" wa. Nghoid loug we' yo" byang" gi wa zi anghoid.
28 Aseing gi nanu" ri koo" nhang: wa zi nghoid. Nyang: gi nanu" ri myojid" jed nhang: wigi anhung akhoid bue" khyo" wigi shen" wa zi nghoid.
29 Nanu" gi nyid" gung bid jang moo myojid" jed su: yhang: ti" soeb yab yen" wa. Houg: lho: nanu" nya: khyoo: ri ayo" sho: yu wa. Nanu" koid da" moo" kha: ja: we' aoung: myug boem goo" wa. Nanu" ri doin: zeig zo: ziyo' lhoid zo: yu zi shau" boem wa wigi nanu" ri pang" yu wa dayug we' anyid wa.
30 ?Nanu" myiyi: dayug ri mho' too" nghoid loug we' subi" gooyug wigi nyang: ri lo, xo' pyam byid: wa. Nanu" yhoem: koid to" nghoid loug we' nanu" houg: moo khanham we' ashau" lung" goo" wa. Nanu" zabyid khyam: zhung" too" nghoid loug we' houg: mo zabyid shi" khanham we' ashau" phyo' zoo: wa.
31 Nanu" nu: joem ri nanu" shidkhoin" moo said nghoid loug we' nanu" gi hau: shoo" ri dajhi' we' ashau" zoo: wa. Nanu" yu" nyid uri nanu" loo zei: joem ri she: lo" boem wigi nanu" ri hau joem adoem tau" byid: wa. Nanu" yang joem ri nanu" gyivoo joem ri byid: pyam wigi nanu" ri pang" thoug wa dayug we' anyid wa.
32 Nanu" yu" nyid uri nanu" yuggi zoo: yi myiyi: zoo: yi join khyo" tungbau byumyu" yiri byid: pyam zi shoug" wa. Nanu" gi nyid" khang" moo" nanu" zooshang: yi doem tau" loo wa ziri myojid" myung: sho' zhug yu" nyid wa.
33 Tungbau byu damyu" gi nanu" gye" yoem: kaid wigi sho" to" da" gugshi" meishi" dangain" ziri yu pyam byid: wa. Nanu" nyang: gi ci: ashau" yu wa. Nghoid loug we' ayo, byeung" sho' moo doin: zeig ziyo' anoug akhyoid koid zi shau" boem wa.
34 Nanu" da" yau: khi" gi nanu" ri koo" nhang: loo wa.
35 Aseing gi nanu" khyid: joem moo atho' ge da" khe" da" dam joid noo nhang: wa. Nanu" da" vhuloem mo zi khyid: voo: ju" sho' byeing myug nhang: wa.
36 Aseing gi nanu" yo' nanu" khokham ri nanu" yo' nanu" phoug" phyid" yi anyid yu" shi" da" tungbau meing: khyoo: shu" loo" wa. Hau: meing: moo nanu" gi seig yo' lug boem wigi koid to" da" yu phara" joem ri dei byid: loo goo" wa.
37 Aseing wigi nanu" ri khaid sain" nyhid: to" da" meing: joem moo nyid da" byumyu" yigi nanu" moo bue" lo khyoo: ri yu" dain goo" wa. Nyangnu" gi nanu" ri yi noug tu' pyam wigi juang" pyam boem wa.
38 ?Nanu" gi myoug: shi" myoo" sho' shoo" nghoid loug we' dajhi' za: shau" yham" yu wa. Ciwim gari nanu" shivoo: gam joem ri jhenkhyeug joem wigi zo: pyam byid: loo wa.
39 Nanu" zabyid khyam: koid wigi hau: ziri yu" coung: nghoid loug we' hau: joem ri shoug" zheing" yu wa zi anghoid. Hau: joem mo zabyid yhid: shoug" shug wa zi anghoid. Ciwim gari zabyid gam ri tungdi: wigi zo: pyam wa zi nghoid.
40 Nanu" mung" khyi khang" moo" moo zhainloin: gam yug nghoid loug we' nanu" gi zhainloin: xu: dajhi' we' ayoo" wa. Ciwim gari zhainloin: shi" joem shu: gyo" pyam wa.
41 Nanu" gi yuggi zoo: yi yo' myiyi: zoo: yi yoo" nghoid loug we' nanu" gi nyangnu" ri ci: phyug pyam wa nghoid. Ciwim gari nyangnu" ri meing: zain: jang: mo thung: byu khyo" myheig lo" boem wa.
42 Nanu" seiggam joem yo' gugshi" meishi" dangain" gi tungdi: joem wigi zo: pyam wa.
43 ?Nanu" mung" moo nyid da" tungbau byu yigi je je yoem: so' gyi: loo wa. Nanu" gi zo" zo" yoem: so' neing: loo" wa.
44 Nyangnu" gi nanu" ri jhid" byid: wa ngei yo" loo goo" wa. Nghoid loug we' nanu" gi nyangnu" ri jhid" byid: wa da" ngei ayoo" wa. Lo" thang moo nyangnu" gi nanu" ri vhoeb khang" bang: bue" loo wa.
45 ?He: byo, yoin" zi dangain" gi nanu" adang moo ju" wigi nanu" bain joem: loo" sho' nanu" yo' dage" dajo, jo, wa. Ciwim gari nanu" gi nanu" Aseing Mangsoo ri atam" gyo: ziyo' nyang: byid: da" tarha" joem dangain" ri acang yoomo nghoid.
46 Hau: joem gi nanu" yo' nanu" amyed ashen yi adang moo apyaid atoo: moo tarha" dang: phyed da" asoo" bue" jo, wa.
47 Aseing gi nanu" ri khyoo: ja: khang" moo" moo mainkaid byid: loo bye:. Nghoid loug we' nanu" gi ngei bu nheigloem: yo' nyang: ri adei byid: nghoid da:.
48 Hougsu" yoomo nanu" gi nanu" ri thougtheung wa shid re" Aseing wigi nhang: kaid wa gyivoo yiri yhe: dei byid: ca" wa zi nghoid. Nanu" gi voem yoid gyid shid ziyo' shoo" cen: doem: nyid wa zi nghoid. Ja: khang" moo" ca" goo" wa. Aseing gi nanu" ri nanu" joem: loo" sho' anoug akhyoid yhen' wa zi nghoid.
49 Aseing gi nanu" ri thougtheung wa shid re" nanu" ase' gyo: da" myeing" ji da" byumyu" damyu" ri mougmyid athang: mo shu" loo byid: wa zi nghoid. Nyangnu" gi zoin bung: yo' dakhyoo" ti" nanu" atho' moo re" dang: thei" wa zi nghoid.
50 Nyangnu" gi gye" khyi" khyoid wigi ngi bang: gyi: bang: yugkhang" moo" ri nheig khyeug myid aci: shug wa.
51 Nyangnu" gi nanu" da" yhoem: gougnyhoug joem yo' gug shi" mei: shi" joem ri zo: pyam wigi nanu" gi zooyoid shid: goo" wa. Nyangnu" gi nanu" shid re" shivoo:- zabyid yhid:- zhainloin: xu:- nu: yo' yang ce: daja: we' ateing too" byid: wigi nanu" shid: shoug" wa nghoid.
52 Nyangnu" gi nanu" Aseing Mangsoo wigi nanu" ri byid: wa mung" mo voogung loem: khang" moo" ri khaid zain: wigi nanu" myid loem to" da" gye" myhang: da" vang khyam: byo, gyo" lo" byug wa.
53 ?Nanu" gyivoo joem wigi nanu" da" voogung joem ri re" lheing khoem to" uri nanu" gi zooshug sung myung yoomo Aseing wigi nanu" ri byid: to" da" zooshang: yiri lang" zo: pyam goo" wa.
54-55 Byu zeing kung: mo nu" nham' thang yug lang" gyivoo joem lheing khoem to" da" ayo, khoug: moo zoo: shug gootu: ayoo" yoomo nyang: nya: zooshang: dayham" ri zo: pyam loo goo" wa. Nyang: gi nya: mang: nhung" yiri anghoid lang" nyang: jheddab da" yhoem: seing: myhi' ri anghoid lang" deing shi" da" nya: zoo: yiri lang" dajhi' we' abyid: zhoo" loo koid ri" wa zi nghoid.
56-57 Byu zeing kung: mo nu" nham' thang da" myiyi: nyang: gi khakhyoo: yhi: nghoid loug we' khyid: khyo" khanham we' aso" yu" yug lang" houg: yo' dakhyo" koid loo wa. Gyivoo joem wigi nya: voogung ri lheing khoem to" da" uri nyang: gi zoo: shug sung myung yoomo nyang: aseig khu: da" zoonu" yo' zooshang: nyid cang" joem ri shoung: wigi zo: pyam wa zi nghoid. Nyang: gi nyang: jheddab da" nya: yhoem: seing: phoo ri we' nya: zoo: yiri we' agam zhoo" loo: koid loo wa.
58 ?Nanu" gi he: mougsoug" pug moo lhid" to" da" Mangso da" jhau" shid dang: joem dangain" ri jhug zug tung" atam" gyoo: lho: nanu" Aseing Mangso da" mau" pho" ziyo' gyoug pho" da" myeing khyang" ri ngi: ashab byid: goo" nghoid rigi
59 Nyang: gi nanu" yo' nanu" da" amyed ashen yi adang moo ayo" byang" ge da" noophyoo" yo' khanham we' ayo" toem' pyam da" gyoug pho" yoem" ri nhang: kaid byid: loo wa.
60 Nyang: gi nanu" Egutu moo bue" lid lo yu" bye: da" gyoug dain pho" noophyoo" joem ri doem bui" nhang: loo wa. Houg: lho: nanu" gi khanham we' ayo" ge ri" loo: wa.
61 He: Mangso da" tarha" yo' jhau" shid dang: joem lhid" to" da" mougsoug" moo abo da" noophyoo" yo' gyoug pho" yoem" dangain" ziri nhang: kaid byid: loo wa. Houg: lho: nanu" gi joem: lo" zi shoug" wa.
62 Nanu" gi mougkhung: mo kyi: su" myo: lug ri" wa nghoid loug we' nanu" mo dajhi' za: ashid: loo: nyid deing boem wa. Ciwim gari nanu" gi nanu" da" Aseing Mangsoo ri atam" gyoo: yoomo nghoid.
63 Aseing gi nanu" ri nyid gi yab gi nhang: wigi myo: lug je: be: ri" nhang: da" uri ngei pyo: gau yi ziyo' dakhyoo" ti" nyang: nanu" ri joem: loo" nhang: wigi nanu" byo, yoin" joem: lo" uri we' ngei pyo: gau yi loo wa. Nanu" yhe: seing: yu wa za: danghoid lo: da" mung" mo we' phoin' pyam zi shoug" wa.
64 ?Aseing gi moug: gyab dashoid mo dashoid athang: ju" sho' moo nyid da" byumyu" phung: khyoo: nanu" ri khaid sain" pyam wa. Houg: lho: nanu" gi hau: joyoo moo nanu" yo' nanu" phoug" phyid" yi shid phyang" anoku yu" da" seig yo' lugzeing yo' koid da" yu phara" joem ri dei byid: re" boem wa.
65 Nanu" gi yug yoo zi khamoo: we' ashau" wa. Nanu" nya: mougmyid ein: myheing wa joyoo ashau" myang wa. Aseing gi nanu" adang moo myid myo: zi nheigloem: thang ziyo' yoem: shoin: zi byeung" jo, nhang: loo wa.
66 Nanu" apyaid gi khanham we' gyoug ca" ziyo' nyid ca" wa. Nanu" gi nyid" ri we' myen" ri we' gyoug dain ziyo' byeung" nyid wa. Houg: lho: nanu" gi ayo, byeung" sho' moo shid: wa ziri gyoug nyid ca" loo wa.
67 Nanu" myang da" ja: khang" moo" moo gyoug wigi nanu" seing" gug thung" wa. Moug: boo" khang" moo" myen" thang: ju" noug goo" wa. Myen" thang: khang" moo" moug: boo" ju" noug goo" wa.
68 Aseing gi nanu" ri Egutu khyoo: khanham we' adoem yhi: ca" lo: wa ga: tid too" nghoid loug we' nanu" ri gyid sangphoo khyo" Egutu khyoo: doem tau" de" pyam loo wa. Houg: moo nanu" gi nyang: nya: gung ri gyivoo yi jhang join khyo" oung" zoo: wa yoem: kaid nghoid loug we' nanu" ri hang" we' anau qei yu goo" wa.