1 Houg: yoomo nanu" ri nheigkoug nhang: zi abui" baja"- nanu" jhang khyoo: ngoo adoem ri" loo: wa ein: myid phyed pyam bye:. 2 Khasu" wim gari ngoo nanu" ri nheig ze" kung' nhang: nghoid ri gi ngoo ri gau yi nhang" wa zi hang" se' nyid loo: wa ngoo nheig ze" kug byid: mo, za: deung nyid wa zi nghoid. 3 Ngoo ri gau yi ngeipyoo: nhang: wa da" byu yi yoomo ngoo myid apyo: khyoo: abui" loo baja" ngoo nanu" jhang, khyoo: anau ri loo. Houg: yoomo xangshid" lheung: mo mougsoug" ri nanu" jhang: khyoo: ngoo lhid" kaid zi nghoid. Ce: noem wim ga: ri ngoo gau yi ngei pyo: ri nanu" dangain" mo, we' gau yi ngeipyoo: wa ziri ngoo myid loem. 4 Ngoo gi shidgyoin noogyoin- nheigkoug nheigshu: zi gye" shau" wigi- ngoug byid: myoo" sho' thu' zoore hau: mougsoug" ri lhid" kaid zi nghoid. Ngoo myid soin" khyoo: gi nanu"' ri nheung kug nhang: wa shid re" anghoid. Nanu" ri ngoo khayhi' jheddab nyid ziri si' nhang: noug yoomo lhid" kaid zi nghoid.

5 Akhid" byu dayug yug gi ngoo ri nheigkoug, nhang: nghoid rigi ngoo ri za: anghoid- nanu" dangain" mo, ri nghoid loug we' dayham: ri nheigkoug nhang: nyid.( Hau: yug da" atho' moo yooboo zeing ri afoin: noug yoomo ngoo he: khyoo: ri tid nyid zi nghoid) 6 Nanu:" myoo: loo boug wigi yooboo foin: gyi koid zi shau: khyoo: gi hau: yug shid re" moin: yi" da" shidgyoin nghoid bye:. 7 Hau: yug gi gye" atho kham: zeung: da" kougshu: khyoo: moo anoeb lo" byug baja"- nyang: ri yooboo khyoid byid: lho: nheig teung, ung: teung byid: ge. 8 Houg: su" nghoid yoomo nanu" gi nyang: ri gyeing" nyang: jheddab nyid da" khyoo:- nyang: se' loo sho' koid nyid wa shid re" ngoo nanu" ri mho' sang: kaid. 9 Xangshid" ri ngoo nanu" jhang khyoo: mougsoug" lhid" kaid da" khyoo: gi ca: leug, yu" khyoo: nanu" khayhi' yo" kham zeung: da" khyoo: ri ngoo jhau" shid khyoo: shid' vhu" she: khyoo: ri cang loo" wa shid mo khanham we' jen" jen" nghoid nyid gu nghoid boem la" ein: ziri si' wa shid mo lhid" kaid khyoo: nghoid. 10 Nanu" gi byu dayug yug ri nyang: shoid vhang: da" yooboo khyoid pyam byid: nghoid rigi ngoo we' bo khyoid pyam byid wa. Khasu" wim gari daja: ja: byid" yoomo byu dayug yug ri yooboo khyoid byid: ca" lo da" uri ngoo gi nanu" da" myonhoo: ri tu: lho: Khristu da" shidkhoin" moo nya: yooboo ri khyoid pyam byid: zi nghoid. 11 Ngoo hidsu" koid da" khyoo: gi- satan gi nanu" tho' moo xangshid" aoung: loo" baja"- phajhi" khyo" koid zi nghoid. Khasu" wim gari satan gi phajhi" khyau" nyid ziri ngoonu" se' nyid boem zi nghoid.

12 Khristu da" ngeibu: ludang: kho" kyoo" wa shid mo Troa voo moo ngoo ju" yhe: uri hau: joyoo moo moo" yo" zei: baja"- nga" shid re" Mangsoo gi khoem" phang byid: to". 13 Nghoid loug we' ngoonu" da" mangnhung" phoo'- Titu yo' ngoo ashoug" goo" yoomo ngoo atho' tid loo: sho' myid myoo ung: loug, nyid. Houg: yoomo Houg: mo da" byu yi ri vho" too" kho' lho Makedoni mung" khyoo: yhe: loo" bye:.

14 Nghoid loug we' Mangso jeju" gi gye" gyi: jo, da- Khasu" wim gari nyang: gi ngoonu" ri Khristu yo' dadeing: daloem: za: bui nhang: wigi Khristu da" oung: doid lo pui" moo bo oung: yen" da" thung: byu yi yhang: ti" Mangsoo gi ngoonu" ri shu" vhu" shi: bye:. Khristu se' lo da" lasi laleug, gi nam, pyo: da" shoem: yhang: ti" joyoo khyi khang" moo myoo- byo loo" nhang: wa shid re" Mangsoo gi ngoonu" ri ci: yhoung" nyid bye:. 15 Khasu" wim gari ngoonu" gi Mangso jhang moo Khristu xoin" to' bye: da" nampyo: shoem: yo' du nyid boem bye:. Hougsu" nampyo: da" shoem: gi khyoid yu zi shau" bye: mo, moo we' soem" joem: lo" zi shau" bang: jang moo we' byo sain" loo" bye:. 16 Hau: da" shoem: gi soem:" joem: loo" shau" mo, shid re" gi shid: loo" nhang: da" shid" gyoem: noo gyoem: bui: lo" lho: Khyoid yu zi shau" bye: bang: da" shid re" gi kangso dei loo nhang: da" ngei pyo: da" shoem: nghoid nyid. Houg: yoomo houg: yhang: te" moozoo" ri voin vu, wa shid re" gi khayug moin: yi" nyid lha". 17 Nyhang" gi byu gootu: myoo" sho' bang: yhang: ti" Mangso da" mungdang: ri ce: phoug" adab da" phaga zi yhang: ti" oung" khyoo: qei khyoo: ngoonu" akoid boem. Nghoid loug we' ngoonu" gi Mangsoo nhang: kaid mo, nghoid wigi Khristu da" deizoo: yi khyo" wigi Mangso da" shidkhoin" moo hau: mungdang: ri deingmain" yung" lho' da" nheigloem: yo' kho" kyo" boem zi nghoid.