KORINTHU
PHUNG: BYU YI JHANG' FOIN: KAID DA" MOUGSOUG" EIGLOEM:
(2Corinthians)
Lagyoo: Polu gi Korinthu phung yo' tei" xo khyoo: moo yau: khe" khyoo: thoung" shau" nyid uri Korinthu phung khyoo: foin: kaid mougsoug" eig leung: ein: lheung: doem lhid" kaid bye:.
Phoung byu yi dayham" gi lagyoo: Polu ri gyi" sho' yooboo foin: thoug shang" nyid khyoo: bo nyid. Nghoid loug we' nyang: gi nyangnu" yo' doem deung: shoin" veing" goo" wa shid re" gye" nheug byu myid vho: nyid ziyo' dakhyoo" ti" hau: khyoo: bue" lo da" uri nya: da" gau yi khyoo: zheung yo" yu wa ziri tid pang kyo" nyid.
He: mougsoug" da" xangshid" du moo Nyang: gi phung: moo bo da" byu dayham: nyang: ri aphoug" akhyoid tid ziyo' tid nyid mo, ri nyang: ci: yoomo dang: thain: yo' aphoug" akhyoid tid da: khyoo: ri bain sho' kyoo" lang" Hougsu" latoo: phug, yoomo nyangnu" nheigloem: thid lo ziyo' nyang: yo' doem veing" go" loo wigi nyang: gye" gau da" khyoo: ri lhid" kaid.
Hau: thang: ri nyang gi Yuda mung" moo myoung sho" nyid da" Khristain mangnhung" yi shid re" myidboo tung" agoin agoo" alu byid: boem wa shid mo Korinthu phung: bang: ri mho' kaid. Lo" thang du moo gi nyang: rigi lagyoo: pyeug nghoid mo nyangnu" she, lagyoo: main" zi nghoid ga: wigi Korinthu mo phung: byu yi dayham" bang: tid nyid ziri tid phoid: sho' kyo" khyoo: lhid" kaid.
1
1 Mangsoo myid vho" ziyo' dakhyoo"- Khristu Yesu da" Lagyoo: ngoo Polu yo'
ngoonu" da" mangnhung" Timothi gi Korinthu voo mo Mangso da" phung yo' Akhaia mung" goin" jangmo Mangso da" byu dangain" bang: ri vhu" kaid.
2 Ngoonu" da" phoo' Mangsoo yo' Aseing Yesu Khristu gi jeju" yo' ngei pyo: myenjham" da" khyoo: nanu" ri dabyid: nyid baja" o".
3 Nheig khyeug nheigloem: yo' byeung" wigi pang" thoug khyoo: aja: ja: byid: nyid da" Aseing Yesu Khristu da" nya: phoo' Mangsoo ri nyhanu" jeju" boin: coung" nghei nyid boem shang.
4 Ngoonu" yaukhi" kyikhyeig khyoo myoo" sho' shau" nyid uri Mangsoo gi ngoonu" ri pang" thoug yu bye:. Hougsu" nghoid yoomo ngoonu" gi Mangso jhang mo ngoonu" yo" kham: yu bye da" pang" thoug byid: da" jeju" yo' nyang:- yaukhi" kyikhyeig aja: ja: shau" nyid da- byu gooji ri doem yo" pang" thoug byid: boem bye:.
5 Nyhang" nu" gi Khristu kham zo: bye da" myo: tham: da" kyikhyeug yau: khe" khyoo: joem ri bo kham zo: boem zi yo" dakhyoo" ti" Khristu khyo" Mangso pang" thoug da" jeju" ajang" ri we- ngoonu" bo shau" kham: zo: nyid boem bye:.
6 Ngoonu" shidgyoin noogyoin thoung" shoug" zo: da" khyo gi nanu" ri: nheig teung ung: teung da" jeju" yo' khyoid khyi yu da" khyoo: ri shau" kham: zo: ri nanu" we' hau: jeju" ri yo" kham: yu wigi Ngoonu" kham zeung: nyid da" yaukhe" kyikhyeug khyo yo du go" da" yau: khe" kyi: khyeig da" khyoo ri nanu" we' nheigloem: gyi: sheung: ziyo' kham: yu wa yoem: vhoo" yo" yu nyid boem bye:.
7 Nanu" gi ngoonu" thoung" shau" nyid da" kyikhyeug khyoo: moo- nanu" we' bo shau" nyid ziyo' dakhyoo" ti" ngoonu" shau" kham: yu da" nheig teung ung: teung, da" jeju" ri we' shau" bo kham yu nyid ziri ngoonu" si yoomo nanu" moo ngoonu" da" nheig byu to" khyo gi khanham we' dageing: teing jo,.
8 Mangnhung: yi we"- Asia mung" moo ngoonu" thoung" shau" yu" bye shidgyoin noogyoin da" khyoo: nanu" ri doem tid poin" nau.ngoonu" da" tho' moo doin: zeug lo da" kyikhyeug yaukhe" ein: da" yoovoin, gi- gye" gyi: ziyo' gye" lid: zi nghoid yoomo ngoonu" gi kangso xo' dei nyid wa zilang" gi- nheig byu jang: aboo loo: sho' nghoid lo" boem bye:.
9 Ngoonu" gi shid: wa dam byid: shau" bye: mo, nghoid ein: lang" gi- nyang: nya: gung ri soin: pyam boem bye:. Nghoid loug we' hidsu" bue" lo da" khyoo: gi- ngoonu" gi nyang: nya: gung ri Aloem loo: za: shid: byug bye: bang: ri doem dei loo nhang: su: Mangsoo ri za: loem nghe: khau: nyid wa zi za: danghoid lo.
10 Nyang: gi houg: yhang: te" da" gyoug pho" shid: no khyoo: mo ngoonu" ri yo" khyoid yu bye: yoomo akhid" we' khyoid yu shi" wa ein: wigi ngoonu" nyang: ri damyid byu lang' nyid boem shi".
11 Houg: yoomo Mangsoo gi ngoonu" hougsu" akyu" mho' da" dang: ri tu" byid: wigi- ngoonu" ri mainkaid jeju" byid: shi" wa zi nghoid. Byu myoo" sho' mo, we' ngoonu" kham: yu bye: da" mainkaid jeju" yoomo jeju" ri coung" nghei nyid boem wa zi nghoid.
12 Ngoonu" da" nheigloem: khoug: moo gyeing" nyang: phau: khuang wa khyoo: dakhaid bo. Hau: zigi he: da" mougmyid tho moo ngoonu" da" kangso dei nyid khyoo:- je" wigi nanu" yo' tei" xo' zoem" khau: da" khyoo: moo byu da" se' yeug khyoo: moo anghe: khoug: loo: za: Mangso da" jeju" yoem: vhoo" khyo" ngoonu" gi Mangsoo byid: da" deingmain" gyeungshang: da" nheigloem: gye" myed wigi vhoeb khang" khyo" moo" zei: lo" khyoo: nghoid.
13 Akhid" ngoonu" lhid" foin: kaid da" mougsoug" joem moo nanu" nghab lho: se' gyo: yu wa khyoo: za: date: lhid" kaid.
14 Ngoonu" da" Aseing Yesu Khristu doem ju" re" da" bidnyid moo- ngoonu" gi nanu" yoomo phau: khuang joyoo boo wa ziyo' dakhyoo" ti" nanu" we' ngoonu" yoomo phau: khuang: joyoo boo baja"- akhid" ngoonu" da" khyoo: da khyam" dayam za: nanu" se' gyo: too" nghoid loug we' joeb byeung" sho' se' gyo: lo boem wa ziri ngoo nheig byu nyid.
15 He: khyoo: ri nheig shid: nheigdeig ziyo' nanu" eig lheung: mo da" jeju" yo" yu goo" baja"- nanu" jhang moo shi" ju" ri" wa ein: xangshid" ri ngoo nheig byu nyid.
16 Khasu" wim gari Makedoni mung" khyoo: yhe: lo" u" we' houg: mo doem tau" lo uri we' nanu" moo vang lo lho: Yuda mung" khyoo: yhi: wa gyung: khyo: shid re" we- nanu" jhang mo pang" thoug khyoo: yo" yu baja" ein: ngoo myid too" bye:.
17 Akhid" hid: su" nyheung soin' lo" khyoo: moo ngoo gi ageing: teung da" fain" loo bo da" nheigloem: bo la". Ngoo nheig byu da" khyoo: ri soin' jen" lo" da" uri nyang: nya: akyu" shoo: wa da" myid soin: khyoo: yo' zei: so' koid lo" la". Ayo, daloem: moo za:- nghoid bye:- ga: we' anghoid o" ga: we' tid bye: la".
18 Gyeing" nyang: Mangsoo gi deingmain" khyoo: ri tid nyid ziyo' dakhyoo" ti" ngoo nanu" ri byid: da" dang: theung khoin" we' nghoid zi' anghoid zi lhu: lheug da" dang: anghoid.
19 Khasu" wim gari nanu" ri ngoo yo' Sila eig yug Timothi kho" kyo" da" Mangso nya: zoo: Yesu Khristu gi ?Nghoid ziyo' anghoid? ziri lhu: lheug da" alhu: alheug su: anghoid. Gyeing" nyang: ga: ri nyang: gi Mangsoo da" myid vho: khyoo: ri ?Nghoid? ga: tid byid: da" Aseing nghoid nyid.
20 Nyang: gi Mangso da" dang: theung khoin" dangain" da" shid re" nghoid ein: da" agung nghoid nyid. Hougsu: nghoid yoomo ngoonu" gi Mangso da" myonhoo: phung" yoeb ri thu' loo nhang: wa shid re" Yesu Khristu moo A men, ein: boem bye:.
21 Nanu" yo' ngoonu" ri Yesu Khristu moo dayug za: bui" sho' kangso dei nhang" su: gi Mangsoo nyang: za: nghoid nyid.
22 Mangsoo nyang:- ngoonu" ri goo" zu: xen khyen: yu wigi- nya: byumyu" yi nghoid bye: da" laxoem" dazid' thoung" tab byid: bye: ziyo' ju" loo wa ayo, moo ngoonu" shau" kham: yu wa da" jeju" dangain" shid re" kookham: kham: byid: ziyo' ngoonu" da" nheigloem: khoug: moo hau: gyeungshang: da" Venyi: foid shoin" kaid byid: bye:.
23 Korinthu voo khyoo: ngoo adoem ri" loo: wa ein: ngoo myid phyed to" khyoo: gi- nanu" ri khyam" sa: byid: noug yoomo nghoid da" khyoo:- nga" nheigloem: ri si' byid: da" Mangsoo gi nga" da" sagsi" nghoid nyid.
24 Nanu" ce" ja: ri loem" jeing" boem ca" ein: wigi ngoonu" amyeung" byid: to" zi anghoid. Nanu" geing: geing: teing teing hau: loem" jeing" khyoo: moo yab jo, boem bye: ziri ngoonu" se' boem bye:. Ngoonu" gi nanu" da" ngei pyo: gau yi da" khyoo: joem ri she,- nanu" yo' dage" moo" zoo" ri coem voin vu, nyid zi nghoid nyid.