8
1 Akhid" nanu" mougsoug" khyo" myid: kaid da- yu phara" soolhoo: ri xoin" to' pyam bye: da" zoo: noem yo' sen: wigi ngoo tid kyoo" wa nghoid. Nyhang" dangain" bang: gi lasi laleug myid boo bang: za: nghoid boem, ga: wigi: nyangnu" tid nyid zigi deung' nyid. Nghoid loug we' houg: te" da" lasi laleug gi byu yi ri phau: khyeung nghoidboin: nhang: nyid- nghoid loug we' jheddab da" emyed gi so' koid so' nyheung' byid: se' nyid.
2 Byu dayug yug gi ngoo gi daja: se' ga: myid nghoid rigi nyang: si' eung: ziri: lang" asi' shi" su: nghoid nyid.
3 Nghoid loug we' Mangsoo ri si' su: gi Mangsoo yo' zoem" khau: khyoo: ri kham: yu se' nyid.
4 Houg: yoomo yu phara" soolhoo: ri xoin" to' pyam bye: da" shoo" yo' sen: lho: tid shang ein: rigi: yu phara" soolhoo: ga: zigi gyeing" nyang: kangso dei lho: so" yen" khyoo: ajo, ziyo' dayug kyeung" da" Mangsoo mo lid: wigi gootu: Mangsoo anyid lo: ziri ngoonu" se' nyid boem bye:.
5 Mougkhung: mougdi yo' mougmyid yoosoo" tho' moo" yu phara" joem, ga: myeing mo, nyid nyid boem wigi yu phara" joem myoo: sho' yo' Aseing ga: bang: myoo" sho' nyid ago".
6 Nghoid loug we' ngoonu" shid re" gi phoo ga: da" Mangsoo dayug za: danyid. Nyang: gi jo, moo: jo, ri phain" too" su: nghoid yoomo nya: shid re" ngoonu" kangso dadei nyid boem. Aseing Yesu Khristu ga: da" khyoid yu su: we' dayug za: nghoid wigi nyang: yoomo jo, moo: jo, bue" lo ziyo' nyang: yoomo ngoonu" kangso dadei nyid boem.
7 Nghoid loug we' byu yug khang" moo" gi he: deingmain" khyoo: ri asi' nghoid ago"- byu dayham" gi yu phara" soolhoo: ri loemkhau: lid: lo yu" boem bye: yoomo akhid" ju" sho' xoin" to' bye: da" zoo: noem ri shoug" zo: uri he: zigi soolhoo: ri ab nung" byid: zoo: noem nghoid ga: myid boin: nyid ago". Nyangnu" da" phug, soo" lheig: myid yu" da" emyed yoem: nu" boem yoomo nyangnu" zo: da" zoo: noem gi nyangnu" ri aco' ajhoid bue" loo" nhang: ga: myid yu ago".
8 Zoo: noem gi Mangsoo yo' ngoonu" tei" xo' go" da" khyoo: moo ce: noem myo: loung: loo nhang: khyoo: ci: ajo. Azoo: nghoid loug we' ngoonu" moo: ce: noem yoem" soem" loo" wa khyoo: ajo, zo: nghoid loug we' ci: loung: loo wa khyoo: aboo.
9 Nghoid sho loug we' nanu" hidsu" agyug aci, loo: zo: shoug, khyoo: gi Mangsoo ri loemkhau: khyoo: moo: yoem: neung: nyid bang ri khyoo: shu" vhang: ziyo' yooboo koid nhang: da" khyoo: abui" wa shid re" zid" nyid ge.
10 Dangtu- he: da" khyoo: moo: phug soo" lheig myid yu" da" khyoo: moo yoem: nu: nyid su: dayug gi lasi laleug myid yu" emyed boo bang: nanu"- yu phara" soolhoo: jo, da" yhoem: moo: voem: zo: nyid ziri: myang rigi yu phara" soolhoo: ri xoin" to' byid: da" zoo: noem ri voem" zoo: goo" baja" ein: yoem: byid: zi abui" wa goo" la"
11 Houg: yoomo phug soo" lheig se' myid soin: yu da" emyed yoem: nu: da re" mangnhung" pho shid re" Khristu gi shid: kham byid: bye: nghoid loug we' nang ase' myid yu" yoomo hau: yug gi byo, gang: loo" wa zi anghoid la"
12 Hid: khyo" wigi nanu" gi nyang: tu: nya: da" Khristain mangnhung" yiri shoid vhang: khyoo: lo" eung: wigi yoem: neung: da" phug soo" lheig myid yu" da" emyed ri noo, nhang: nghoid rigi nanu" gi Khristu ri shoid vhang: bang: bue" loo wa zi nghoid.
13 Hougsu" nghoid yoomo zo: noem khyo" nga" mangnhung" phoo ri nheigloem: leung nhang: wigi yooboo dakoid nhang: wa nghoid rigi nga" mangnhung" phoo aleung loo" wa shid re" ngoo dapyaid' goin" shoo" azoo: loo: za: nyid wa.