7
1 Akhid" nanu" lhid" kaid da" khyoo: yo' sen: lho: wigi tid pang kyoo" wa. Yuggi dayug gi ekoin deungkhu: avang, ri ge.
2 Nghoid loug we' aved' avhu: koid da" moozoo" sung' myo: loo yoomo yuggi kha: yug we' yhoem: seing: myhi' yoo" ja". Myiyi: yug khang" moo" we' yhoem: seing: phoo yoo" goo" baja"
3 Yhoem: seing: phoo gi yoovoin, jo, ziyo' dakhyoo" yhoem: seing: myhi' yo' zoem" nyid goo" baja". Yhoem: seing: myhi' we' houg: yo' dakhyoo" yhoem: seing: phoo yo' zoem" khau: wigi dayug wigi: dayug da" vho: ngei khyoo: ri cang pyeing" byid: nyid goo" baja.
4 Yhoem: seing: myhi' gi nya: gungdu: ri ayo" seung: ci:- yhoem: seing: phoo daseung: ci:- houg: yo' dakhyoo" yhoem: seing: phoo we' nya: gungdu: ri ayo" seung: ci:- yhoem: seing: myhi' daseung: ci.
5 Nanu" gi shid mo wigi akyu" mho' wa shid re" daso, zoo: azoem" goo" loo: nyid wa shid re" myid veing" go" to" da" ayo, lid' lang" gi yhoem: seing: phoo yhoem: seing: myhi' gungshoo" zoem" khoug: wa shid re" ajang" pyam goo". Akyu" mho' da" ayo, lid' lang" gi doem zoem" khau: nyid ge. Hougsu" nghoid lang" gi nanu" da" gungdu: ri ayo" khang" yoomo satan jhuphyo' zi ashoug" goo" baja.
6 Hidsu" ein: ngoo tid nyid da" khyoo: gi nanu" ri amyeung" khyo' nyid zi anghoid. Akhang" byid: nyid khyoo: za: nghoid.
7 Gyeing" nyang: ga: rigi byu dangain" bang: ri ngoo yhang: ti" nyid nhang: nau zi nghoid. Nghoid loug we' byu yug khang" moo" gi Mangso jhang mo yo" yu da" mainkaid byid: jeju" gi adu, goo- byu dayug yug gi gootu: daja- gootu: dayug gi gootu: daja: ri yo" yu.
8 Akhid" gi ekoin deungkhu: avang, shi" mo, yo' cougmoo" myhi' yi ri ngoo tid nau khyoo: gi ngoo yhang: ti" yo' xo' nyid lo" rigi: nanu" shid mo je" ge da" khyoo: nghoid.
9 Nghoid loug we' nanu" da" gungdu: ri ayo" khang" wa nghoid rigi lo, xo' lho: ekoin deungkhu: qei" goo" baja. Khasu" wim gari gungshoo" da" nyam, khyoo: ri kham zo nyid wa gungkhoo: lo, xo' lho: ekoin deungkhu: qei" zigi je" ge zi nghoid.
10 Deungkhu: vang bye: bang: ri ngoo daja: tid too" nau. Hau: khyoo: gi ngoo mo anghoid. Aseing mo tid to" khyoo: nghoid- yhoem: seing: myhi' gi yhoem: seing: phoo ri age to" pyam khoo.
11 Nghoid loug we' nyang: to" too" kho, nghoid rigi nyang: ekoin deungkhu: avang, loo: za: nyid baja" Hougsu" anghoid rigi akhang: mo yhoem: seing: phoo yo' doem veung" go" lho: doem zoem" nyid goo" baja" yhoem: seing: phoo we' yhoem: seing: myhi' ri age she: pyam.
12 Gootu: byu yi ri ngoo tid nau zigi (Aseing tid zi anghoid loo: za: ngoo tid zigi) Khristain yuggi dayug gi aloem jeing" da" yhoem: seing: myhi' yo" wigi hau: myiyi: gi nyang: yo' xo' nyid wa shid re" myidveung" nghoid rigi nyang: gi hau: myiyi: ri age, kang" pyam.
13 Houg: yo' dakhyoo" ti" Khristain myiyi: dayug gi aloem" jeing" da" yhoem: seing: phoo to' yoo' eung: nghoid rigi hau: yuggi gi nyang: yo' xo' nyid shi" wa myidveung" rigi nyang: gi hau: yuggi ri age kang" pyam.
14 Khasu" wim gari aloem" jeing" da" yhoem: seing: phoo gi loem" jeing" da" yhoem: seing: myhi' yoomo loem" jeing" loo wa aloem" jeing" da" yhoem: seing: myhi' we' loem" jeing" yhoem: seing: phoo yoomo Mangsoo ri lhoem: yu mo, bue" loo wa zi nghoid. Hougsu" anghoid ri nyangnu" da" nya: zoo: nya: myid: yi gi aloem" jeing" mo, nya: zooyi yo' dakhyoo" ti" za: bue" loo" goo" wa zi nghoid. Akhid" koem gi Mangso gi Mangso kham: yu moin mo, nanu" bue" lo abye: go".
15 Nghoid loug we' hau: aloem" jeing" da" yhoem: seing: myhi' hougsu" anghoid lang" yhoem: seing: phoo gi gang: go" loo" nau ri gang: go" loo" baja" Houg: yhang: te" da" moozoo" moo Khristain nghoid da" yhoem: seing: myhi' anghoid lang" yhoem: seing: phoo gi nanu" ri ngeipyoo: myenjham" tung" nyid wa shid re" khe: yu to" zi nghoid bye:.
16 Khristain yhoem: seing: myhi' we"- nang gi re" da" yhoem: seing: phoo ri ayo" khyoid yu wa ein: khasu" yo" tid nyid lha" Houg: yo' dakhyoo"- Khristain yhoem: seing: phoo we"- re" da" yhoem: seing: myhi' ri ayo" khyoid yu wa ein: khasu" yo" tid nyid lha"
17 Byu dayug yo' dayug gi nyang: ri Aseing gam, byid: too" bye: mainkaid jeju" yo' dakhyoo" ti" Mangsoo gi nyang: ri khe: yu uri yo' dakhyoo" ti" xo' lho: wigi: kangso dei nyid goo" baja" he: zigi phung: khang" moo" ri ngoo jhau" byid: da" cang yhe: loo" wa tarha" joem nghoid.
18 Athang: yham" da" byu dayug khyo" wigi Mangso khe: yu zi shau" nghoid rigi athang: yham" da" akhoo: ri ci: akoid ca" loo. Athang: ayham" shi" su: ri Mangso khe: yu zi shau" nghoid rigi nyang: gi athang: ayham" noo" loo.
19 Byu dayug athang: yham" ci: ayham" ci: ein: zigi ce" yhau: gyen: zi anghoid. Mangso amyeung" tarha" ri cang yhe: loo" wa ziza: yhau: gyen: nyid.
20 Byu yug khang" moo" gi Mangso khe: yu da" u" mo bue" nyid akhyoo" yo' dakhyoo" ti" za: kangso dei nyid goo" baja.
21 Nang gi Mangso khe: yu da" ayo, moo: join koid nyid su: nghoid la" nghoid ja" ci: aca". Nghoid loug we' join mo yo" loid wa akhang" yo" rigi hau: amyeung" akhang" ri ci: loo" we.
22 Khasu" wim gari join danghoid nyid uri hau: Aseing wigi: khe: yu zi shoug" su: gi Aseing da" loid byoin byu nghoid bye:. Houg: yo' dakhyoo" loid byoin bye: byu dayug nghoid uri Aseing khe: yu zi shoug" su: gi Khristu da" join bue" loo bye:.
23 Nanu" ri Mangsoo gi aphoug" phyed lho: qei, yu too" mo, nghoid bye: yoomo byu yi da join akoid nyid loo: goo".
24 Mangnhung" yi we"- byu dayug yo' dayug gi khe: yu uri da" bue" nyid akhyoo" yo' dakhyoo" ti" Mangsoo yo' zoem" khau: lho: wigi xo' wigi: kangso dei nyid yab, yhe: loo" ge' o".
25 Akhid" nanu" mougsoug" lhid" lho: myid: kaid da" ekoin deungkhu: avang, shi" bang: khyoo" yo' sen: wigi hau: Aseing mo pyeing: to" da" dang: ngoo ayoo. Nghoid loug we' Mangso nheigkhyeig shoomyen: da" jeju" khoug: moo loem" jeing" nyid su: dayug khyo" wigi ngoo shau" myid yu" khyoo: ri tid kyo" kaid zi nghoid.
26 Akhid" nyang: thoung" shau" nyid da" myidmyoo: ungloug da" khyoo: ri yu" myang lho: ngoo tid nau da" khyoo: gi yuggi dayug gi nyang: akhid" yo" nyid nyid yhang: ti" yo" nyid nyid rigi: je" ge nyid.
27 Nang yhoem: seing: myhi' yoo" bye: nghoid rigi kang" pyam wa shid re" amyid nyid, ekoin deungkhu: aqei: shi" su: nghoid rigi ekoin deungkhu: qei" wa shid mo amyid nyid.
28 Nghoid loug we' lo, xo' lho: ekoin deungkhu: qei" bye: nghoid rigi nang ce: yooboo ayoo". ekoin deungkhu: aqei" shi" myiyi: dayug yug nghoid rigi nyang: lo, xo' ekoin deungkhu: qei" rigi: ce" yooboo ayoo". Nghoid loug we' ekoin deungkhu: qei" bye: bang: nyid" khang" moo" thoung" shoug" wa da" yau: khe" khyoo- nanu" ri athoung" shoug" nhang: noug yoomo ngoo hidsu" tid nyid zi nghoid.
29 Hau: lho: wigi: Mangnhung" yi we"- ngoo tid nau nyid da" khyoo gi hidsu" nghoid- ayo, bidnyid myoo" sho' aboo loo- akhid" mo wigi: lo, xo' bye: da" byu yi gi lo, axo' shi" da" yuggi yi yhang: ti" nyid loo" goo" baja".
30 Ngougbyid ngougnhab shau" nyid bang: gi akug ashu: mo, yhang: ti" gauyi ngei pyo: nyid bang: gi agoug, ayi loo: nyid bang: yhang: ti" ziyoo jonu" qei, yu ci: bye: bang: gi nyangnu" qei yu ci: bye: da" zi, seing: anghoid mo, yhang: ti" nyid goo" baja.
31 Mougmyid mo, ziyoo jonu", ci: yhoung: nyid bang: gi dangain ziri: seung: ci: wigi ci" we' Aseing mo, yhang: ti" nyid loo" goo" baja" khasu" wim gari Akhid" myang nyid da" mougmyid yoosoo" gi ayo, akhyeing: myang" sho' jo, loo: wa zi anghoid.
32 Ngoo gi nanu" ri myidmyoo: ungloug da" khyoo: mo loid loo" wa shid mo vho: ngei nyid. Myi: ayu shi" yuggi, gi hau" Aseing ri gau yi nhang: noug yoomo Aseing da" moozoo" moo: nheigloem: zoug jo.
33 Nghoid loug we' myi: yu bye: su: koem gi yhoem: seing: myhi' vho: da" khyoo: ri goug, nhang: noug yoomo mougmyid yo' sen: da" khyoo: moo: myid myo: seing" kho" nyid.
34 Houg: yoomo nyang: gi nheigloem: eig gang' gyo" jo,- ekoin deungkhu: avang, shi" myiyi: anghoid lang" zoomyi: agyeing" gi Aseing ri nyang: nya: gungdu: gyeungshang: Venyi: yo' nyid baja" ga: ab nung" xoin" to' byid: noug yoomo Aseing da" mo" zoo" ri yo" myid loem" ziyo' seing" kho" nyid. Nghoid loug we' yhoem" seing: phoo yoo" bye: da" myiyi: gi nya: yhoem: seing: phoo vho: ngei da" khyo" bui" byid: ca" yoomo mougmyid yo' sen: khyoo: moo: za: myid myo: seing" kho" nyid.
35 He: da" khyoo: ri ngoo tid nau nyid zigi ngoo nanu" ri pang" thoug noug yoomo nghoid. Ngoo nanu" ri tarha" yo' zei: zeung' ci: wa shid re" anghoid. Nanu" ri deingmain" joeb, byeung" wigi jo da" khyoo: moo: cang so" loo" nhang: nau, tho' moo: gootu- Aseing da" moozoo" moo: teung to" zi aboo loo sho' bain sho ab nung" xoin" to' pyam nhang: noug yoomo he: da" khyoo: ri tid nyid zi nghoid.
36 Dang: myid: to" thang: ri lo, xo' ekoin deungkhu: aqei" loo: wa ga:- myid too" su: eig yug da" khyoo: gi yuggi gi myiyi: da" atho' moo ayung" adu khyo" nya: gungshoo" nyam, da" myid gye" thain: nyid wigi lo, xo' ekoin deungkhu: daqei" loo: wa ga: myid vho: nghoid rigi lo, xo' yu baja" hau: zigi yau: noo yooboo anghoid.
37 Nghoid loug we' yuggi gi nya: yhoem: seing: myhi' ayu wa khyo" myid phyed ci: nghoid rigi nya: nheigloem: ri we' goolhoo: zoo: yo" khang" zeung: ci: wigi myi: ayu nghoid rigi: ge khyo" zei: khyoo: nghoid.
38 Hougsu" wigi: nyang: nyang: dang: myid: too" bye: myiyi: zoo: yo' lo, xo' su: gi ge' da" moo" zei: su: nghoid bye:. Nghoid loug we' hau: myiyi: zoo: ri ayu loo: nyid su: we' je ge khyo" koid su: nghoid bye:.
39 Lo, bain xo' yu bye: da" myiyi: myhi' gi nya: yhoem: seing: phoo dadei nyid nyid gi nyang: yo' xo' zoem" khau: nyid ca. Nghoid loug we' yhoem: seing: phoo shid: byug bye: nghoid rigi nyang: vho: da" yuggi hang" yo' nghoid loug we' lo, doem yo" xo'- nghoid loug we' hau: su" lo, doem xo' yu su: gi Khristain phung: byu nghoid ca.
40 Nghoid loug we' hau: myiyi: gi ekoin deungkhu: avang, loo: yo" nyid nghoid rigi nyang: gi je" nyid pyoo: wa zi nghoid. He: khyo" gi ngoo myid yu" da" khyoo: nghoid ziyo' ngoo we' Mangso da" Venyi: yo" kham: yu su: dayug nghoid ein: loemkhau: nyid o".