1 Hau: thang: wim: nyid" ri khainjung agyi moo"' Anani gi Ludaid' vhujhung: yi dayham" yo' dage- tarha" zoug: phoo' Tertulu ga: su: ri shu" lho: wigi Kesare voogung Khyoo: yhe: lo". Nyangnu" gi Philib shidkhoin" khyoo: vang yhe: boem lho: Polu ri yooboo foin: da" khyoo: yhe: kau: to" ago". 2 Houg: lang" Polu ri khe: fang yu lho: wigi tarha" zoug: phoo' Tertulu yooboo foin: da" dang: tid zigi * Phau" myang: da" zoug: moo" Philib we"- Phajhi" koung da" re" khyoo: shid' vhu" she: jang" moo ngoonu" gi zain myang" sho' ngeipyoo: yug yoo tung" za: yo" nyid lid lo boem bye:. Nang gi ngoonu" da" mungdain moo ca" yo, nyid da" khyoo: moozoo" jid: zoo" sho' ri zei: byid: lid loo bye: su: nghoid. 3 Houg: su" nghoid yoomo ngoonu" gi hau: khyoo: ri joyoo khyi khang" moo" moo khanham we' kham: yu wigi ngoonu" gi nang ri jeju" gye" boin: nyid boem. 4 Ngoo gi zoug: phoo' re" da" ayo, akhyeing: ri- myoo" sho' ayu pyam noug. Houg: yoomo leung" khyo" ngoonu" tid da" dang: ri tam" gyoo: byid: wa shid re" mho' nyid. 5 Byu he: yug gi ayoug: akhi" bui" nhang: su: nghoid ziyo' mougmyid gyab, goin" jangmo Yuda byumyu" yiri anhung akhoid bui" nhang: wa shid mo pui: su: nghoid yoomo Nazared phung: mo vhujhung: dayug nghoid ziri ngoonu" shau" myang bye:. 6-7 Nyang: gi Noku Yhoem: Moo" ri we' avoid avu: bui" nhang: wa ga: soin' nyid su: nghoid yoomo ngoonu" gi nyang: ri myheug yu zi nghoid. 8 Nanyang: byu he: yug ri myid: ca: yu" nghoid rigi ngoonu" nyang: ri yooboo foin: da" khyoo: dangain"- Nanyang: shau" gyo: loo" wa nghoid ga: tid ago". 9 Yuda byu yi gi he: dang: gi dangain" deung zi nghoid ga: coem, tid boem ago".

10 Mung" zoug: phoo' gi lo, tu' tu' lho: Polu ri dang: tid nyid Polu ri dang: tid shid" nhang: khyoo: gi zoug: phoo' nang gi he: byumyu" yi da tho' moo zain nyid myang" sho' dang: phyed byid: lo yu" bye:. Houg: yoomo ngoo gi re" da" shidkhoin" moo ngoo: nya: gung ri yo" tid khoem yu yoomo gye" gau. 11 Ngoo gi Yerusalem voomoo" khyoo: Mangsoo ri noku wa shid mo yhe: zi akhid" daxe: eig nyid" ajain" shi" ziri zoug: phoo' nanyang: yo" ge yen: yu shi. 12 Ngoo gi Noku Yhoem: Moo" moo dayug yo' we' tid byo, go" ziri Yuda byumyu" yi amyang boem. Hau: tho' moo gootu: Yuda tarha" jung moo we' voogung khoug: moo nghoid loug we' mungbyu yi lu: fu: to' loo nhang: wa shid re" lhu: tau: khyoo: ri nyangnu" ashau" myang nghoid boem ago". 13 Nyangnu" gi akhid" re" da" shidkhoin" moo yooboo foin: nyid boem da" khyoo: ri we' sagsi ayo" toin" shid nghoid boem ago". 14 Shoid ga: nyangnu" tid da" houg: khyoo: ein: da" phung: loemkhau: da" khyoo: moo cang yhe: khyo" wigi ngoo gi nyangnu" phoug" phyid" yi da" Mangsoo ri noku nyid ein: he: khyoo: rigi re" shidkhoin" moo ngoo yhen: yu bye:. Nghoid loug we' ngoo gi Moshe tarha" yo' lapi: yi da" mougsoug" joem moo lhid" to" khyoo: dangain" ri loemkhau: cang pyeung nyid. 15 Ngoo gi nyangnu" yo' dakhyoo" ti" xangsu: byu yi gi mo, agi mo, dangain" dakhyoo" te"- shid: jangmo doem dei to'' loo wa nghoid ein: Mangso khoug: moo myed lang" nyid su: nghoid, 16 Hougsu" nghoid yoomo ngoo gi Mangso shidkhoin" moo we' byu yi da" shidkhoin" moo we' nheigloem: gyeing: gyeing: za: nghoid wa shid re" khanham we' ge bue" yhi' mo yoem: kaid nyid su nghoid. 17 Ngoo gi Yerusalem voomoo" mo thu' lo" thang: ri myang" sho' zain ri nga" byumyu" yi shid mo, alu: ngei ri voin yhi: wa shid re yo' Mangsoo ri xoin" ngei" byid: wa shid re" hau: voogung khyoo: ju" loo" bye:. 18 Nyangnu" gi ngoo kyeung sain' khyoo: ri bain koid thang: ri Noku Yhoem: Moo" moo xoin" ngei" byid: uri ngoo ri myang boem. Hau uri gi ngoo yo' dage" mungbyu yi hang" we' anyid- mo, thei" mo, yug we' ci: abui". 19 Nghoid loug we' hau: jang" moo Asia mung" mo ju" re" da" Yuda byumyu" yi dayham" bang: nyid nyid ago". Nyangnu" gi ngoo ri yooboo foin: wa zi daja: bo boem nghoid rigi nyangnu" da" gung nyang: re" da" shidkhoin" moo vang re" lho: nyangnu" da" yooboo foin: khyoo: ri re" tid kyoo" eung: nyid. 20 Houg: su" anghoid lang" gi ngoo tarha" yab, do' bang: da" shidkhoin" moo yab, jo, da" uri nyangnu" nga" atho' moo myang da" yooboo yo' shoid vhang: da" khyoo: ri he: byumyu" yi gi akhid" he: da" joyoo moo tid goo" baja. 21 Ngoo, gi nyangnu" da" shidkhoin" moo yab, jo, uri" Shid: bye: bang: doem dei, to loo wa khyoo: ri loemkhau: loem" jeing" nyid yoomo akhid" nyid" ngoo gi nyangnu" da" myid: ca: yu" da" khyoo: ri kham nyid, ein: yoid, nyho: da" tho' moo jain" lho: nyangnu" gi ngoo ri ce" ja" yooboo we' ayo" foin: boem nghoid ago". 22 Hau: thang: ri Philib' gi hau: khyoo: ein: da" phung: da" khyoo: yo' sen: wigi goolhoo' za: se' too" su: nghoid yoomo myid: ca: yu" da" khyoo: ri theung: pyam bye:. Houg: lang" nyang: gi gyizoug: moo" Lusi ju" loo lang" Ngoo nanu" moo" ri dang: phyed byid: wa ga: nyangnu" ri tid. 23 Houg: su" wigi mung" zoug: phoo' gi Polu ri voin: tang: zung" wa da" yoovoin, boo su: ri re" yu" cung: wa da" akhang" byid: wa shid re" gyizoug: phoo' ri amyeung" byid: kaid.

24 Dayo, koo: kyo: lo" thang: ri Philib' gi Yuda myiyi: Drusila ga: da" su: nya: yhoem: seing: phoo' yo' dage" ge" ju" re" da. Nyang: gi Polu ri khe: yu byid: nhang: lho: wigi- Yesu Khristu ri loem" jeing" da" khyoo: yo' sen: lho: wigi Polu kho" kyo" da" mungdang: ri tam" gyo: yu" nyid da. 25 Nghoid loug we' Polu gi ge deingbyeung" da" khyoo: ri nyang: nya: da" gungdu: ri vhoeb khang" da" khyoo: ju" loo wa da" tarha" dang: phyed bidnyid da" khyoo: ri kho" kyo" nyid lang" gi Philib' gi gyo: gyoug lo wigi akhid" nang loo" re- thang: phyang" agoo ngab lang" Nang ri doem khi: wa ga: tid. 26 Nyang: gi Polu ngei kyab, byid: abe? ga: myed wigi Philib' gi daso' so' khe: yu lho: doem go" nyid. 27 Hau: thang: ri eig zain' koo: kyo: loo" lang" Mung" zoug: phoo' Philib' da" khoo" vang moo Pokuphestu ga: su: mung" zoug: doem koid nyid. Philib' gi Yuda byumyu" yi ri myonhoo: shoo: noug yoomo nyang: gi Polu ri thung: lhoung, too" khare".