1 Polu gi Yuda tarha" kongsi: goin" bang: ri yu" zhug to" lho: ?Nga" mangnhung" Israela byumyu" yi we"- akhid" nyid" ju" sho' ngoo gi Mangso da" shidkhoin" moo nheigloem: gyeing: gyeing: za: kangso' dei, lid: loo bye? ga: tid. 2 Khainjung agyi moo"' Anani gi Polu nam, moo yab, jo, mo, ri Polu da" nhoid' moo baid byid: wa shid re" amyeung" byid: kaid. 3 Houg: lang" Polu gi shafoid" phyu: mhoin" to" da" xiyam, we"- Mangsoo nang ri gyeing" nyang: re" baid wa zi nghoid. Nang gi hau: tarha" yo' dakhyoo" ti" ngoo ri phyed byid: wa shid re" houg: moo zhoung: jo, sho' nghoid loug we' tarha" ri shoid vhang: lho: ngoo ri baid wa da" amyeung" byid: da- ga: tid. 4 Polu da" anam, moo tain" nyid mo, gi nang gi Mangso khainjung agyi moo" ri yo" rui" nhung: lha"? ga: tid boem ago". 5 Houg: lang" Polu gi mangnhung" Israela byumyu" yi we"- nyang: khainjung agyi moo" nghoid ziri ngoo asi- ga: tid. Jhoem: mungdang: moo Re" byumyu" ri zoug: koid su: ri age khyo" age tid- ga: tid to"- ga: phoug tid da. 6 Polu gi tarha" yab, do' moo boo bang: dayham" gi Pharishe" nghoid wigi dayham" gi Saduke nghoid ziri myang lang" Polu tid zi gi mangnhung" Israela byumyu" yi we"- ngoo gi Pharishe" dayug nghoid wigi Pharishe"" dayug nya: zoo: we' nghoid. Shid: jangmo doem dei to'' loo wa ziri ngoo myed byu lang" nyid khyoo: athang shi" wigi ngoo gi he: khyi moo myid: ca: yu" ziri shau" nyid zi nghoid- ga: tarha" yab, do, moo nyho: tid nyid. 7 Polu he: dang: ri tid kaid yo'- Pharishe" yo, Saduke" gi nyang: cang" nyang: tid ngeug byo, go" thu' lo wigi tarha" yab, do' moo boo bang: gi eig phung go, gyo" loo" khari" bye:. 8 ( Khasu" wim gari Saduke" gi byu yi gi shid: jangmo doem dei, to' lo khyoo: ajo,- Mau lagyoo: yi ga: zi we' anyid. Venyi: ga: zi we' aboo? ga: tid mo, nghoid ago, Nghoid loug we' Pharishe" ga: bang: gi Houg: soem" ja: goin" jo, zi nghoid: ga: loem" jeing" ago".) 9 Nyho: nyid thui: je" gyi: lo nyid wigi Pharishe" shoid khyoo: zheung: bo da" tarha" sara: yi dayham" bang: gi to' yab, re" boem lho: ?ce: noem shoid khyoo: ri ngoonu" amyang- Venyi: wigi nghoid la'- anghoid lang" moug: lagyo: wigi nghoid la'- nyang: ri tid nhang: bye:? ga: tid ago". 10 Houg: su tid ngeug byo, go" da" khyoo: gi je" myo: loo yoomo Polu ri adu atoem koid pyam boem wa ziri gyizoug: moo" gi gyoug nyid Houg: yoomo nyang: gi nya: gyizoo: yi da" mo, phung: khyoo: gyoo" lo" lho: Polu ri nyangnu" lo, mo yhe: shu" yu wigi gyidab, khoug: khyoo: shu" vang loo" wa shid re" amyeung" khyo' kaid. 11 Hau: da" myen" ri Mangsoo gi Polu da" anam moo re" yab, jo, wigi agyug- nang gi he: da" Yerusalem Voomoo" moo nga" khyoo: ri sagsi yo" kham byid: abye:- houg: yo' dakhyoo" ti" Roma voomoo" moo we' sagsi kham byid: ca" shi" wa ga: tid.

12 Thang: nyid" nab, kyoo ri Yuda byumyu" dayham" gi sham: go" lho: phajhi" daja: ri khyau" ci: ago". Nyangnu" gi Polu ri ayo" said pyam pyam gi ci" we' azoo: ashug wa"- ga: nheung" ci ago". 13 Hidsu" phajhi" khyau" too" bang: gi byu myed: xi: jain" koo: su" nghoid boem ago" da. 14 Hau: thang: ri nyangnu" gi Khainjung agyi zeing yi yo' Ludaid' vhujhung: yi jhang khyoo: zheung: yhe: lo" lho: ngoonu" gi Polu ri ayo" said said gi ci" we' azoo: ashug wa ein: jham gye" tang: nheung" ci: boem bye:. 15 Houg: yoomo ngoonu" yo' tarha" yab, do, mo phung: bang: gi Polu da" khyoo: ri je" si' noug goin' koid lho: Polu ri nanu" jhang khyoo: shu" gyo" loo wa shid mo Roma gyizoug: moo" jhang dang: pyeing: kaid ge'. Nanu" jhang khyoo: nyang: aju" gyo" loo shi uri ngoonu" gi nyang: ri said wa shid re" jen" jen" lang" nyid boem wa ga: yhe: tid boem. 16 Nghoid loug we' houg: su" phajhi" khyau" to" da" khyoo: ri Polu da" zoo: oug: yug gi nu" shau" gyo: lho: nyang: gi gyidab, khyoo: vang yhe: wigi Polu ri tid kyoo" bye:. 17 Houg: yoomo Polu gi gyizoug: phoo' dayug ri khe: yu lho: He: zoolu: zoo: ri gyizoug: mo" jhang khyoo: shu" yhi: we' gyizoug: moo" ri tid kyoo" wa zi nyang: daja: yo' ga: tid. 18 Gyizoug: phoo' gi hau: zoolu: zoo: ri shu" yu lho: gyizoug: mo" jhang khyoo: shu" vang:, yhe: wigi Thung: byu Polu gi ngoo ri khe: yu lho: he: zoolu: zoo: ri nang zoug: mo" jhang khyoo: shu" byid: nhang: kaid. Khasu" wim gari zoolu: zoo: gi nang ri tid kyoo" wa da" dang: daja: yo" ga: tid kyo". 19 Houg: lang" gyizoug: moo" gi nyang: ri lo, mo she: yu lho: gau: da" joyoo khyoo: shu" yhe: lho: Nang ngoo ri ce: ja: tid kyoo" nau, lha"? ga: myed. 20 Houg: lang" hau: da" zoolu: zoo: gi Yuda amyeung" akhang" ci: bang: gi Polu da" khyoo: ri je" wigi si' noug goin, koid boem lho: wigi nab, kyoo, Polu ri tarha" yab, do, mo shu" gyo" loo wa shid re" Nang zoug: moo" ri mho' wa ga: sham: veing" to" ago". 21 Nyangnu" da" dang: ri nang atam" gyoo:- Khasu" wim gari byu myed: xi: yug jain" gi fu" moo" khyoo: moo gau" jo, lho: wigi nyang: ri lang" nyid boem wa nghoid. Nyangnu" gi Polu ri za: ayo" said pyam pyam gi ci" we' azoo: ashug wa ga: jham gye" tang: lho: nheung" ci: abye: go". Akhid" nyangnu" gi Polu ri said pyam wa shid re" nyheung. Soin' to" wigi re" da" dang: riza: dalang" nyid lo: ago"? ga: tid kyo". 22 Gyizoug: moo" gi Nang ngoo ri hidsu" re" tid kyo" da" khyoo: ri gooji, hang" ri we' atid kyoo"? ga: tid lho: hau: zoolu: zoo: ri zung" nhang: kaid.

23 Hau: thang: ri gyizoug: moo" gi nya: gyizoug: eig yug ri khe, Yu wigi Kesare voogung khyoo: yhi: wa shid re" gyizoo: eig shoo: myang: dab gyizoo: nyhed' xi:- lham: dab gyizoo: eig shoo: yug akhid" myen" goug: nayi: ri too wa shid re" soin' jen" too" ge'. 24 Hau: lho: Polu zhung: wa da" myang: we' nyheung byid: wigi mung" zoug: phoo' Philib jhang moo ju" sho' goemloem za: yhe: de" kaid ge? ga: tid kaid. 25 Houg: lang" gyizoug: moo" gi hid: su" ga: da" mougsoug" dakhyab, ri lhid" lho: wigi foin: kaid. 26 Phau" myang: da" mung" zoug: Philib, ri kalodi Lusi: gi vhu" kaid. 27 Yuda byumyu" yi gi byu he: yug ri myheug yu lho: said pyam wa ga: mo" nyid ago"- Nyang: gi Roma mungdain byu nghoid ga: ziri ngoo si' yoomo ngoo gi nga" gyizoo: yi yo' yhe: wigi nyang: ri yhe: khyoid yu too" bye:. 28 Ngoo gi Yuda byu yi nyang: ri ce: noem yooboo foin: da" khyoo: ri si' noug yoomo nyang: ri Yuda tarha" yab, do' khyoo: shu" yhi: bye:. 29 Nyang: ri yooboo foin: da" khyoo: gi nyangnu" da" tarha" yo' sen: lho: wigi yooboo foin: zi nghoid yoomo nyang: gi shid: moin: da" yooboo anghoid lang" gi thung: lhoung, kaid wa da" yooboo- nyang: gi ce: noem daja: we' ashoid da" khyoo: ri ngoo myang bye:. 30 Houg: yoomo nyang: ri said pyam wa shid re" phajhi" gau" khyau" nyid boem da" khyoo: ri ngoo ri zheung: tid kyo" boem lang" nyang: ri re" jhang khyoo: de" kaid wa ziri ngoo houg: jang: myid phyid bye:. Hau: lho: nyang: ri yooboo foin: bang: ri we' Re" shidkhoin" moo yhe: tid goo" wa shid re" nyangnu" ri ngoo tid kaid bye:- ga: lhid" kaid da. 31 Gyizoo: yi we' gyizoug: mo" amyeung" yo' dakhyoo" ti" koid bye:- nyangnu" gi Polu ri yhe: shu" yu wigi hau: myen, nyang: Antipatri voo gung moo ju" sho' yhe: de" kaid ago". 32 Hau: thang: nyid" ri gyizoo: yi gi gyidab khyoo: doem tau" lo lho: wigi myang dab gyizoo: yi gi Polu yo' dage" yhe: loo" wa shid mo nyhid: too" kho' ago". 33 Hau: myang dab gyizoo: yi gi Polu ri kesare voogung ju" sho' yhe: de" kaid lho: mung" zougpho' da" lo, moo hau: lhid" foin: foid' da" mougsoug" ri we' yhe: byid: wigi Polu ri yhe: ab, byid: pyam ago". 34 Mung" zoug: phoo' gi hau: mougsoug" ri nghab yu" lho: Polu ri kha: mung" mo nghoid lha"? ga: myid: yu". Mung" zoug: phoo' gi Polu ri Kiliki mung" mo nghoid ga: ziri si' lang" 35 Nyang: tid zigi Nang ri yooboo foin: bang: ju" re" loo lang" ngoo gi re" da" moo" ri gyoo: byid: wa ga: tid da. Hau: thang: ri mung" zoug: phoo' gi Herod koid to" da" yhoem: moo" khoug: khyoo:- zung" lhug da" goem, loem gyizoo: yi yo' nyhid: too" wa shid mo, amyeung" byid: kaid.