2
1 Pentikoti bidnyid ju" loo lang" loem" jeing" da"' byu yi dangain'' mo joyoo da loem: moo za: zeung: phoung nyid boem ago".
2 Uglid hau, lo te" da" thui: da ja- mougkhung: khyo" nyeig dain tung" myeung thu lo wigi nyangnu" zhoung: jo, da" yhoem: goin" jang" moo hau: da" thui: byeung" jo, bye:.
3 Hau: thang: ri nyangnu" gi- nge" byo sain" lo" da" myiyham: yo' du, da" zi nyangnu" yug khang" mo" da" tho' moo dab jo, ziri myang ago".
4 Nyangnu" dangain" bang: gi gyeungshang: da" Venyi: byeung" lo wigi Hau: Venyi: wigi yo" tid wa yoemso byid: ziyo' dakhyoo" ti" gootu: myeing" aja: ja: ri tid thu lo boem.
5 Mougmyid tho' moo dajo, da" mungdain loem khang" moo" mo ju" re" boem da- Mangsoo ri gyoug phau" da" Yuda byu yi gi Yerusalem voomoo" moo nyid nyid ago".
6 Hid: yhang: ti" myeung da" thui: ri zheung: shoug" gyoo: lang" mungbyu yi zeung: foem: lo boem ago". Nyangnu" yug khang" moo" gi loem" jeing" mo, tid nyid da" dang: ri nyang: nya myeing" khyo" se' gyo: yu boem yoomo mungbyu yi gi mau" dain nyid boem.
7 Houg: lang" nyangnu" mau" hang" to" boem wigi hidsu" tid nyid mo, gi Galile byu yi anghoid goo la".
8 Houg: ri nyangnu" tid da" dang: ri ngoonu" nyang: myeing" nyang: khyo" se' gyo: yu zigi khasu" nghoid lha".
9 Ngoonu" gi Pathai moug: Media moug: Elam moug: Mesopotemia moug: Yuda moug: Kapadokia moug: Pontu moug: Asia moug:
10 Phyugi Pamphuli moug: Egutu moug: Kureni anam, mo Libya moug: mo ju" ri" mo, nghoid nyid boem.
11 Houg" su: wigi ngoonu" mo dayham" bang: gi Roma mo ju" re" da" Yuda yo' Yuda noku thung" khyoo: phoug lheug lo" da" tungbau byu yi nghoid ago". Hau: lho: ngoonu" mo dayham" gi- Kreti yo' Arabi mung" mo bang boem ago". Nghoid sho loug we' Mangsoo bain zei: bye: da" gyeungshang: moozoo" joem ri shau" gyo: yu" boem zigi khasu" nghoid lha"? ga: tid nyid ago".
12 Nyangnu" dangain" bang: gi mau" hang" to" boem wigi He: zigi ce: noem ga: zi nghoid lha"? ga: nyang: cang" nyang: myed: go" nyid ago".
13 Nghoid sho loug we' dayham" bang: gi hau: loem" jeing" bang: ri He: byu yi gi yhid: yed mo, nghoid boem ago" ga: juang" yi pyam.
14 Houglang" Petru gi- lagyoo: daxe: dayug yo' dage" to' yab, jo, lho: wigi thui: to' kaid lho: mungbyu yi ri tid zigi mangnhung" Yuda byumyu" yi we' Yerusalem voobyu dangain" bang: we- nga" dang: ri tam" gyo: yu" ge- he: khyoo: yo' sen: lho: nanu" ri tid kyoo" ba.
15 He: byu yigi nanu" jho: ziyo' dakhyoo" ti yhid: yed, mo, anghoid. Akhid" nabsoin: goug na: yi: shi" da nghoid.
16 He: khyoo: gi Lapi: Yoela tid kyo" to" ziyo' dakhyoo" ti" nghoid.
17 Mangsoo hid: su" ga: tid- Ngoo gi lo" thang da" bidnyid ri byu yug khang" mo" da" atho' moo- nga" Venyi: foid shoin" byid: wa nghoid- Nyangnu" da" nya: zoomyi: nu" yi: yo' yug gi nu" yi gi Nga" mungdang: ri kho" kyo" lo boem wa zi nghoid. Nyangnu" da" zoolu: yi gi- yoeb myang gi ri myang goo" wa hau: lho: nyangnu" da" mang: zoo: yi gi- yhoeb, mo, myang goo" wa nghoid.
18 Nghoid bye:- hau: da" bidnyid ri Nga" da" deizoo: yug gi myiyi: dangain" mo, da" atho moo nga" Venyi: foid shoin" byid: wa Houg: lang" nyangnu" gi Nga" mungdang: ri tid fu" loo" wa nghoid.
19 Ngoo gi mougkhung: tho' mo- mau" pho" alhoo: again ri koid shug wigi vho: myed jang: gyab moo gi- mau" pho" moozoo" ri koid shug wa houg: moo suid" myi: yo' no, thu: da" myikhoug" ri shau" myang boem wa nghoid.
20 Aseing gyi: sheung: da" phung" yoeb bo bid nyid zeing a ju" ri" shi" ri bid moo" khyab, gi mougcoid bue" lo" wigi lhammoo" gi suid" su" ne, lo" byug wa nghoid.
21 Houg: lang" pang" thoug yu wa shid mo Aseing ri mho' yoid byu hang" nghoid loug we' khyoid yu zi shau" wa ga: tid kyo".
22 ?Israela mangnhung" yi we"- he: da" dang: ri tam" gyo: yu" ge. Nazared voobyu Yesu gi Mangso phung" yoem: vhoo" khyo" nghoid ziri Yesu da" lo, khyo" mau" pho" alhoo: again yo' mau" pho" moozoo" joem ri zei: shug abye:. He: khyoo: gi nanu" nya: da" phung: moo bue" lid lo ziri nanu" nyang: myang se' boem bye:.
23 Mangsoo gi nyang: soin: to" ziyo' dakhyoo" ti" Yesu ri nanu" da" lo, moo ab pyam wa shid re" myid phyid too" su: nyang: nghoid da" lo, moo ab pyam wa shid re" myid phyid too" su: nyang: nghoid bye:. Nanu" gi yooboo yoo" bang: da" lo, yo' pyang" zeing moo nyang: ri baid jen" said pyam nhang: khyo" Yesu ri said pyam boem bye:.
24 Nghoid sho loug we' Mangsoo gi nyang: ri shid: lo" da" yoemso lhoid kaid kho- shid: jangmo doem dei to' loo nhang: bye:. Khasu" wim gari shid: zigi Nyang: ri ayo" zei: lhoug too" nghoid da.
25 Nya: khyoo: yo' sen: lho: David tid to" zigi ?Ngoo gi Aseing ri ayo, khyeing: khang" moo myo, shid ti: moo nyang: shau" myang nyid. Nyang: gi nga" da" anam, moo nyid nyid yoomo ngoo gi yau: khe" khyoo: shau" loo: wa anghoid.
26 Houg: yoomo nga" da" ung: khoug: moo ngeibu: zi byeung" jo, ziyo' Nga" nhoid yhoo: moo gau yi zi byeung" jo. Ngoo gi shid: loo" se' da" byu nghoid loug we' nheug byu lho: nheigloem: myen myen shau" dei nyid wa nghoid.
27 Khasu" wim gari Nang gi ngoo ri- shid: lo" da moovoo, moug: moo she: pyam too" wa zi anghoid. Nang gi loemlug da re" deizoo: ri loeb duang: khoug: moo boeb, pyam nhang: wa zi anghoid ga: tid nyid.
28 Nang gi ngoo ri kangso dei nyid jang: moo ju" lo" da- khyoo: ri toin" shid byid: abye: da. Nang gi ngoo yo' dage" nyid yoomo ngoo ri ngeipyoo: nhang: loo wa nghoid ga: tid.
29 Nga" mangnhung" yi we' subi" fu" yen da" ngoonu" nya: phoug" David khokham da" khyoo: ri Nanu" ri bang bang za: tid kyoo" wa. Nyang: gi shid: lo" lho: nyang: ri myhoeb shoung: pyam abye: go". Nya: da" loeb gi akhid" nyid ju" sho' hid: ngoonu" da" shidkhoin" moo jo, jo.
30 Nyang: gi lapi: nghoid lho: Mangsoo gi nyang: ri dang: soo" khoin" byid: to" ziri nyang: se' da. Mangsoo gi David khokham yo' dakhyoo" ti" khokham koid wa nya: da" akung: mo khokham thu ri" nhang: wa ga: jham tang: to".
31 Doem ju" loo wa da" bidnyid moo Mangsoo gi ce: noem koid loo wa zari- David gi se' too" yoomo Meshia gi shid: jangmo doem dei to'' loo wa da" khyoo: ri David tid zigi nyang: ri moovoo, moug: moo she: pyam to" zi ashoug" nghoid da. Nya: gungdu: ri loeb khoug: moo aboeb loo" nhang: nghoid da- ga: tid to".
32 Mangsoo gi he: da" Yesu ri dei to'' loo nhang: abye:- hougsu" ngoonu" dangain" gi he: khyoo: yo' sen: da" sagsi nghoid bye:.
33 Nyang: gi nya: pho lo, yo shoid moo zhoung: jo, wa shid re" to' yu zi shau" lho: Nya: pho Dang: thang" cab byid: too" bye: ziyo' dakhyoo" ti" Nya: pho' jhang mo gyeungshang: da" Venyi: ri yo" shau" kham: yu bye:. Akhid" nanu" shau" myang ziyo' shau" gyo: nyid khyoo: gi nyang: nga" da" atho' moo foid shoin" byid: da- nya: jeju" jhungshug nghoid bye:.
34 Khasu" wim gari David gi mougkhung: khyoo: ado, loo" nghoid da- Nghoid loug we' David gi
35 Re" gyivoo joem ri Re" da" khyid: nang: da" zhungtang khyo" re" da" khavoo: khoug: khyoo: ngoo akaid byid: byid: gi nga" lo, yo shoid moo dazhoung: jo, we' ga: wigi Hau Aseing gi Nga" Aseing ri tid da- ga: tid.
36 Houg: yoomo nanu" wigi pyang" zeing tho' moo baid jen" said pyam da" hau: Yesu gi Mangso wigi Aseing yo' Meshia khyo" tang: too" bye: ziri Israela byumyu" goin" gyeung" se' yu looge' o"? ga: tid kyo" da.
37 Mung" byu yi hau: dang: ri shoug" gyoo: lang" gi nyangnu" da" nheigloem: moo gyi" sho' gyo: zang" boem yoomo Petru yo' lagyoo: gooji ri mangnhung" yi we' ngoonu" khasu" koid boem wa lha"? ga: myed: boem.
38 Petru gi nyangnu" ri mangnhung" yi dangain" bang: we' nheigloem: thid' ge- nanu" da" yooboo joem ri khyoid pyam byid: zi shau" wa shid re" Yesu Khristu da" myeing mo- nanu" yug khang" moo" babtisma ri kham: yu ge- houg: lang" Mangso jhungshug nghoid da- gyeungshang: Venyi: we' nanu" shau" kham: yu boem wa zi nghoid.
39 Khasu" wim ga: ri- Mangso dang: thang" cab gi nanu" shid mo we' nanu" da" nya: myed: nya: zoo: yi shid mo we' ngoonu" da" Mangsoo Aseing nyang- khe: yu bye: yoomo vi: moo nyid mo, dangain" bang: shid re" we' byid: too" bye:.
40 Houg: lang" Petru gi gootu: dang: khyoo" myoo" sho' yo' nyangnu" ri tid poin" tid kyeing" byid: zoore nanu" gi he: akhyeing" ashoeb da" byu yi tho' moo ju" lo nyid da- yooboo dam mo loid byoin loo: ge- ga: tid poin" da.
41 Nyangnu" myoo" sho mo, gi Petru kho" kyo" da" mungdang: ri loem" jeing" lo boem wigi babtisma zheung: kham boem lho- hau: bidnyid moo loem" jeing" lo da" phung: byu yi soem khyeing"- hau: phung: moo loung: lo ago".
42 Nyangnu" lagyoo: yi da" dang: ri jhau" yu zoore dage" za: bo zoem" khau: nyid boem wigi zooyho' phe' gam go" khyoo: ri koid- dage" za: akyu" shoin" mho' wigi ayo, bidnyid ri lid loo" nhang: nyid ago".
43 Lagyoo: yi khyo" wigi mau" pho" alhoo: again joem myoo" sho' toin" shed boem yoomo byu yug khang" moo" gi gyug dain mau" ci' ago".
44 Loem" jeing" bang: gi dage" za: zoem" khau: nyid boem lho: nyangnu" yo" da" ziyoo joem ri" we' dage" za: coem' gam go" ci: nyid ago".
45 Nyangnu" gi nyang: nya: da" ziyoo ziyoo jonu" joem ri oung" pyam boem lho: wigi hau: ngei zi joem ri kha: yug khamyhoo, ca" nyid khyo" cang wigi- nyang: cang" nyang: coem gam go" ci: boem.
46 Nyangnu" gi nyid" khang" moo" Noku Yhoem: Moo" moo zeung: foem: phoung, nyid lho: nyangnu" da" yhoem: khoug: mo da" zooyho' ri gau yi ziyo' phe' lho- khyo' nyhoem: da" nheigloem: yo' dage" za: shoin" zoo: shoin" shug nyid boem ago".
47 Nyangnu" gi Mangsoo ri coung" nghei nyid zoore byu dangain" bang: da" shidkhoin" moo myonhoo: bo nyid ago". Aseing gi khyoid yu zi shau" bang: ri nyid" khang" moo" nyangnu" phung: moo myo: loung: loo nhang: nyid.