1 Polu yo' Sila eig yug gi Ampipholi yo' Apoloni voogung ri so" lid, lo" wigi Thesaloni voogung khyoo: ju" yhe: lo" ago". Hau: voogung moo Yuda tarha" jung daloem: jo. 2 Polu gi nyang: khanham we' lhoung, koid ziyo' dakhyoo" ti- Yuda tarha" jung khyoo: yhe: lo"- Houg: moo labain' nyid" ri jhoem: mungdang: yo' cang lho: mungbyu yi yo' doem go" nyid. 3 Meshia gi dayam, dayoo: kham zoo: ca" wa ziyo' shid: jangmo doem dei to'' loo wa"- ga: da" khyoo: joem ri jhoem: mougsoug" moo toin" shid lho: nyangnu" ri tid phid: kyo" nyid. Polu gi nyangnu" ri hid: ngoo tid kyo" nyid da- Yesu gi Meshia nyang: nghoid bye: ga: tid kyo". 4 Nyangnu" mo dayham" gi loem" jeing" lo boem wigi Polu yo' Sila shoid khyoo: bo dab ago". 5 Nghoid loug we' Yuda byu yi gi myed, zheung: noug: yoomo fu" moo" khyoo: cang nyid yen" da" byugang: yi ri khe: zheung" yu lho: byu phung: daloem: koid yu boem ago". Nyangnu" gi davoo, goin" ziri lhu: nhau" zhuang" to' kaid boem lho: wigi Yasun ga: su: yhoem: khyoo: sarhi' yhe: zheung: koid wigi Polu yo' Sila eig yug ri mungbyu yi da" shidkhoin" moo she: khyoid thu' yu wa shid re" yhe: pue: ago". 6 Nyangnu" gi azheung: shau" sho: myang lang" nyangnu" gi Yasun yo' loem" jeing" bang: dayham" ri hau: voogung mo amyeung" ci: mo, shid moo she: khyoid re" lho:"

Hid: bang: gi joyoo khyi khang" moo" moo yau: khe" da" khyoo: ri ze" bue byid: loo mo, nghoid ago'- akhid" ngoonu" da" voogung moo we' ju" lo boem abye: go"-,, Yasun we' nya: yhoem: moo he: eig yug ri lhoem: kham: yu to" da" ga: zheung: tid kyo". 7 Nyangnu" gi Yesu ga: da" khokham dayug nyid ga: zheung: tid wigi Khosen" da" tarha" joem ri shoid rue" nyid mo, nghoid ago"- ga: zheung: nyho: boem. 8 He: da" dang: ri shau" gyo: boem lang" mungbyu yi yo' voogung mo amyeung" akhang" ci: bang: gi gye" lu: fu: go" lo boem bye:. 9 Amyeung" ci: bang: gi Yesu yo' gooji bang: ri Kookham: ngei khyoug" nhang: lho: nyangnu" ri nhang: kaid ago".

10 Mougcoid loo yo'- loem" jeing" bang: gi Polu yo' Sila eig yug ri Beria voogung khyoo: nhang: kaid ago". Hau: voogung moo zheung: ju" yhi: lang" nya: eig yug gi Yuda yi da" tarha" jung khyoo: yhe: lo". 11 Beria voobyu yi gi Thesaloni voobyu yi da" tho' re- khoin: lheung: mo, nghoid boem. Nyangnu" gi mungdang: ri nheigloem: jhug jhug za: tam" gyo: yu boem wigi Polu kho" kyo" da" mungdang: gi deung adeung ziri si' wa shid re" nyid" khang" moo" jhoem: mougsoug" ri nghab xoin: se' nyid ago". 12 Nyangnu" mo myoo" sho' mo, gi loem" jeing" lo boem bye:- byunyid azhang myhang: bye: da" Greek myiyi: yi myoo" sho' mo, yo' Greek yuggi yi myoo" sho' bang: we' loem" jeing" lo boem ago". 13 Nghoid loug we' Polu gi Beria voogung moo we' Mangso mungdang: ri tid kyo" nyid ga: da" ludang: ri Thesaloni voogung: mo Yuda byumyu" yi shau" gyo: boem wigi nyangnu" gi Beria voo khyoo: zheung: ju" re" lho: mungbyu yi ri lu: fu: loo wa shid re" re" pue: boem ago". 14 Loem" jeing" bang: gi houg: lang" jang- Polu ri panglai: gyid yam, moo ju" sho' yhe: de" kaid boem ago". Nghoid loug we' Sila yo' Timothi eig yug gi Beria voogung moo theung: nyid shi" ago". 15 Polu ri yhe: de" kaid khoo mo, gi Athen voo moo ju" sho' Polu yo" dage" zheung: cang yhe: wigi Sila yo' Timothi eig yug ri ge bue" yhi' myab, khyo" nya: jhang moo cang ri nhang: ge' ga: Polu pyeing: kaid da" dang: ri voin lho: Beria voo khyoo: doem tau" lo ago".

16 Polu gi Athen voogung moo Sila yo' Timothi ri lang" nyid da" uri nyang: gi hau: voogung moo yu phara" soolhoo: za: byeung" jo, ziri myang wigi nya: nheigloem: gye" apyoo: loo. 17 Houg: yoomo Polu gi tarha" jung moo Yuda byumyu" yi yo' Mangsoo ri noku da" tungbau byumyu" yi yo' we' Shava kid vang" cang so" lid, yen" da" mungbyu dangain" mo, ri we' nyid" khang" moo" tid sham: go" nyid. 18 Epikuri yo: Ati- yi nheigloem: phajhi" sara: yi dayham" we' Polu yo' gye" tid ngeug go" nyid boem. Nyangnu" mo dayham" gi He: ci: ase' da" koopyoid' khyoid gi ce" noem ri tid nau nyid lha"? ga: tid boem lho: gootu: dayham" bang: gi goo tu: byumyu" yi da" yu phara" khyoo: tid nyid sam" ga: tid go" nyid boem. Nyangnu" hidsu" tid nyid boem zigi Yesu khyoo: yo' nyang: doem dei to'' lo da" khyoo: ri Polu kho" kyo" nyid yoomo nghoid. 19 Houg: yoomo nyangnu" gi Aripagu boug voogung da" kongsi: yung" shid moo Polu ri shu" do, yhe: lho: ?Nang tid kyo" nyid da" he: jhau" byid: khyoo: aseig yo' sen: lho: ngoonu" si' nau. 20 Nang jhau" byid: da" khyoo: dayham" gi ngoonu" gyo: ri gye" gyo: mau"- Hau: da" dangkang: joem ri ngoonu" si' nau? ga: tid boem ago". 21 (Khasu" wim gari Athen voobyu yi yo' houg: moo zeung: nyid da" tungbau byumyu" yi gi lo" thang da" ludang: aseig khyoo: ri tid kyo" gyo: yu khyo" nyangnu" da" ayo, joem bain sho' ri lhid: kaid nyid boem ago". 22 Polu gi voogung kongsi: yung" mo byu yi da" shidkhoin" moo yab, jo, lho: wigi Athen voobyu yi we"- nanu" gi noku thung" ri gye" kang: lung' bu mo, nghoid da" khyoo: ri khyoo: khaid' gu: khang" moo" ri yu" lho: ngoo si' bye:. 23 Khasu" wim gari ngoo nanu" da" voogung khoug: moo so" yen" ri nanu" da" coung" pid joyoo joem ri cang yu" yen" ri" ?Ngoonu" ase' da" Mangso shid mo, ga: lhid" tab to" da" phoin: daloem: ri ngoo myang. Hau: nanu" asi looza: noku nyid da" Mangso khyoo: ri akhid" ngoo tid khyo" nyid zi nghoid. 24 Mougmyid yo' houg: moo nyid ja:- jo moo jo, ri phain" to" da" Mangsoo gi Mougkhung: yo' myed jang: da" Aseing nghoid wigi byu yi, lo, yo' koid to" da" Noku Yhoem: Moo" moo anyid nghoid da. 25 Hau: Aseing nyang: byu yug khang" moo" ri kangso yo' so' shi: nhang: ziyo' ca" nyid da" zi dangain" ri byid: too" su: nyang: nghoid yoomo ngoonu" gi nyang: ri daja: ja: koid byid: aca". 26 Mangsoo gi xangsu: byu dayug ri shi" phain" to" lho: hau: yug mo, byumyu" acang: joeb, sho' nyid thu' loo nhang: wigi mougmyid gyab, goin" jang" moo byeung" loo" nhang: bye:. Nyangnu" nyid wa shid mo ayo, akhyeing: zain nyid yo' joyoo jo, lang:- moug: kyoo" joem ri gu: shid khyau" lho: kyoo" so" too" byid: bye:. 27 Mangsoo hidsu" koid to" zigi ngoonu" nyang: ri sho: lho: Nyang: ri soeb, sho: yen" ri myang ri myang boem abe- ga: koid zi nghoid. 28 Nghoid loug we' Mangsoo gi ngoonu" hang" yo" we" ve: nyid zi anghoid. Byu dayug tid ziyo' dakhyoo" ti" ngoonu" gi nyang: moo kangso dei nyid lho: so" yen" do: yen" boem. Nanu" da" dang: zhoem, sayen" yi lhoung, tid ziyo' dakhyoo" ti" ngoonu" we' nya: zoo: du yi nghoid- ga: dang: zhoem, tid to". 29 Ngoonu" gi Mangso zoo: du yi nghoid boem yoomo Mangsoo gi byu da" lo, moo" phajhi" khyo" koid to" da- ngei sheing: soolhoo- lugboem soolhoo: yo' du ein: age jhoo: nghoid da. 30 Mangsoo gi xangsu: byu yi nyang: ri asi loo: nyid lid: lo da" ayo, akhyeing: ri yu" lhid: kaid bye:- nghoid loug we' akhid" gi khyi khang" moo" mo xangsu: byu dangain" ri nyangnu" da" akhyeing" ashoeb da" moozoo" dangain" jangmo nheigloem: thid lheung: loo wa shid re" amyeung" byid: kaid bye:. 31 Khasu" wim gari nyang: khyen: yu too" su: da" lo, khyo" wigi nyang: gi mougmyid gyab, goin" ziri dain: nyeung, khyo" tarha" dang: phyed wa da" bidnyid' ri mhe' phyed to" abye:. He: khyoo: yo' sen: lho: yug khang" moo" ri sagsi toin" shid wa shid re" hau: yug ri shid: jangmo doem dei to' loo nhang: bye:. 32 Nyangnu" gi shid: jangmo doem dei to' lo da" khyoo: yo' sen: lho: Polu tid ziri shoug" gyoo: lang" nyangnu" dayham" bang: gi Polu tid da" dang: ri juang" yi pyam byid: boem. Nghoid loug we' dayham" bang: gi he: khyoo: yo' sen: lho: ?Nang tid ziri ngoonu" doem gyo: boem shi" wa? ga: tid ago". 33 Houg: yoomo Polu gi hau: phung: mo thu' lo" da. 34 Byu dayham" gi Polu da" thang: cang wigi Yesu ri loem" jeing" lo boem ago". Houg: bang: mo Dionusi ga: da" Aripagu kongsi: phung: moo bo da" tarha" agyi Damari ga: da" myiyi: dayug we' bo da- mungbyu yi dayham" bang: we' bo da.