1 Polu gi Debe yo' Lustra voogung khyoo: yhe: lo- Lustra voogung moo Timothi ga: da" Khristain phung: byu dayug nyid nyid. Nya: myhi' gi Yuda byumyu" Khristain nghoid wigi Greek byumyu" nghoid. 2 Tomothi gi Lustra voo bang: yo' Ikoni voogung moo nyid da" loem" jeing" mo, dangain" bang- coem, coung" byid: nyid su: nghoid. 3 Polu gi Timothi ri nyang: yo' dage" shu" yen" noug yoomo nyang: ri shooyid thang: yham" da" thung" koid byid: khasu" wim gari nya: phoo' gi Greek byumyu" nghoid ziri hau: gyoo: mo mo, si' byid: boem yoomo Polu gi hougsu" koid byid: khyo" nghoid. 4 Nyangnu" gi voogung joem cang lid: jang: lo" boem wigi Yerusalem voomoo" moo nyid da" lagyoo: yi yo' phung sayen" yi wigi yoem: byid: to" da" loem" jeing" bang- phau" cang loo" wa da" tarha" nyangnu" ri byid: wigi hau: tarha" joem ri phau" cang loo" ca" da" khyoo: ri jhau" byid: ago". 5 Houg: yoomo phung: byu yi gi- hau: loem" jeing" khyoo: moo je" geingteing lo wigi nyid" khang" moo" phung: byu je" myo: loung: lo nyid ago".

6 Houg: lang" gyeungshang: da" Venyi: gi nyangnu" ri Asha mung" gyoo: moo mungdang: ri kho" kyoo" wa akhang" abyid: yoomo nyangnu" gi Phrugi mung" yo' Galile mung" gyoo: khyo" so" lid lo. 7 Nyangnu" gi Musi mung" moug: kyoo" moo ju" yhe: loo" lang" gi Nyangnu" gi Bithuni mung" khyoo: yhi: wa ga: soin' ago". Nghoid loug we' Yesu da" Venyi: gi nyangnu" ri akhang" abyid: nghoid da. 8 Houg: yoomo nyangnu" gi Musi mung" ri lid: yhe: lo" lho: Troa voogung moo ju" yhe: lo" boem bye:. 9 Polu gi myen" ri yoeb, myang myang jang" moo Makedoni byu dayug gi yab, jo, lho: Makedoni mung" khyoo: gu: re" lho: nyangnu" ri re" khyoid yu we' ga: mho' nyid ziri myang. 10 Polu gi he: da" yoeb, myang ri bain myang lang" nyangnu" gi Makedoni mung" khyoo: yhe: loo" wa shid re" soin' nyheung boem bye:. Khasu" wim gari Makedoni mung" moo nyid, mo, ri ludang: seig kho" kyoo" byid: wa shid re" Mangsoo gi ngoonu" ri khe: yu zi nghoid bye" ein: ngoonu" myed jhoo: yoomo nghoid.

11 Hougsu" wigi ngoonu" gi lhid khyo" wigi Troa mo zi Samothrake gagyoo: kang khyo" dain: za: gu: phyed yhe: lo" wigi thang: nyid rigi Neapoli voogung moo ju" yhe: lo" boem bye:.

12 Ngoonu" gi hau: voogung wigi Roma seing vhoeb zi we' nghoid da" Makedoni mung" moo myoo" sho' nyid" yhe: theung: nyid boem. 13 Dougno: Bidnyid ri ngoonu" gi Yuda byumyu" yi zeung: foem: lho: akyu" mho' da" joyoo jo, wa ein: jhoo: yoomo voogung nghe: shoid, gyid yam, khyoo: thu' yhe: lo" wigi yhe: zhoung: jo, ri houg: moo zeung: foem: re" da" myiyi: yi ri kho" kyoo" byid: boem bye:. 14 Houg: bang: da" phung: mo Thuatira voogung mo pain" mi, phaga: koid da" Ludi ga: da" myiyi: we' dayug bo. Nyang: gi Mangsoo ri coung" pid noku da" myiyi: dayug nghoid wigi Polu kho" kyo" nyid da" mungdang: ri nheigloem: jhug jhug za: tam" gyo: yu wa shid re" aseing: gi nya: nheigloem: khoem" duang: ri phang byid:. 15 Nyang: yo' nya: yhoem: byu yi gi babtisma bain kham: yu thang: ri Ludi tid zigi ?Ngoo gi Aseing ri gi" gi nyang: loem" jeing" zi nghoid bye: ein: nanu" myed loem bye: nghoid rigi nga" yhoem: moo re" theung: ge'? ga: ngoonu" ri lhoung: da. Houg: su" khyo" nyang: gi ngoonu" ri agyoo: atho' shu" yu da.

16 Bidnyid danyid" moo ngoonu" gi hau: akyu" mho' joyoo khyoo: yhe: lo" nyid boem da" uri akhyeung" yu vang ci: da" goem, phain" se' phain" da" join' myhi' dayug yo' ngoonu" shau" go". Nyang: gi goem, phain" phain" lho: wigi join' seing: ri ngei myoo" sho' kung: byid: nyid su: nghoid. 17 Nyang: gi Polu yo' ngoonu" da" thang: moo cang lho: hid: bang: gi myhang: thang da" Mangso deizoo: yi nghoid ago"- nyangnu" gi ngoonu" khyoid yu da" khyoo: khasu" shau" wa da" khyoo: ri tid fu" yen" mo, nghoid da- ga: wigi nyho: tid nyid. 18 Hau: myiyi: nu" gi hougsu" myoo" sho' nyid" nyho: nyid yoomo Polu gi nheig gye" yoo: nau, lo wigi lheung: lo lho: Yesu Khristu da" myeing ri lang: wigi ngoo nang ri amyeung" byid: ba- nya: khoug: mo phang: thu' loo" we' ga: hau: akhyeung" da" yu ri tid kaid. Houg: lang" jang: hau: akhyeung" da": yu gi myiyi: nu" akhoug: mo, phang: thu' lo" byug bye:. 19 Hau: myiyi: nu" da" join seing: gi nyang: ngei yo" nyid da" khyoo: jed" byug ziri si' lang" nyangnu" gi Polu yo' Sila eig yug ri myheug yu lho: kid" vang" moo zeung: foem: nyid da" amyeung" yoo" mo, jhang khyoo: she: khyoid yhe: lo" boem ago". 20 Nyangnu" gi nya: eig yug ri Roma zoug: yi da" shid moo shu" vang yhe: lo" lho: ?He: eig yug gi Yuda byumyu" zheung: nghoid lho: wigi nya: eig yug gi ngoonu" da" byumyu" yi ri ayoug: akhi" bui" nhang: nyid ago". 21 Ngoonu" da" tarha" yo' adu go" da" thung" ri: ri nya: eig yug gi jhau" byid: nyid ago". Ngoonu" gi Roma byumyu" yi nghoid yoomo he: da" thung" ri: rigi ayo" lhoem: yu- ayo" phau" cang? ga: tid ago". 22 Houg: lang" mungbyu yi we' houg: bang: thang: bo dab lho: Polu yo' Sila eig yug ri gyi bo koid lho: sarhi' koid ago". Houg: yoomo zoug: yi gi Polu yo' Sila eig yug ri byimi, lang" ceug pyam byid: lho: gyoem, thoung" wigi baid wa da" amyeung" byid: kaid ago". 23 Hougsu" nya: eig yug ri dam xoo" sho' bain baid yu thang: ri thung: khoug: moo yhe: lhoung, to" boem bye:. Nya: eig yug ri teung" teing myheug lhoung, too" wa shid re" nyangnu" da" thung: agyi, phoo' ri amyeung" khyo to" ago". 24 Thung: agyi phoo' gi hau: da" amyeung" ri yo" yu ci: lang" nya: eig yug ri thung: yhoem: akhau: yab, khyoo: kaid lho: khyid: moo we' kyoem" xang' lho: lhoung to". 25 Gam, gung myen: koo: moo gi Polu yo' Sila eig yug gi Akyu" mho' lho: Mangsoo ri coung" nghei jikhoin" ri khoin" nyid ago". Thung: byu gooji yi gi hau: ziri tam" gyo: lho: nyid boem. 26 Hau: uri nyeigdain tung"- myid leig gyi" sho' leug, lo wigi thung: yhoem: apoem: we' dei, ga: nain" lo. Houg: lang" jang: khoem" duang: joem gi dangain" bang" loo" khare" wigi thung: byu yi dangain" bang: da" jang coo" doem joem gi gyoid, gyo" lo" byug boem bye:. 27 Thung: agyi phoo' gi yhoeb' jo, jangmo so" re" lho: thung: yhoem: mo khoem" duang: joem dangain" bang" jo, ziri to' myang lang" nyang: gi thung: byu yi dangain" phang: thu' loo" wam bye: ga: myid wigi nya: sham: coin" ri she: yu lho: nya: gung nyang: thau" shid: wa ga: soin' loo" bye:. 28 Nghoid loug we' Polu gi nya: thui: ri yoem: bain sho' yo' ?Nanya: gung ri ci" we' akoid'- ngoonu" dangain" mo, hid: moo danyid nyid boem? ga: nyho: kaid. 29 Thung: agyi phoo' gi myidoem mho' yu lho: gei, vang re" wigi Polu yo' Sila eig yug da" khyid: yang: moo ko' ko' nain" zi re" goeb pid to". 30 Hau: thang: ri nyang: gi nya: eig yug ri tung' gung khyoo: shu" thu' lo" lho: nheig bo eig yug we"- ngoo khyoid yu zi shau" sho' khasu" koid wa lha"? ga: myid: yu". 31 Nya: eig yug gi Aseing Yesu ri loem" jeing" we' houg: lang" nang yo' re" da" yheom: khau: byu yi khyoid yu zi shau" wa nghoid- ga: phoug tu". 32 Hau: thang: ri nya: eig yug gi nyang: yo' nya: yhoem: byu dangain" mo, ri Aseing da" mungdang: kho" kyoo" byid: ago". 33 Hau: myen, nyang: thung: agyi phoo' gi nya: eig yug ri shu" yu lho: nya: eig yug da" dam noo joem ri cid" shang pyam byid:. Nyang: yo' nya: da" yhoem: byu yi dangain" mo, gi houg: lang" jang: babtisma ri zheung: kham: yu boem bye:. 34 Hau: thang: ri nyang: gi Polu yo' Sila eig yug ri nya: yhoem: khyoo: shu" lo" wigi zoo: noem we' doo" zhoo" bye:. Thung: agyi phoo' yo' nya: yhoem: byu yi gi Mangsoo ri shau" loem" jeing" lo boem bye: yoomo gye" nyang: ngeibu: gau yi nyid boem bye:. 35 Thang: nyid nab, kyoo ri Roma amyeung" ci: mo, gi pyada: zoug: ri hau: eig yug ri lhoid, kaid ge' ga: da" amyeung" yo' dage" nhang: kaid bye:. 36 Hougsu" wigi hau: thung: agyi, phoo' gi Polu yo' Sila eig yug ri zoug: yigi ?Nang yo' Sila ri nhang: kaid wa da" amyeung" khyo' kaid abye: go"- Houg: yoomo re" eig yug ngeipyoo: tung" za: loo" loo: ge'? ga: tid kaid da. 37 Nghoid loug we' Polu gi hau: da" pyada: zoug: yi ri nga" eig yug gi Roma mungbyu nghoid- nyangnu" gi nga" eig" yug ri ce" yooboo we' amyang zi mungbyu yi da" shidkhoin" moo gyoem, thoung" wigi baid lho: thung: moo lhoung, kaid boem, hau: lho: akhid" nghoid lang" yen, gi nga" eig yug ri sam" zoo: nhang: kaid noug goonhung: lha". Khasu" se' gi wa Roma zoug: yi nyang: hid: khyoo: re" wigi nga" eig yug ri re" khe: thu' yu goo" baja"- ga: tid da. 38 Pyada: zoug: yigi hau: dang: ri Roma zoug: yiri lo" tid kyo" ago". Nyangnu" gi Polu yo' Sila eig yug gi Roma mungbyu zheung: nghoid ziri shoug" gyoo: lang" gi gyo: gyoug nyid boem ago". 39 Houg: lang" nyangnu" gi yhe: lho: Polu yo' Sila eig yug ri zheung: mho' sang:: ago". Hau: thang: ri nyangnu" gi nya: eig yug ri thung: khoug: mo yhe: shu" thu' yu lho: hau: voogung mo thu' loo" wa shid re" nya: eig yug ri mho' ago". 40 Polu yo' Sila eig yug gi thung: yhoem: mo thu' lo" lho: Ludi da" yhoem: khyoo: zheung: yhe: lo" ago". Houg: moo loem" jeing" bang: yo' zheung: shau" go" wigi nyangnu" ri yoem: byid: dang: ri bain tid lang" nya: eig yug gi hau: voogung mo doem thu' lo" ago".