13
1 Antioki voo mo da" phung khoug: moo lapi: yi dayham" yo' sara: yi dayham" bang: bo ago". Houg: bang: gi Barnaba da" mang: no, ga: da" Simun- Kureni byu Luki mung" zoug: phoo' Herod yo' dage" nyid gyi: lo da- Manaen yo' Sholu nghoid ago".
2 Nyangnu" gi Aseing ri noku loemkhau: wigi zoo: noem ri jang" pyam lho: nyid boem uri gyeungshang: da" Venyi: gi nyangnu" ri tid zigi Barnaba yo' Sholu eig yug ri nga" moozoo" voin vu, wa shid re" gootu: khyen: nyheung too" ge'- ga: tid.
3 Houglang" nyangnu" gi zoo: noem jang" lho: akyu" mho' nyid wigi nya: eig yug tho' moo nyangnu" lo, ki" byid: wigi moozoo" ri voin vu, wa shid mo nya: eig yug ri nhang: kaid ago".
4 Houg: su" gyeungshang: da" Venyi: wigi nhang: kaid ziyo' dakhyoo" ti" Barnaba yo' Sholu eig yug gi Seluki voo khyoo: yhe: lo" wigi hau: voo mo zi Kupru, gagyoo: kang khyoo: lhid yo' gu: yhe: lo" ago".
5 Nya: eig yug gi Salami voo moo ju" loo" lang" tarha" jung moo Mangso mungdang: ri kho" kyo" ago". Nya: eig yug ri bo pang" thoug wa shid mo Yohan Marku ri we' bo shu" yhe: ago".
6 Nya: eig yug gi gu gyoo: kang: khyo" gu: lid lo" wigi Paphu voogung moo ju" yhe: lo" ago". Hau: voogung moo Yuda byu lapi: pyeug nghoid lho: wigi goem, phain" phain" zo: nyid su- Bara: Yesu ga: da" byu dayug ri shau" myang.
7 Nyang: gi hau: gu gyoo: kang: mung" mo zoug: phoo'- Segi Polu ga: su: da" byen, cang" phoo' nghoid. Mung" zoug: phoo' gi nheigloem: soozoo: lheung: su: nghoid. Houg: yoomo zoug: phoo' gi Mangso mungdang: ri tam" gyoo: noug yoomo Barnaba yo' Sholu eig yug ri nya: shidkhoin" khyoo: khe: fang yu.
8 Nghoid loug, we' Greek myeing" khyo" Eluma ga: da" goem, phain" phoo' gi Yesu khyoo: ri mung" zoug: phoo' alhoem: vhoo: wa shid re" Barnaba yo' Sholu eig yug ri lhoem: ngeug toem pyam.
9 Houg: yoomo Polu ga: da" Sholu gi gyeungshang: Venyi: yo' byeung" wigi nyang: gi goem, phain" phoo' ri dain: dain: za: yu" zhoug to" lho:
10 Satan yu da" nya: zoo: we"- nang gi deingmain" ziyo' ge da" khyoo: dangain" da" gyivoo- akhyeing" ashoeb mhau' fain" vo khyoo: yo' to' za: byeung" jo, da" byu nghoid da- nang gi khanham we" Aseing da" deingmain" khyoo: ri mhau' fain" vo, dang: bui" sho' koid su: nghoid.
11 Akhid" nyang: Mangso da" lo, gi re" da" atho' moo ju" re" wigi re" myo, jed loo" khari" wim bye:- nang dayo, koo: bidbang ri ashau" myang loo wa- ga: tid. Houg: lang" jang: Eluma gi myo, jed lo" wigi dayug gi nya: lo, mo she: yu baja" ga: soeb, sho: yen" bye:.
12 Mung" zoug: phoo' gi houg: su" bue" ziri myang lang" gi Yesu ri loem" jeing" loo bye:. Khasu" wim gari Aseing khyoo: yo' sen: lho: jhau" byid: khyoo: ri nyang: gi xoo" sho' mau" nyid bye:.
13 Polu yo' nya: byencang" yi gi Paphu voogung mo lhid zhoung: lho: Pamphuli mung" mo Perga voogung khyoo: ju" yhe: lo" ago". Yohan Marku gi hau: voogung moo nyangnu" ri too" kho' wigi Yerusalem voomoo" khyoo: doem tau" loo" bye:.
14 Nyangnu" gi Perga khyoo: xo' yhe: lo" wigi Pesidi mung" mo Antiki voogung khyoo: ju" yhe: lo" ago". Nyangnu" gi Dougno: Bidnyid moo Yuda tarha jung yhoem: khoug: khyoo: vang yhe: lho: zhoung: jo, ago".
15 Moshe tarha" yo' lapi: yi da" mungdang: ri bain nghab lang" tarha" jung mo da" agyi yi gi mangnhung" yi we"- mungbyu yi ri yoem: byid: wa da" mungdang- nanu" yo" boem nghoid rigi re" tid kyoo" ge"- ga: byu nhang: kaid lho: tid nhang.
16 Houg: lang" Polu gi to yab, lo, tu, lho: tid zigi
Israela byumyu" yi we' hid: moo nyid da" Mangsoo ri coung" nghei tungbau byumyu" yi we' tam" gyo: yu" ge'.
17 Israela byumyu" yi da" Mangsoo gi ngoonu" da" phoug" phyid" yi ri khyen: yu lho: Egutu mung" mo nyangnu" da" being" voo khyo" nyid nyid da" ayo, moo byumyu" yi bue" loo nhang: bye:. Mangsoo gi nya: yoem: zeing: so' moo" yo' nyangnu" ri Egutu mung" mo shu" thu' lo wigi
18 Dain" pyoid yoo moo myed: xi zain' loem: loem- Mangsoo gi nyangnu" tho' moo zeung: kham byid: nyid.
19 Nyang: gi Khanan mung" moo nyid da" byu nyhed' myu" ri phyo' shoin pyam lho: wigi hau: mungdain rigi nya: byumyu" yi ri seing: nhang: bye:.
20 Hid: su" bui" sho' gi zain nyid 450 zain koo: myang" bye:-
Hidsu" bain bue" thang: ri Mangsoo gi Lapi: Samuela pyaid ju" sho' nyangnu" ri tarha" agyi joem byid: too" bye:.
21 Hau: thang: ri nyangnu" gi Khokham" mho' boem lang" gi Mangsoo gi Benyamin amyu akung: ako' mo Kesha da" nya: zoo: Sholu ri nyheung' byid: bye:. Sholu gi nyangnu" da" khokham 40 zain' ju" sho' koid byid: bye:.
22 Hau: thang: ri Mangsoo gi Sholu ri khyo pyam lho: David ri nyangnu" da" khokham doem koid nhang: bye:- Mangsoo gi David yo' sen: lho: wigi Yese nya: zoo: David gi Ngoo vhoo: su- Ngoo zei: nhang: da" moozoo" dangain" ziri zei: wa nghoid ziri ngoo myang bye:- ga: tid.
23 Mangsoo gi nyang: dang: soo byid: to" ziyo' dakhyoo" ti" David nya: myed: nya: zoo: yi mo nghoid da- Yesu ri Israela byumyu" yi da" khyoid yu Aseing bue" loo nhang: bye:.
24 Yesu gi nya: moozoo" ri azei: shed" loo" shi" mo nyang: Yohan gi Israela byumyu" dangain" mo, ri nyangnu" da" yooboo joem mo nheigloem: thid lo lho: babtisma kham: yu boem wa shid mo, kho" kyoo" byid: bye:.
25 Houg: yoomo Yohan gi nyang: ri zei: nhang: to" da" moozoo" mo bain zei: lo" nyid lang" gi mung" byu yi ri ngoo ri hang" nghoid ein: jho: nyid go" lho? Ngoo gi houg: nanu" lang" nyid su: anghoid. Nyang: gi nga" thang: moo ju" ri" zi nghoid- ngoo gi nya: da" khyid: mo khyidbaid ri khyoid byid: wa zilang"- amoin: yi" nghoid da" ga: tid.
26 Abraham da" myed: zoo: yi nghoid da- nga" byen, cang" Israela byumyu" yi we"- he: da" khyoid yu mungdang: ri Mangsoo gi ngoonu" jhang khyoo: foin byid: kaid abye:.
27 Yerusalem voomoo" moo nyid mo, yo' nyangnu" da" vhujhung: yi gi Yesu gi khyoid yu Aseing nghoid ziri ase' boem- Dougno: Bidnyid khang" moo" nyangnu" nghab da" lapi: yi da" jhoem: dang: joem ri we' nyangnu" gi ase' gyoo: nghoid ago"- Nghoid loug we' nyangnu" gi Yesu ri dang: phyed byid: khyo" lapi: yi da" jhoem: dang: ri joeb byeung" loo nhang: mo, nghoid boem ago".
28 Nyangnu" gi nyang: ri shid: wa da" yooboo dam kaid wa zi ci" we' amyang to" boem nghoid loug we' nyang: ri said pyam wa shid mo nyangnu" gi Pilaid' zoug: phoo' ri damho, nyid ago".
29 Nyangnu" gi nyang: yo' sen: lho: jhoem: mougsoug" moo bo ziyo' dakhyoo" ti" dangain" nyang: ri bain koid lang" gi nyang: gi nyang: ri pyang" zeing tho' mo phoid: khyo yu lho: loeb, daloem: akhoug: moo yhe: kaid to" ago".
30 Nghoid loug we' Mangsoo gi Nyang: ri shid: jangmo doem dei, to' loo nhang: wigi
31 Galile mung" mo Yerusalem voomoo" khyoo: nyang: yo' dage" yhe: lo" nyid mo, ri bidnyid myang" sho' nyid" nyid, shug yen" da- nyangnu" gi akhid" Israela yi ri sagsi kham byid: nyid mo, nghoid ago". Houg: bang: gi sagsi nghoid nyid.
32 Coung" nghei jikhoin" mougsoug" abeing: eig loem: moo
Nang gi nga" zoo: nghoid-
Akhid" nyid" ngoo nang ri khu: kaid da"
Re" phoo' nghoid? ga: tid to".
33 Houg: yo' dakhyoo" ti" Mangsoo gi Yesu ri dei, to loo" nhang: khyo" ngoonu" da" phoug" phyid" yi ri byid: to" da" dang: thang" cab gi nyangnu" da" myed: zoo: yi nghoid mo, ngoonu" moo zei: pyeung byid: abye:. Houg: yoomo ngoonu" gi he: da" ludang: gi ri nanu" ri tid kyoo" wa shid mo he: joyoo moo ju" re" zi nghoid.
34 Nyang: gi khanham we' ashid: loo: wa ga: yoomo nyang: ri shid: jangmo doem dei to' loo nhang: ziyo' sen: lho: wigi Mangsoo gi Ngoo David ri byid: wa ein: da" dang: thang" cab ri byid: too" bye:.
35 Gootu: da" coung" nghei ji: dakhoin" moo we' ?Nang gi loem" jeung" da" re" dei, zoo: ri loeb, khoug: moo boeb, lo" byug nhang: wa zi anghoid? ga: tid to".
36 David gi nyang: dei nyid da" bidnyid gu: moo Mangsoo myed soin' to" moozoo" joem ri zei: so' lho: shid: loo" bye:. Nyang: gi nya: phoug" phyid" yi loeb, nam, moo myhoeb, shung: pyam zi shau" lho: nya: manggung gi loeb, khoug: moo boeb, yoem: lo" byug bye:.
37 Nghoid loug we' Mangso wigi doem dei, to loo nhang: su: gi aboeb yoem: loo" loo: nghoid da.
38-39 Hougsu" nghoid yoomo Israela mangnhung" yi we"- hau: Yesu khyo" wigi yooboo khyoid pyam byid: zi shau" ziyo' sen: lho: nanu" ri kho" kyo" nyid da" Yesu ri loem" jeing" bang: dangain" gi Moshe da" tarha" wigi ayo" lhoid' pyoin, kaid da- yooboo dangain" jang mo, yo" loid byoin lo" da" khyoo: ri we' nanu" ri ngoo si' nhang: nau, zi nghoid.
40 Houg: yoomo yu" ge' juang" yi mo, yo' mau" lho: shid: loo" ge. Khasu" wim gari akhid" nyid" ngoo koid wa da" moozoo" daloem: ri byu dayug yug wigi nanu" ri tid sho' kyoo" nghoid loug we' nanu" gi hau: khyoo: ri loem" jeing: goo" wa zi anghoid ga: wigi Lapi yi tid to" da" jhoem: mungdang: gi nanu" moo abui" loo wa shid mo lhid zid" nyid ge'? ga: kho" khyoo" byid: da.
41-42 Polu yo' Barnaba gi hau: tarha" jung mo thu' lo" nyid uri
mungbyu yi gi nya: eig yug ri
thang: Dougno: Bidnyid moo doem re" kho" kyoo" byid: wa shid mo
mho' kaid ago".
43 Hau" zoebphoung: mo, mungbyu yi byo, lo" boem thang: ri Yuda byu yi myoo" sho' mo, gi Yuda noku thung" khyoo: phoug vang loo bye: da- tungbau byu yi myoo" sho' mo, gi Polu yo' Barnaba thang: cang lo" ago". Polu yo' Barnaba eig yug gi Mangsoo nheig khyeug da" akhoug: moo xo' lho: kangso yo" dei nyid wa shid re" nyangnu" ri yoem: byid: da" dang: ri tid ago".
44 Hau: thang: mo, da" Dougno: Bidnyid rigi Mangso mungdang: ri tam" gyoo: wa shid mo voobyu dangain" ein: wa yhi' ju" re" boem ago".
45 Yuda byumyu" yi gi hau: mungbyu yi ri re" zheung: myang lang- nyangnu" gi myid yu" nau: boem yoomo Polu kho" kyo" da" mungdang: ri ngeug pyam boem lho: wigi nyang: ri aphoug" akhyoid ga: rue" da" dang: ri tid ago".
46 Nghoid loug we' Polu yo' Barnaba eig yug gi je" ri agyug avoem, loo: za: Mangso mungdang: gi nyangnu" rishi"- xangshid" tid kyoo" wa da" khyoo: eung: nyid. Nghoid loug we' nyangnu" gi hau: mungdang: ri ngeug pyam lho: hau: apyaid atoo: mo, kangso yo' amoin: yi" ga: nyhang" nyang: dang: zheung: phyed yu lho: nga" eig yug gi nanu" ri too" kho' lho: tungbau byu yi jhang khyoo: yhe: loo" wa zi nghoid.
47 Khasu" wim gari Aseing gi ngoonu" ri Dang: Theung Khoin" byid: to" zigi mougmyid tho' moo nyid mo, dangain" ri khyoid yu zi shau" boem wa shid mo ngoo gi nang ri tungbau, yi shid mo bidbang bui" nhang: bye:- ga: tid too" bye:- ga: tid ago".
48 Tungbau byumyu" yi gi he: da" dang: ri shau" gyo: boem lang" gyo: ngei boem ziyo' Mangso mungdang: ri coung" nghei ago". Apyaid' atoo: mo, da" kangso ri yo" yu wa shid re" khyen: yu zi shau" bye: mo, gu: gi Yesu ri Loem" jeing" lo boem bye:.
49 Mangso mungdang: gi hau: damung" goin" jang" moo fu" nheung' lo" boem bye:.
50 Nghoid loug we' Yuda byumyu" yi gi Mangsoo ri noku coung" nghei mo, nghoid da. Byu nyid azhang myhang: bye: da" tungbau byu myiyi: yiri we' hau: voogung moo vhujhung: koid nyid mo, ri we' myid lhu: zhuang" to' kaid ago". Houg: lang" nyangnu" gi Polu yo' Barnaba eig yug ri shen" yhen lho: nya: eig yug ri nyangnu" da" mung" mo khaid thu' kaid ago".
51 Polu yo' Barnaba eig yug gi nyangnu" ri ngeug pyam da" aved' khyo" nya: eig yug da" khyid: voo: mo pheilhoug: joem ri ko: khyoo, kho' lho: Ikoni voo khyoo: yhe: lo" ago".
52 Antioki Voogung moo nyid da" loem" jeing" bang: gi gye" ngeibu: boem ziyo' gyeungshang: da" Venyi: yo' byeung" jo, ago".