12
1 Hau: da" ayo, mo wigi Herod khokham gi phung: byu yi dayham" ri shen" yhen shid" loo bye:.
2 Nyang: gi Yohan da" nya: mang: Yaku ri sham: wigi jab, said pyam nhang: bye:.
3 Houg: su" koid ziri Yuda byumyu" yi gi zheung: yu" ngei da" khyoo: ri Herod Khokham" myang lang" gi Nyang: gi Petru ri we' myheug yu bye:. ( Hidsu" koid zigi doo cid" akaid da" zooyho' zo: pui" ayo, moo nghoid )
4 Herod gi Petru ri bain myheug yu thang: ri thung: khoug: moo lhoung, to" lho: wigi gyizoo: myed: yug yug bo da" gyi, myed: phung: ri zheung: zung" nhang: to". Herod gi Petru ri lhid: kaid da" pui" bei: lo" thang: ri- mung" byu yi shidkhoin" moo dang: phyed wa ga: soin' to".
5 Houg: yoomo Petru gi thung: khoug: moo loung" jo,- nghoid loug we' phung: byu yi gi Petru da" shid mo Mangsoo ri yoem: kaid lho: akyu" mho' nyid boem ago".
6 Herod gi Petru ri mungbyu yi da" shidkhoin" khyoo: shu" thu' loo" wa da- xangshid" myen" ri Petru gi goemloem gyizoo: eig yug da" agyoo: moo yhoeb' myhid' jo. Nyang: ri jang coo" eig khaid yo' tei" to" ago"- thung: khoem" duang: moo we' goemloem gyizoo: yi zung" nyid boem bye:.
7 Mangso da" moug: lagyoo: dayug gi nyid' dain' tung" Petru da" nam, moo re" yab, kaid lho: thung: yhoem: goin" jang" moo bang jo. Hau: moug: lagyoo: gi Petru ri lo, sain: moo zei: ci: lho: phyed phyed too we' ga: nhau". Houg: lang" Petru da" lo, mo jang coo" doem gi beug sain" gyo" pyam bye:.
8 Hau: thang: ri moug: lagyoo: gi phyid" cu" cu" lho: khyidbaid baid we' ga: tid. Petru we' moug: lagyoo: tid ziyo' dakhyoo" koid bye:- Houg: lang" moug: lagyoo: gi re" da" byisheung: koid: void, lho: nga" thang: moo cang we' ga: tid.
9 Petru gi thung: yab, mo thu lo" lho: nya: thang: moo cang yhe: lo- Nghoid loug we' Petru gi moug: lagyoo: koid nyid da" moozoo" gi gi" gi nyang: nghoid ga: ziri nyang: asi shi" nghoid da.
10 Nya: eig yug gi zung" nyid da" joyoo- xangshid" loem: yo' eig loem: ri lid thu' lo" wigi voogung khyoo: thu' lo" da" joto' khoem" duang: moo" moo ju" yhe: lo ago". Hau: khoem" duang: we' nyang: nyang: za: bang" loo" khare". Nya: eig yug gi houg: khyo" thu' lo" lho: fu" moo" khyoo: dakhaid moo so" lo" nyid da" uri hau: moug: lagyoo: gi nyid' dain' tung" Petru jhang mo gang: lo" byug bye:.
11 Hau: thang: ri Petru gi Nyang: moo bue" lo da" khyoo: ri boin: lo wigi Mangsoo gi nya: moug: lagyoo: ri nhang: kaid lho: Herod da" lo, mo we' Yuda byumyu" yi myed, lang" nyid ja- dangain" jangmo we' ngoo ri khyoid yu bye: khyoo: ri akhid" ngoo nyang: si' bye:- ga: tid.
12 Nyang: moo khasu" bue" lid lo ziri goolhoo' za: boin: loo lang" nyang: gi Yohan Marku da" nya: myhi' yhoem: moo vang yhe: lo". Hau: yhoem: moo gi byu, myoo" sho' mo, zeung: foem: lho: akyu" mho' phung koid nyid boem.
13 Petru gi tung: goung, shoid mo khoem" moo lo" ko' kaid- houg: lang" Ludi ga: da" dei dei myi: vhookung: zoo: gi khoem" phang byid: wa shid mo thu' yhe: lo".
14 Nyang: gi Petru thui: ri shoug" gyoo: yoomo gye" gyo: gau yoomo khoem" shigi aphang byid: loo: za: yhoem: khoug: khyoo: doem tau" gei vang lo" lho: tung: goung, shoid moo Petru yab, jo, ga: lo" tid kyo".
15 Yhoem: khoug: moo nyid mo, gi nang gi foin" abye:- ga: nyang: ri zheung: tid boem. Nghoid loug we' nyang: gi deing" deing nyang: nghoid- ga: jhug jhug da tid nyid. Houg: su" nyangnu" tid zigi hau: zigi Petru ri zung" lhug da" moug: lagyoo: danghoid wa ga: tid ago".
16 Petru gi atheing: loo: khoem" ri dako' nyid lo" thang moo nyangnu" gi khoem" yhe: phang kaid wigi nyangnu" gi Petru ri myang lang" mau" hang" to" ago".
17 Petru gi nyangnu" ri sam" zoo: nyid boem wa shid re" lo, tu' tu' wigi Aseing gi nyang: ri thung: khoug: mo khasu" shu" thu' lo da" khyoo: nyangnu" ri tid kyo". Houg: lang" Petru gi he: khyoo: ri Yaku yo' loem" jeing" bang: gooji yi ri we' tid kyoo" ge"- ga: tid lho: houg: mo, wigi goo" khyoo: so" lo.
18 Nab, kyoo myo, myang loo lang" thung: yhoem: zung" da" goem, loem gyizoo: yi gi Petru khakhyoo: lo" byug bye: lha"? ga: nheig coid nayug bue" nyid boem bye:.
19 Herod khokham gi Petru ri shoo: wa shid mo amyeung" khyo' kaid bye:. Nghoid loug we' nyangnu" gi Petru ri ashau" shoo: loo: nghoid ago"- houg: yoomo Herod khokham gi goem, loem gyizoo: yi ri myid: ca: yu" lho: nyangnu" ri said pyam wa da" amyeung" khyo' kaid bye:. Hau: thang: ri Herod khokham gi Yuda mung" mo thu' lo" lho: Kesare voogung moo dayo, daboin: yhe: nyid nyid.
20 Herod khokham gi Turu yo' Sidon voobyu yi gi gye" nheig yo. Houg: yoomo hau: eig voo mo bang: gi daphung: za: koid lho: khokham pho jhang khyoo: yhe: lo" ago"- Nyangnu" gi Khokham" khoo" goin" ri vhoeb su- Blastu gi nyangnu" ri, pang" yu wa shid re" xangshid" yhe: mho' boem ago". Hau: thang: ri nyangnu" gi khokham pho jhang khyoo: vang yhe: lho: ngei pyo: yug yo khyoo: ri mho' ago". Khasu" wim gari nyangnu" da" mungdain gi Herod Khokham" mungdain mo zookhoo: ri shau" yu nyid boem yoomo nghoid ago".
21 Herod Khokham" gi deing go" to" da" bidnyid moo nya: da" Khokham" byimi ri void, ci: lho: khokham tang myhang: moo zhoung: jo, wigi mungbyu yi ri dang: tid nyid.
22 Houg: lang" mungbyu yi gi he: dang: thui: gi xangsu: byu yi da" dang: thui: anghoid- Mangsoo tid nyid da" thui: danghoid- ga: nyho: nyid boem ago".
23 Herod khokham gi Mangso myonhoo: ri atu: to' byid: yoomo houg: jang: nyang: Aseing da" moug: lagyoo: gi nyang: ri yooboo dam kaid byid: wigi zain' joem wigi zo: said pyam.
24 Mangso da" mungdang: gi je" byo, sain" lo" wigi loem" jeing" da" byu yi gi je" myo: tham: lo nyid boem bye:.
25 Sholu yo' Barnaba eig yug gi nya: eig yug da" moozoo" ri bain zei: lang" Yohan Marku ri shu" lho: Yerusalem voomoo" mo doem phang: thu' lo" ago".