8
Jerusalem mary palum teang ai nai Areng my leu adeu nai
1 Ati cheaungkhang sa thai nai Areng i leu ly Zekhariah teng y tym.
2 “Jerusalem mary i khumichi tlang tleaung y khri pa-rei katamen nai deaungkho y, nichi i paleung ka-echi tlang tleaung y kado theu hai nai ne i py, kai i tamen nai saho y, huni mary ai sabawm ai nai kadeaung nai ne.
3 Kai ly kaimy i chai parai nai Jerusalem mary y kavawi teang ai. Huni mary y kaawm ai. Huni mary ly ka-ym awm nai mary nanai py, ati cheaungkhang sa thai nai Areng i mawi ly mawi kachai nanai py, amyn pathi ai.
4 Cheaungvawi atawi iy aleaung nai pa-rei miteaung acheang nai, neampachy neampachochi ly Jerusalem lam y ateh u ai.
5 Lam y py amau u nai deaungdi neampacho neampachychi hawi, kawi naimy awm u teang ai.
6 “Hinichi ly vai, awm jo nai Juda chengchi i vui ne, nanai thui khyp pajau y teu i py kai, ati cheaungkhang sa thai nai Areng i vui ly avo pajau nai ne.
7 Kai ly kaimy i khumichi teng y, nichi tym naira tleirei y atleu i,
8 Jerusalem mary y awm u ai nai nidym, nisi mang i dengdairei, nichi ai kapahawi ai. Nichi ly kai i khumichi lawm ai. Kai py nichi i Tameuh lawm ai i, nichi ai leu meitang hawi ka-ym awm naimy peang ai.
9 “Sorai paleung awm u! Nangchi thai u nai leuchi ly kai i Achura yhm sa palum teang ai nai langdeng pala nai neng khala y, amochi thui nai leuchi ne.
10 Huni neng ny y rai khala ly ami py khumichi, tawnbawichi ai kalop so hai pajau y. Ami py mychi i paleung ka-echi teng i nai law tleaung ai nai ngo y. Kai ly khumi cheng tengtawi ajo hai nai ne.
11 Na i py vai, kai ly hini khumi cheng awm rai naichi hawi, sai sairei amkawm ai.
12 Nichi ly mychi i amti amjangchi tlamsa naimy pati u ai. Nichi i kreip keungchi ly athaichi pasu ai. Khaileaung ly amti amjangchi thawn hai iy, kani my py khri pa-rei nai hai ai. Awm rai nai kai i khumichi teng y, hini amtheaung nairachi kapei pi ai.
13 Aw Juda hawi Israela khumichi awi! Jangni y cheng takhra khumichi ly mychi tengtawi apasawi apatau u nai khala y, ‘Nangchi ly Juda hawi Israela chengchi tlang tleaung y tym nai ka-jeirachi kamta, nangchi i tlang tleaung y tym teang sy!’ nanai thui u reng nai ne. Na i py kai ly nangchi ai atleu ai i, huni cheng takhra khumichi ly mychi tengtawi, ‘Nangchi ly Juda hawi Israela chengchi teng y tym nai amtheaung nairachi kamta, nangchi py ngo u teang sy!’ nanai thui u ai. Hunai deaungkho y sorai paleung awm u; jei u moh,” napi.
14 Ati cheaungkhang sa thai nai Areng my, “Nangchi i amsi pajochi my kai ai kado theu hai nai khala, kai ly nichi ai hawi y naira kapei ai nai tau bo. Naibaly paleung ka-dawn amtlau y naimy, hunai kamta kasa bo.
15 Na i py vai, kai ly Jerusalem mary i khumichi hawi, Juda khumichi ai amtheaung naira pei ai nai dawn bo. Hunai deaungkho y jei u moh.
16 Nangchi sa ai avo naichi ly amy tengtawi leu kateng katheu ai nai hawi, adyh adawi ai nai molam, meitang naimy tara chih u ai nai ne.Ref 8:16 Eph 4:25
17 Nangchi ly amy tengtawi khrukhra hai ai nai ka-dawnchi so u moh. Vaineng abeu iy ka-chawi naimy pany hai u moh. Ka-chawi thui nai, teng y nai kalop hawi kamjau kamteang sa naichi ai kai ly niu ngai y,” napi.
18 Ati cheaungkhang sa thai nai Areng ly Zekhariah teng y hina nai leu pei.
19 Palyh lo, pa-ngo lo, saryh lo hawi lo horei khala y sa nai biu hai nai pawichi ly Juda khumichi i vui amo theu naira lawm ai. Nangchi ly kateng lam hawi tlamsa naira ngai ai nai tla,” napi.
20 Ati cheaungkhang sa thai nai Areng my, “Pri kalenchi hawi marychira i khumichi ly Jerusalem mary y jeu u ai nai neng tym ai.
21 Mary harei i khumichi ly takhra mary harei i khumichi teng y, ‘Kaichi ly ati cheaungkhang sa thai nai Areng teng y chei i chiu sa iy, mymy teng i amtheaung naira hnei u sina; kaichi hawi vanrei abang u!’ nanai thui ai.
22 Sa thai naira haiho awm nai pri kalen khumichi ly ati cheaungkhang sa thai nai Areng ai chiu ai nai hawi, mymy teng i amtheaung naira hnei ai nai, Jerusalem mary y jeu u ai.
23 Huni neng kani y Juda khumi leaungrei ai, cheng takhra khumi leaung horeichi my, ‘Tameuh ly nang hawi vanrei awm, nanai kaichi thai bo. Hunai deaungkho y kaichi ly nangchi hawi vanrei, sih hawi amdai ahawi ai nai ngai,’ nanai thui ai,” napi.