4
Patiu nai keung amlawn naichi
1 Na i py vai momang y ly phyrei khumichi ly ka-chawi thui naichi i tapawp naira deaungkho y tamang hai nai phailochi hawi,
2 vawinamchi i patiu nai leu dawn iy, ym naira ai ly hi vui ai, nanai Phailo my ly chai pyn nai pa-rei thui bo; huni ka-chawi thui naichi ly mymychi i hawi nai hawi y nai pany naira kypkyp y tamo kangngo y akeaung nai kamta awm bo;
3 nichi ly apom ai nai kam u lawh, naibaly ym iy leu meitang pany naichi ly kawn nai leu thui iy nga ai nai, Tameuh my cha ai nai sa naichi ai ly cha ai nai tlo y, napi u lawh.
4 Tameuh i atiti sa nai cheaungkhang ly hawi, naibaly kawn nai leu thui iy nga nai kha y ly amjy ha py ngai y ai nai tlo y:
5 ati mana nai mo nabaly huni ai ly Tameuh i leu y hawi chiu sa naira y chai hai veng bo.
Isu Krista i kalop sa nai keung kahawi
6 Nang ly huni satang takhra takhra amjo amnauchi ai pany hai baly nang ly Krista Isu i kalop sa nai keung kahawi hawi, ym naira leu y hawi, nang ly vai khrairei patawm nai patiu naira kahawi y py apacho veangveang nai keung lawn ai:
7 na i py Tameuh ai tahm khai y nai hawi, neampachy miteaungchi i leuchih rumrang ai ly ngai moh.
8 Naibaly Tameuh ai dawn ryhryh ai nai apatiu reng: tlang mang y atho nga ai nai amjy teaung nai ly chawn mang ly chawn: na i py Tameuh ai dawn ryhryh nai ly vai i awm angchi nai hengra hawi, vai tym ai nai hengra molam y atiti adeu naira nga nai deaungkho y lam cheaungkhangra y chawn nai ne.
9 Hini leu ly ka-ym awm i khrikhri pa-rei ym ai nai hawi.
10 Hunaibaly achi ly Tameuh kangheng ai athang khai nai deaungkho y, achi ly sa akawm nai hawi kamjau ryrei atiti sa nai ne; mymy ly khumi bawibawichi i vui Paheng nai Keung ne, ni ai ym nai keungchi i vui ne kehkeh.
11 Nang ly huni satang molam y leu py pei, patiu py patiu.
12 Nang i saneng nau nai sai ly ami my tahm khai y ai nai so moh: na i py nang ly leu thui naira y hawi, amhi amtlau naira y hawi, tamen naira y hawi, ym naira y hawi, chai naira y py ym naichi i vui y amtiu naira lawn ba.
13 Kai kang jeu y ryrei ly phain nai hawi, pachei nai hawi, patiu nai py hawihai palai dawn jo.
14 Naibaly miteaung kehchi ly nangmy i tlang tleaung y kiu tamam iy, leu thui u rym nai deaungkho y nang i paleung theung y Phailo i sa thai naira ang nga hai nai ly patlaw jo moh.
15 Nang i chawn reng naira khumi bawibawichi teng y amteng hai thai ai nai huni atitichira y atho si moh ly; hunira y ly hawihai palai apei.
16 Nangmy hawi nang i patiu naira y ly amkym ly. Hunichi ly so veangveang; nang ly hunai kamta sa naira y ly nangmy hawi nang i leu tangai naichi ai py paheng ai.