3
Palau takhra kamkawm peang nai keungchi
1 Ami py palau takhra kamkawm peang nai keung lawn ai nai ngai baly kalop kahawi ngai nai ne, nanai ly ka-ym awm nai ne.
2 Hunaibaly palau takhra kamkawm peang nai keung my ly cheh naira by y nai, aju harei awm khyh nai, amkym thai nai, paleung kateng, khumi kahawi, angvyn angvo hawihai nai,Ref 3.2–7: Tit 1.6–9
3 patiu nai sai py kawp nai, kreip athai hang pavui y nai, khumi ai tabeang y nai, neaung hawi nai, jo sei y nai, tangka paleung no y nai,
4 awmnem naimy mymy i chanauchi ai parip iy amy i dengtheungchi ai kry kawp nai khumi;
5 (ami my mymy i dengtheungchi ai malawn py kry nai kawp y baly, Tameuh i palau takhra kamkawmchi ai ly mana kry thai ai mo?)
6 ym nai khumi kangtha ly avo y, ti y baly am-e ai i, diabola i sum naira y tym teang lawh na.
7 Huni ny y iy py mymy ly angam mang i khumichi my palo naira y awm ai nai tla, ti y baly preaung naira awm lawh iy, diabola i deaung y man lawh na.
Palau takhra kamkawm miteaung kehchi
8 Hunai kamta teang dikonchi ly tahm khai ai nai khumi awm ai nai tla, achang palai kamta hawi kreip athai hang ha nai khumi ny y i, kamran hau reng nai khumi py ne moh sy;
9 nichi ly hawi nai hawi y nai pany naira kachai y ym naira leu kathiu patawn cheng nai khumi ne ai nai tla.
10 Naibaly hinichi ai py cham man rai sy; huni bo y cheh naira by y nai ne baly dikon kalop so u sy.
11 Hunai kamta teang neampachychi py tahm khai ai nai khumi ne ai nai tla; seu rumrang nai khumi ny y naimy, amkym thai nai khumi hawi atiti cheaungkhangra y ka-ym awm nai khumi ne ai nai tla.
12 Dikonchi ly mymychi i chanauchi ai hawi dengtheungchi ai kry kawp nai khumi awm iy, aju harei awm khyh sy.
13 Dikon awm nai khala y kalop hawihai palai sa naichi ly amymychi i vui y tahm asang naira hawi, Krista Isu y ym naira y py khri pa-rei vam naira asa lawh veng.
Khri pa-rei thiu parai naira
14 Kai ly kra y nai sala y nang teng y kang jeu ai nai athang khai nai y, hini satang ly nang teng y kang pa nai ne:
15 na i py kai ly awm kra lawh iy Tameuh i dengtheung theung i khumichi ly mana mana awm ai nai tla mo, nanai nang pany thai ai nai kang pa nai ne: huni ly Tameuh Kangheng i palau takhra kamkawm, leu meitang i yhmmawm hawi khai hai naira ne.
16 Naibaly aei ai nai vuilam ny y naimy Tameuh ai dawn ryhryh naira ly leu thiu parai nai ne.
“Mymy ly tlang y amteng nai,
Phailo y eaung naira nga nai,
Kani pri i amtaw thau naichi my ni ai niu nai,
Cheng Takhrachi theung y ni i satang aeu hai nai,
Khaileaung pri i khumichi ly ni ai ym nai,
Nang parai naira y ly ni ai hawi kalau vui nai,” nanai ne.