20
Saneng sangrei
1 Naibaly kani mang i dengdairei kani pri i amtaw thau nai leaungrei, angawm kalawi by y nai saw hawi sengkry kalen pui mymy i kiu y syn nai kaniu.
2 naibaly mymy ly huni naka, jangni jangkhawn kha i awm nai pavui, Diabola hawi Setan napi nai ai patiu i, saneng sangrei i vui y kawm bo:Ref 20.2: AA 3.1
3 naibaly saneng sangrei khei y ryrei ly cheng cheaungkhangchi ai tapawp bi y ai nai, ni ai ly angawm kalawi by y naira y ly aphi iy, kho i pajawp hai typ bo; huni bo y tanarei sala y ni ai theu hai ai nai tla.
4 Naibaly areng atehrachi kaniu, nichi ly hunichi tleaung y ateh iy tara chih ai nai leu nga bo: naibaly Isu i leu thui pi nai hawi, Tameuh i leu deaungkho y lu tameang nai, mawi kasi ai hawi ni i myn y py chiu y iy, mymychi i lukati y hawi kiu y py huni ka-ma-ra ngo y naichi i phailochi ai ly kaniu: nichi ly heng bi i, saneng sangrei sala y Krista hawi vanrei peang u bo.Ref 20.4: Dan 7.9, 22
5 Khumi kadei takhrachi ly huni saneng sangrei khei y ryrei ly heng bi u y leang rai. Huni ly angchei i angthau bi naira ne.
6 Angchei i angthau bi naira abawi nai khumi ly taham py hawi, kachai py lawn bo:hunichi i tlang tleaung y pa-nyh dei naira ly sa thai naira ngo y bo; na i py nichi ly Tameuh hawi Krista i pathyp pi nai keungchi lawn u iy, mymy hawi vanrei saneng sangrei sala y peang u lawh ai.
Setan sum nai
7 Naibaly saneng sangrei khei nai bo y Setan ai ly ni i theaung tla naira dengdairei theu hai ai:
8 ni ly khaileaung taki palyhrei y awm nai chengchi, Koka hawi Makoka ai tapawp iy, nichi ai tavai atiu naira y pahawi achu ai nai theu ai; hunichi i nawi nai sai ly pangli i spryh kamta ne..Ref 20.8: Ezek 7.2, 38.2, 9, 15
9 Naibaly nichi ly khaileaung pri y tako angeng u i, khumi kachaichi i awm naira y hawi, avang pui ngai parai nai py katan u vui bo: naibaly kani mang i dengdairei mai tla iy nichi ai kang bebe bo.
10 Naibaly nichi ai tapawp nai keung diabola ai ly mai hawi kan ang y ly aphi vui bo: hu y ly mawi kasi hawi tapawp nai amo py awm teang; naibaly nichi ai ly deungtasarei vum kanithun no patang hai jojo ai.
Kangkhym i tara chih nai
11 Hunaibaly areng atehra kangleung kalen pui hawi, huni tleaung y ateh nai keung ai py kaniu; mymy i mei ka-niu dengdairei ly kani khaileaung preang pawn bo: hunini i vui y awmra py by y leang bo.Ref 20.11–12: Dan 7.9–10
12 Naibaly khumi kadeichi, katheang py kalen py huni areng atehra mo y angdo nai kaniu; naibaly cha-iuchi paeaung iy, cha-iu takhra harei, heng naira cha-iu napi nai ly paeaung teang: naibaly huni cha-iuchi y tajiu nai kamta mymychi i atiti sa naichi kamta khumi kadeichi ai tara chih pi bo.
13 Naibaly pangli ly mymy teng y awm nai khumi kadeichi ai theu hai bo; dei naira hawi tavau kho py hunichi teng y awm nai khumi kadeichi ai py theu hai bo; naibaly nichi leaung leaungrei ai ly mymychi i atiti sa naichi kamta tara chih pi bo.
14 Naibaly dei naira hawi tavaukho ly mai ang y aphi hawi vui bo. Huni ly pa-nyh dei naira, mai ang napi nai ne.
15 Naibaly ami i amyn ly heng naira cha-iu y tajiu angchi nai niu y baly mymy ai ly mai ang y aphi vui teang.