13
Mawi kasi nyhrei
1 Naibaly mawi kasi harei, taki horei lu saryhrei awm nai, pangli i dengdairei theu nai kaniu: ni i taki y ly areng lukhym horei awm, naibaly ni i lu tleirei y Tameuh ai thui tamawn nai amynchi awm teang.Ref 13.1: Dan 7.3; Amt 17.3, 7–12
2 Naibaly kai i niu nai mawi kasi ly takai satlum kamta ne: ni i kheu ly tavym kheu kamta ne, ni i labeaung ly khrangsi takai labeaung kamta ne: naibaly naka ly ni teng y mymy i sa thai naira hawi, mymy i areng atehra hawi, aly peang naira len parai nai py pei bo.Ref 13.2: Dan 7.4–6
3 Naibaly ni i lu harei ly dei ai athang khai nanai tamo nga nai kamta kaniu: na i py huni dei ai athang khai nanai tamo ly tha bo: naibaly khaileaung pri i khumi bawibawichi ly mawi kasi ai rengrang tlai napi naimy ni teng y abang bo;
4 naibaly mawi kasi teng y mymy i aly peang naira ang pei nai deaungkho y, nichi ly naka ai chiu u bo; naibaly nichi ly mawi kasi ai py chiu u i, “Mawi kasi kamta ly ami atawm mo? Mymy hawi tiu thai ai nai ami awm mo?” nanai thui u bo.
5 Naibaly leu akawi kalen hawi Tameuh ai thui tamawn nai leu thui nai labeaung ni teng y pei bo: naibaly lo vui palyh pa-ngo lo nyhrei sala y aly peang ai nai ni teng y leu au bo.Ref 13.5–6: Dan 7.8, 25, 11.36
6 Hunaibaly kani pri y awm nai Tameuh i amyn hawi awm naira ai thui tamawn ai nai, ni ly Tameuh ai thui tamawn ai nai mymy i labeaung paeaung bo.
7 Naibaly khumi kachaichi ai atiu ai nai hawi pajau ai nai py ni teng y leu au bo:cheng cheaungkhangchi i tlang tleaung y aly peang ai nai py ni teng y au teang.Ref 13.7: Dan 7.21
8 Naibaly khaileaung pri y awm nai bawibawichi khaileaung palum angchei khala y tleh nai Beram Cho i heng naira cha-iu y amyn tajiu y nai ngiereichi ly ni ai chiu u ai.Ref 13.8: Sam 69.28
9 Khumi ami py kano awm baly thai sy.
10 Ami ai py miseaung y hawi ai nai tla baly miseaung y hawi takengkei ai: ami py haisau y khumi ai tleh baly ni ai ly haisau ai tleh teang takengkei ai. Hinira y ly khumi kachaichi i kham tanga naira hawi ym naira amteng hai nai ne.Ref 13.10: Jer 15.2, 43.11
11 Naibaly mawi kasi takhra harei, khaileaung i dengdairei theu kalau nai kaniu bi: ni ly beram cho kamta taki nyhrei awm i, naka i raawi kamta katheu bo.
12 Naibaly ni ly kangman keh i nai mawi kasi i aly peang naira bawibawi ly mymy i mei ka-niu y teaung bo. Naibaly ni ly khaileaung pri hawi huni theung y awm nai bawibawichi ai ly kangman keh i nai mawi kasi, dei ai athang khai nanai tamo nga iy hawi ali teang bi nai ai ly chiu hai bo.
13 Ni ly khumichi i mei ka-niu y ly kani mang i dengdairei khaileaung pri y mai tla hai ai nai pa-rei ka-ma-ra atiti rengrang tlai nai sa.
14 Naibaly ni ly huni mawi kasi i mei ka-niu y atiti ka-ma-ra sa ai nai nga nai deaungkho y, khaileaung pri y awm naichi ai ang tapawp; naibaly haisau y tamo nga iy heng asai nai mawi kasi i myn sa u ai nai, khaileaung pri y awm naichi teng y leu pei bo.
15 Naibaly mawi kasi i myn ly leu katheu thai ai nai pa-rei hawi, mawi kasi i myn y chiu y nai ngiereichi ai padei hai thai ai nai py, ni ly mawi kasi i myn taho hai ai nai leu nga bo.
16 Naibaly ni ly khumi bawibawi, katheang kalen, kamawn kanang, miseaung py miseaung ny y naichi ai py mymychi i lamtang mang i kiu y mo, lukati y mo, ka-ma-ra sa hai bawibawi;
17 hunaibaly mawi kasi amyn mo, ni i kanai mo, huni ka-ma-ra awm naichi ny y baly ami py ati sai py jo van ai nai ngo y.
18 Hinira y ly cheng naira aly awm. Pany thai naira awm nai khumi ly mawi kasi i kanai dawn pasym sy:huni ly khumi i kanai ne i, ni i kanai ly chungvai tariu saryh vui tariu saryh tariurei nai ne.