12
Neampachy hawi naka
1 Naibaly kani mang y ly ka-ma-ra atiti rengrang tlai nai amteng bo; neampachy leaungrei kanito amthyp naimy, ni i kheu anui y lo py awm, ni i lu y py ka-si holai nyhrei awm nai areng lukhym amym teang;
2 naibaly ni my deaungdi anui i, tapen ai nai achai iy aeng nai tarawi y hang kalanga.
3 Naibaly kani mang y ly ka-ma-ra takhra harei amteng bi bo; naibaly khen cham, naka kamsen kalen pui, lu saryhrei taki horei py awm i, lu y ly areng lukhym saryhrei amym nai ne.Ref 12.3: Dan 7.7
4 Naibaly ni i tamai my ly kani i ka-si phy thomrei y phyrei ai ryh i, hunichi ai khaileaung y aphi kathiu bo: naibaly deaungdi tapen nai kha y mymy i chanau ai pajawn thai ai nai, naka ly huni deaungdi ai tapen thym nai neampachy i mo y ly angdo bo.Ref 12.4: Dan 8.10
5 Naibaly cheng cheaungkhangchi ai tamo cheaungvawi y peang ai nai chapo ta-luitang ai tapen:naibaly mymy i deaungdi ai ly Tameuh teng y hawi, mymy i areng atehra y ly la kalau vui bo.
6 Naibaly mymy ai ly kani sang atlo chungvai nyh pa-thom vui tariurei sala y pacho thai ai nai, neampachy ly daichi ka-vym y, Tameuh i sa rym nai meingtym y angpreng vui.
7 Naibaly kani pri mang y ly atiu nai awm bo. Mikaila hawi mymy i kani pri i amtaw thau naichi ly naka ai tiu bo; naka hawi ni i amtaw thau naichi py atiu u teang;Ref 12.7: Dan 10.13, 21, 12.1; Juda 9
8 na i py nichi ly pajau y leang, nichi i vui y py kani pri mang y meingtym by y taleang bi bo.
9 Naibaly khaileaung pri bawibawi ai tapawp nai keung, jangni jangkhawn kha i awm nai pavui, Diabola hawi Setan napi nai, naka kalen pui ai ly khaileaung y aphi kathiu bo, mymy i amtaw thau naichi py mymy hawi vanrei aphi kathiu teang.Ref 12.9: AA 3.1; Lk 10.18
10 Naibaly kani pri mang y ly tao pajeng parai naimy, “Vai ly kaichi i Tameuh i atleu naira hawi, sa thai naira hawi, peang naira hawi mymy i Krista i aly peang naira py tym bo; kaichi i amjo amnauchi ai seu nai keung, kaichi i Tameuh i mo y ly vum kanithun seu jojo nai keung ai ly aphi kathiu vui bo.Ref 12.10: Job 1.9–11; Zek 3.1
11 Nichi ly Beram thi deaungkho y hawi, nichi i pany hai nai leu deaungkho y py ni ai pajau u bo:nichi ly dei ai nai pa-rei mymychi i hengra ai tama ai nai mawn y leang.
12 Hunai deaungkho y kawn u, kani hawi hunira y awm naichi awi! Diabola ly mymy i neng maidenrei chy awm, nanai pany iy khri pa-rei kado theu naimy nangni teng y satla nai deaungkho y, khaileaung pri hawi pangli py taham si!” napi nai kathai.
13 Naibaly naka ly khaileaung y aphi kathiu, nanai apany baly chapo ta-luitang tapen nai neampachy ai ana ai nai hui bo.
14 Naibaly neampachy ly daichi ka-vym y mymy i meingtym y angkheang iy, pavui i niu pajau y naira y neng hawi, nengchi hawi, neng ka-hyhrei sala y py mymy ai pacho thai ai nai mymy teng y ahm pui pakhi angvawi amtang pei bo.Ref 12.14: Dan 7.25, 12.7
15 Naibaly pavui ly tui sambo my huni neampachy ai lawi vui thai ai nai mymy i ni thun y ly jangpang ka-tawn khyp naimy mymy i labeaung i deungdairei tui patheu.
16 Na i py khaileaung ly neampachy ai sabawm i, khaileaung ly ang iy, naka mymy i labeaung i dendairei patheu nai jang pang ai ly pajawn be bo.
17 Hunaibaly naka ly neampachy i tlang tleaung y khri pa-rei kado theu i mymy i chanauchi, Tameuh i leu patawm nai hawi, Isu i thui pi nai leu patawm cheng nai kamthomchi ai tiu ai nai leh vui bo:
18 naibaly mymy ly pangli palang y angdo bo.