29
Juda samrang Hezekia
(2 Areng 18:1-3)
1 Hezekia ly saneng 25 rei awm nai khala y Juda samrang lawm i, Jerusalem mary y saneng 29 rei peang nai ne. Ni i amhm ly Zekhariah i chaniu Abija ne.
2 Ni ly pajo samrang Davida i sa nai kamta amtiu iy, Areng i kangaichi sa nai ne.
Achura yhm chai pa-rei sa nai
3 Hezekia ly samrang lyn nai saneng angchei lo tleaung y, Achura yhm katheuchi paeaung iy palum ali teang bo.
4 Ni ly pathyp pi nai keungchi hawi Levi theaungchi ai, Achura yhm nisi mang apai theung i ly-um y angym hai iy,
5 nichi teng y leu pei nai ly “Nangchi Levi theaungchi awi, nangchi ly nangmychi ai apachai u iy, nangchi amsi pajochi i Areng Tameuh i Achura yhm chai ai nai so u. Achura yhm y chai hai y nai ngiereichi ai pasym u pawn.
6 Achi i amsi pajochi ly achi i Areng Tameuh i tlang tleaung y ka-ym by y iy, mymy i kangai so u y. Nichi ly mymy ai khai u su iy awm naira meingtym ai py nithun thun u vui bo.
7 Nichi ly Achura yhm katheuchi py khotyp nai, maisi yhmchira i mai padei pawn iy, Israela chengchi i Tameuh Achura yhm y mui katui leng patlum nai kapathypra py so u y; leng patlum nai kapathyprachi py talam u y.
8 Hunai deaungkho y Areng ly Juda pri hawi Jerusalem mary ai kado theu iy, ka-jeira tym hai naichi niu nai khumi bawibawichi ly athengra na bo. Huni ly nangchi hawihai palai pany u nai ne.
9 Achi i ampochi ly tavai keung y dei u i, achi i aju chanauchi ai py patiu iy hawi pawn bo.
10 “Kado katheu rym ai nai vai, kai ly Israela chengchi i Areng Tameuh hawi Leu Maikawm asa ai nai kadawn bo.
11 Deangchi awi, neng patyh hai atyhtyh moh; Areng teng y mui katui leng patlum ai nai hawi, mymy ai chiu naira y lu sa ai nai mymy i vawi takhra nai khumi ly nangchi naini ne,” napi.
12-14 Huni meingtym y awm nai Levi theaungchi ly:
Kohath nupaichi theung i Amasai i chapo Mahath hawi Azariah i chapo Joela
Merari nupaichi theung i Abadi i chapo Kish hawi Jehalelela i chapo Azariah
Kerashon nupaichi theung i Zimnah i chapo Joah hawi Joah i chapo Eden
Elizaphan nupaichi theung i Shimiri hawi Jeuela
Asah nupaichi theung i Zekhar hawi Mattniah
Heman nupaichi theung i Jehuela hawi Shimei
Jeduthun nupaichi theung i Shemaiah hawi Uzielachi ne.
15 Huni khumichi ly mychi Levi theaung tengtawi akachu hai iy, Reita leaungsai kamta kachai asa hai bo. Naibaly nichi ly samrang my leu pei nai kamta Areng i Reita y kachai sa hai nai ne.
16 Pathyp pi nai keungchi ly kachai sa ai nai Achura yhm theung y kun iy, Reita leaungsai y, chai y nai ngiereichi ai apai theung i ly-um y patheu nai khala, hunichi ai Levi theaungchi my mary angam mang i Kidron leaunghawi mang y tawn u nai ne.
17 Nichi ly angchei lo kani harei dengdai amteaung iy, kunra meingtym raurei, Achura yhm pachai u i, tajarei kani y pajau bo. Naibaly nichi ly huni bo y kani tajarei, lo si kani holai tariu kani ryrei, Achura yhm y chiu sa ai nai hawi pa-rei palum u nai ne.
Achura yhm khai takhra teang nai
18 Levi theaungchi ly samrang Hezekia teng y, “Kaichi ly leng patlum nai kapathyprachi i vui maicham, tako kachai khaira sabawi hawi ateaung alangchi raurei, Achura yhm verei py, reita leaungsai kamta kachai sa nai pajau bo.
19 Kaichi ly samrang Ahazi my Tameuh i kangai so y nai thym khala i, la pi pawn nai ateaung alangchi py la ali teang iy, kachai sa teang bo. Huni bawibawichi ly Areng i maicham mo y awm bo,” napi u.
20 Samrang Hezekia ly kra y naimy Jerusalem mary i miteaung kehchi ai pangym iy, nichi hawi vanrei Achura yhm mang y chei nai ne.
21 Samrang i amjo amnauchi i kamngo, Juda khumichi i kamngo lawi ai nai hawi, Achura yhm chai hai ai nai nichi ly si katai amai saryhrei, beram amai saryhrei hawi mi-i amai saryhrei syn u bo. Samrang ly Aron i kangpreang pathyp pi nai keungchi teng y, “Hini tawnbawichi ai maicham salo y theng iy, pathyp u,” napi.
22 Pathyp pi nai keungchi ly si kataichi tleh manme iy, thi ly maicham salo y katheng u. Naibaly Beramchi tleh iy thi ly maicham salo y katheng u bo.
23 Kangkhym y nichi ly mi-ichi ai samrang hawi khumichi teng y syn i, mi-ichi tleaung y kiuchi khai hai bo.
24 Naibaly pathyp pi nai keungchi ly Israela cheng verei i vui kamngo lawira nga nai apathyp ai nai samrang my leu pei nai kamta, mi-ichi tleh iy, maicham salo y thi paleaung nai ne.
25 Samrang ly samrang Davida teng y samrang i amo Kad hawi amo Nathan dengdairei, Areng my leu pei naichi tangai i, tarochi, sa-rachi syn nai Levi theaungchi khai takhra bo.
26 Nichi ly samrang Davida i teaung nai taro cheaungprengchi syn iy angdo u. Pathyp pi nai keungchi my bawchi syn iy angdo u bo.
27 Leng patlum nai kapathyprachi talam ai nai samrang my leu pei nai deaungkho y, katalamrachi amteaung nai khala y khumichi ly khulym thui naimy Areng ai palo u nai ne. Katyn kapau beu kawp naichi py bawchi hawi, takhra katyn kapauchi beu u.
28 Hunira y awm nai khumi bawibawichi ly tawnbawichi leng patlum nai pajau nai ryrei abawi iy, chiu u nai ne. Khulym thui naichi my khulym thui u iy, baw eng naichi my py baw eng u bo.
29 Naibaly samrang hawi khumi bawibawichi ly kheukhu di naimy Tameuh ai chiu u.
30 Samrang Hezekia hawi mipuichi ai lu sa naichi ly Levi theaungchi ai Davida hawi amo Asap nini my tajiu pi yb nai palo nai khulymchi thui hai nai ne. Hunai deaungkho y nichi ly amo theu parai naimy khulym thui u iy, kheukhu di naimy Tameuh ai chiu u bo.
31 Hezekia my khumichi teng y, “Vai nangchi ly Reita leaungsaira y tajiu nai kamta, kachai sa u chum bo i, Areng teng y kawn naimy palo nai katalamrachi napi nai tawnbawichi syn u,” nanai leu pei nai kamta, khumichi sa u bo. Phyrei khumichi ly mymychi i paleung kangngai, leng patlum ai nai tawnbawichi syn u nai ne.
32 Nichi ly si katai amai 70 rei, beram amai 100 rei hawi beram cho amai 200 reichi ai Areng teng y leng patlum nai kapathypra syn iy,
33 khumichi cha ai nai si katai amai 600 rei hawi beram amai 3,000 rei py, apathyp ai nai syn u bo.
34 Hijirei tawnbawichi tleh ai nai pathyp pi nai keungchi aha leila y nai deaungkho y, amymychi ai kachai sa chum naichi, pathyp pi nai keungchi anga y nai ryrei ly kalop pajau pa-rei, Levi theaungchi my sabawm u nai ne. (Levi theaungchi ly pathyp pi nai keungchi tleaung y, Reita leaungsai kachai sa naira y hawihai palai sa nai ne.)
35 Bom verei leng patlum nai kapathypra tawnbawichi bo y, khumichi my cha nai tawnbawi thauchi leng patlum nai, leng patlum nai katalamrachi hawi vanrei, kreip hang talam naichi py, pathyp pi nai keungchi my sa nai kalop ne.
Hunai deaungkho y Achura yhm y chiu sa nai ly khaw ali teang bo.
36 Tameuh my hini kalopchi sa kaliki ai nai pei nai deaungkho y, samrang Hezekia hawi khumi mipuichi ly amo theu u na ne.