28
Juda samrang Ahazi
(2 Areng 16:1-4)
1 Ahazi ly saneng apomrei khala samrang lyn i, Jerusalem mary y saneng holai tariurei peang nai ne. Ni ly pajo samrang Davida i kahawi sa nai kamta so y i, Areng i kangai so y naimy
2 Israela samrangchi i hawi y sa nai lam y tako bo. Ni ly Bala tameuh i mynchi sa hai iy,
3 Hinnom leaunghawira y mui katuichi leng patlum bo. Ni ly Israela chengchi tavai amsa u nai khala, Areng my patheu nai khumichi i, amso ngai hawi nai reitachi kamta sa iy, my i chapochi ai malawn py leng patlum nai kapathypra palawn nai, mynchi teng y talam.
4 Myn y chiu nai meingtymchira py, mawi aheungchira py, ka-khui hawi nai dengkeaung ngiereichi anui y py, Ahazi ly kapathyprachi talam iy, mui katuichi leng patlum nai ne.
Suria pri, Israela prichi hawi tavai atiu nai
(2 Areng 16:5)
5-6 Samrang Ahazi ly kamngo sa nai deaungkho y, Areng Tameuh my Suria samrang teng y, ni ai tiu iy Juda khumi neangneangchi ai langheng palawn nai Damaska mary y hawi pawn ai nai pei bo. Areng ly Remaliah i chapo, Israela samrang Pekah teng y Ahazi ai tiu iy, kanirei y my Juda tavaimi risa leaung 120,000 rei padei ai nai pei pi bo. Nichi ly mymychi amsi pajochi i Areng Tameuh ai khai u su nai deaungkho y, mymy ly hina nai tym hai nai ne.Ref 28.5-6: Is 7.1
7 Zikhri napi nai Israela risa leaungrei ly Ahazi i chapo Maseja, samrang yhm kalop pacheang nai keung Azarikam hawi samrang i pa-nyh leumo pei keung Eliakanachi ai padei pawn nai ne.
8 Israela tavaimi kamkawm ly mymychi amjo amnauchi theung i, Juda neampachy hawi deaungdi 200,000 reichi ai patiu iy, lawm nai vawnsai neangneangchi hawi Samari mary y hawi pawn nai ne.
Amo Oded
9 Oded napi nai Areng i amo ly Samari mary y awm nai ne. Ni ly tavai keung i vawi nai Israela tavaimi kamkawm ai mary apai katheu pa-khora lawh i, ni my, “Nangchi amsi pajochi i Areng Tameuh ly Juda khumichi ai kado theu nai deaungkho y, nichi ai nangchi my tiu ai nai pei nai ne. Na i py nangchi ly kado theu nai apatawn pajau y i, tamyh u lawh bo.
10 Naibaly vai py Jerusalem mary i neampacho neampachychi hawi Juda khumichi ai, nangmychi i miseaung palawn ai nai ka-dawn awm u lawh ly. Nangchi py nangmychi i Areng Tameuh i tlang tleaung y kamngo sa nai khumichi ne, nanai apany u y nai sai a?
11 Kai i leu tangai u! Hini langheng hawi naichi ly achi i amjo amnauchi ne. Nichi ai patleaung u teang. Ti y baly Tameuh ly kado theu iy nangchi ai pajeng ai,” napi.
12 Huna nai khala y tosyh mang pri i miteaung keh leaung palyhreichi napi nai Jehohanan i chapo Azariah, Meshelemo i chapo Berekhia, Shalum i chapo Jehizakhia hawi Hadalai i chapo Amasachi py, tavaimichi i sa nai sai khrei y.
13 Nichi my, “Nangchi i langheng hawi nai khumichi ai hini mary theung y pakun u moh! Achi ai kado theu iy pajeng hai ai nai pa-rei, Areng i tlang tleaung y achi sa tamang u bo. Vai nangchi ly kaichi kamngo sa tleaung sa ra ai nai ngai hai u lawh bo,” napi u.
14 Hunai deaungkho y tavaimi risachi ly khumichi hawi lu sa naichi i kiu y, langheng hawi naichi hawi vawnsaichi au pi bo.
15 Khumi mipuichi ly langheng hawi naichi ai, lawmra i nga nai vawnsaichi theung i baichu ateaungchi paji pi ai nai miteaung keh leaung palyhrei vawi u bo. Miteaung kehchi ly langheng hawi naichi ateaung ai nai ateaung alangchi, phainaichi hawi teicha teinei aleu pa-rei pei pi iy, nichi i tamochira py olive asitui pajui pi bo. Atho di nai khumichi ai keaungngo kano kasau atang hai iy, Juda khu ka-peang theung i Chamleaung mary napi nai Jeriko mary y tym pa-rei tha u bo. Naibaly Israela chengchi ly Samari mary y vawi u teang nai ne.
Ahazi ly Asuria pri i kasabawmra hnei nai
(2 Areng 16:7-9)
16-17 Edom chengchi ly Juda pri theung y tavai tiu taleang bi i, khumi neangneangchi ai patiu iy langheng y hawi nai deaungkho y, samrang Ahazi ly Asuria empara samrang Tiklah Pilesa teng y, kasabawmra takeng nai ne.
18 Huni neng khala my Philistia chengchi ly Juda pri tokalawi hawi nidym mang y awm nai mawi kheutangra i marychi ai tiu u bo. Nichi ly Beth Sheme mary, Aijalon mary, Kedaro mary, Sokoh mary, Timnah mary. Kimazo mary hawi avangchi peang vui iy, huni marychira y khuteng sa u nai ne.
19 Juda samrang Ahazi ly khumichi i nga sang naichi sum hai iy, Areng i tlang tleaung y ka-ym by y nai deaungkho y, Areng ly Juda pri ai patangra tym hai bo.
20 Hunaibaly Asuria empara Tiklah Pilesa ly Ahazi ai sabawm ai nai tleaung y ly ka-awi sa iy rai naira tym hai.
21 Hunai deaungkho y Ahazi ly Achura yhm, samrang yhm hawi mipuichi i miteaung kehchi yhm i muku, tangka, yhmtheaung katui awm nai ngierei la iy, Asuria empara teng y pei i py sabawm pi y nai ne.
Ahazi i sa tamang nai kamngochi
22 Ahazi ly hina nai rai naira khri pa-rei avum nai neng khala py, Areng i tlang tleaung y vaichi khala i tleaung y kamngo sa tleaung sa ra bo.
23 Ni ly mymy ai tiu nai Suria chengchi i tameuhchi teng y apathyp. Ni my, “Suria tameuhchi ly Suria samrangchi ai sabawm. Hunai deaungkho y kai py nichi teng y apathyp baly, nichi my kai ai py ang sabawm teang ai,” nanai thui. Na i py huna nai sa nai ly ni hawi ni i khumichi tlang tleaung y patang naira tym hai bo.
24 Huni bo y Ahazi ly Achura yhm i ateaung alang ngiereichi la iy, taphra piupa nai ne. Achura yhm katheuchi py khotyp pawn iy, Jerusalem mary meingtym tleirei y maichamchi sa.
25 Ni ly Juda pri mary katheang kalen ngiereichira y, cheng takhra khumichi i tameuhchi teng y mui katuichi leng patlum ai nai myn chiu nai meingtymchi py sa. Hina nai kamta mymy i tlang tleaung y amsi pajochi i Areng Tameuh i kado theu naira tym hai nai ne.
26 Ni i peang nai angchei khala i dengdai tem khala khrairei, sa nai saichi ly Juda hawi Israela samrangchi i cha-iu theung y tajiu pi typ nai ne.
27 Ahazi dei nai khala y ni i veu ai Jerusalem mary y up teu i py, samrangchi i tapreaung y up y nai ne. Ni i chapo Hezekia ly ampo i meingtym y amtym i, samrang lyn bo.