17
Jehoshapha samrang lawm nai
1 Jehoshapha ly ampo Asa i meingtym y amtym i samrang lyn chum baly, Israela pri y tiu ai nai atho awm pa-rei sa bo.
2 Ni ly Juda pri khaw parai nai marychi, Juda daichi avangchi hawi Ephraim khu ka-peang theung i Asa my peang vui nai marychira y, my i tavaimichi khai nai ne.
3 Jehoshapha ly ampo Asa peang angchei khala i sa nai kamta, Bala tameuh ai chiu y nai deaungkho y, Areng ly ni ai amtheaung hai bo.
4 Ni ly ampo i Tameuh ai chiu iy Tameuh i leu tangai. Israela samrang i sa nai kamta so y.
5 Areng ly Jehoshapha peang nai khaw hai bo. Khumi mipuichi ly ni teng y langseaungchi syn pi. Hunai deaungkho y samrang ly nang chawn i, tahm asang bo.
6 Ni ly Areng ai chiu naira y paleung apei parai i, Juda pri i myn chiu nai meingtymchi hawi Ashara tameuh nu i tamkhawn ngiereichi ai taphra nai ne.
7 Peang nai pa-thom saneng y Jehoshapha ly bangtangchi napi nai Benhaila, Obadia, Zekhariah, Nathanela hawi Mikaiachi ai Juda pri y thui parip ai nai pato bo.
8 Nichi hawi vanrei Levi theaung leaung takawrei hawi pathyp pi nai keung leaung nyhrei abang u nai ne. Levi theaungchi ly Shemaiah, Nethaniah, Zebadiah, Asahela, Shemiramot, Jehonathan, Adonijah, Tobijah hawi Tobadonijahchi ne. Pathyp pi nai keung ly Elishama hawi Jehoram nini ne.
9 Nichi ly mymychi hawi vanrei Areng i Reita leu pei nai cha-iu syn u i, Juda mary tleirei y amki iy, khumichi teng y patiu pi bo.
Jehoshapha tahm asang nai sai
10 Areng ly tengpang sahawi i pri bawibawichi ai Jehoshapha hawi tavai atiu ai nai jei hai bo.
11 Philistia cheng phyreichi ly Jehoshapha teng y tangka neangneang hawi takhra langseaungchi syn pi. Arab cheng phyreichi my py beram amai 7,700 rei hawi mi-i amai 7,700 rei syn pi.
12 Hunai deaungkho y Jehoshapha ly sa thai naira len tleaung lenra bo. Ni ly Juda pri verei y khaw parai nai amtangrachi py,
13 cha nei vawn neangneangchi khai achu nai marychi py sa nai ne.
Samrang ly Jerusalem mary ra atiu kawp keh nai tavai luchi ai,
14 nupaichi ka-thui khai pi bo. Juda theaungchi i tavailu areng ly Adana ne i, ni i anui y tavaimi risa leaung 300,000 rei awm.
15 Pa-nyh i tavailu areng ly Jehohanan ne i, tavaimi risa leaung 280,000 reichi ai peang nai ne.
16 Pa-thom i tavailu areng ly Zikhri i chapo Amasia ne i, tavaimi risa leaung 200,000 reichi ai peang nai ne. (Amasia ly mymy kangai Areng i amtaw thau pi nai khumi ne.)
17 Benjamin theaungchi i tavailu areng ly Eliada ne. Ni ly thailiho hawi khupui syn nai tavaimi risa leaung 200,000 reichi ai peang nai khumi, atiu kawp keh nai sorai risa leaungrei py ne.
18 Ni i pa-nyh i tavailu areng ly tavai ateaung kangym awm nai tavai risa leaung 180,000 reichi ai peang nai Jehozaba ne.
19 Jerusalem mary y khai nai hini khumichi ly samrang i kalop sa u nai ne. Huni bo y Juda pri khaw parai nai marychira py, takhra tavaimi risachi ai khai nai ne.