16
Israelachi ai patang naira tym hai nai
(1 Areng 15:17-22)
1 Juda samrang Asa my peang nai saneng 36 rei saneng y, Israela samrang Basha ly Juda pri y kun iy, Juda pri y ka-ki ka-leaung so pajau y pa-rei, Ramah mary ai lengseaung apai tapang bo.
2 Hunai deaungkho y Asa ly Achura yhm hawi samrang yhm yhmtheaung katuichi khai nai yhmchi theung i, muku, tangka awm nai ngierei la iy, Damaska mary Suria samrang Benhada teng y tha i ni teng y,
3 “Kaichi ly kaimychi i ampochi kamta, amsawi amnai aso hawi sina. Hini muku, tangka ly nang i vui langseaung ne. Samrang Basha ly my i tavaimi kamkawmchi ai kai i khu ka-peang theung i dengdairei, tavai athawn hai pawn ai nai nang ly ni hawi asa nai amsawi amnai taphra iy, kai ai phai sabawm ba,” napi.
4 Benhada ly Asa i tau pei nai kamta sa ai nai ngai nai deaungkho y, mymy i tavai luchi hawi tavaimichi ai pato iy, Israela marychi ai tiu hai bo. Nichi ly Ijon mary, Dan mary, Abela Beth Maaka mary hawi Naphtali khu ka-peang theung i vawnsaichi pateung achu nai mary bawibawichi ai py peang vui nai ne.
5 Samrang Basha ly hini satang thai nai khala, Ramah mary lengseaung apai sa nai kalop anawn vui bo.
6 Huna nai khala samrang Asa ly Juda pri verei i khumichi ai palau iy, Ramah mary lengseaung apai sa naira i lengseaungchi hawi dengkeaungchi tawn hai bo. Nichi ly huni vawnsaichi hawi Keba mary hawi Mizapa mary apai tapang u nai ne.
Amo Hanani
7 Huni neng khala amo Hanani ly samrang Asa teng y chei iy, “Samrang nang ly nangmy i Areng Tameuh ai paleung pado y naimy, Suria samrang ai paleung pado lawh nai deaungkho y, Israela tavaimichi ly nang teng i nai tleaung veng bo.
8 Ethiopia hawi Libyan chengchi theung y tavai ka-ri hawi keaungngo atang nai risa neangneang abawi nai tavaimi kamkawmchi awm nai ny y a? Na i py samrang ly Areng ai paleung pado nai deaungkho y, mymy ly samrang nang ai huni tavaimi kamkawmchi ai eaung ai nai pei nai ne.
9 Areng ly mymy ai ka-ym awm nai khumichi teng y sa thai naira pei ai nai khaileaung pri verei y, hawihai palai khen patawm bo. Nang ly hawi y naira sa lawh nai y, vai i dengdairei tavai atiu nai awm jo ai,” napi.
10 Huni leu molam y Asa ly amo i tlang tleaung y kado theu i, sengkrychi hawi pakheng hai bo. Hini neng khala Asa ly khumi phyreichi ai ana amteaung bo.
Asa i peang nai tem nai
(1 Areng 15:23-24)
11 Asa i peang nai deung khala atiti tym naichi ai Juda hawi Israela samrangchi i cha-iu theung y tajiu typ bo.
12 Samrang Asa ly peang nai saneng 39 rei saneng y keaungsi man i, kheu tabai nai khala Areng teng y ahihawi y naimy, daitangchi teng y ahihawi lawh nai ne.
13 Huni bo saneng nyhrei kra baly ni ly dei i,
14 Davida mary y ni i vui sa yb nai lengseaung angawm y up bo. Khumi mipuichi ly samrang i veu ai rimuichi, rimui hangchi hawi palum iy, paleung si nai ka-ma-ra maiteaung pui kangvang sa u nai ne.