11
Shemaiah i amo leu thui nai
(1 Areng 12:21-24)
1 Samrang Rehoboam ly Jerusalem mary y tym teang nai khala, Benjamin hawi Juda theaung theung i vawi patyp nai risa leaung 180,000 reichi ai angym hai bo. Samrang ly Israela pri tosyh mang i khu ka-peangchi ai tiu iy peang vui ai nai ka-dawn awm.
2 Na i py Areng my amo Shemaiah teng y,
3 “Nangchi bawibawi ly amy i yhm y vawi u teang. Israela cheng tengtawi atiu u moh.
4 Vai, atitichi tym nai ly kai i kangai ne, nanai Rehoboam hawi Juda theaung, Benjamin theaung bawibawichi teng y thui pi,” napi. Hunichi bawibawi ly Areng i leu tangai u i, Jeroboam ai tavai tiu y naimy ali u teang nai ne.
Rehoboam my marychi khaw hai nai
5 Rehoboam ly Jerusalem mary y awm iy, Juda hawi Benjamin khu ka-peangchi ra i, hini marychi ai khaw parai pa-rei sa.
6 Bethlehem mary, Etam mary, Tekoa mary,
7 Betzura mary, Sokoh mary, Adulam mary,
8 Kath mary, Maresha mary, Zipha mary,
9 Adoram mary, Lakhisa mary, Azeka mary,
10 Zorah mary, Aijalon mary hawi Hebron marychi ne.
11 Huni marychi ai khaw parai pa-rei sa chum baly, mary tleirei y tavailu areng leaung leaungrei khai iy, asitui, kreip hang, cha nei vawn,
12 khupui hawi tivichi pateung achu bo. Hina nai kamta ni ly Juda hawi Benjamin khu ka-peangchi ai kry nai ne.
Pathyp pi nai keungchi hawi Levi theaungchi Juda pri y tym u nai
13 Israela pri verei i pathyp pi nai keungchi hawi Levi theaungchi ly tokalawi mang Juda pri y tym u bo.
14 Israela samrang Jeroboam hawi ni i kangpreangchi ly Levi theaungchi ai Areng i pathyp pi nai keung kalop sa ai nai pei u y. Hunai deaungkho y Levi theaungchi ly tawnbawi teicha patlai nairachi hawi yhm hlauchi khai su iy, Juda pri Jerusalem mary y ang pyn u pawn nai ne.
15 Jeroboam ly myn chiu nai meingtymchi ai py, vawinamchi hawi my i sa nai sicho mynchi ai chiu sa naira y py, kalop sa ai nai my i ngai nai khumichi ai, pathyp pi nai keungchi ra y khai takhra bo.Ref 11.15: 1 Areng 12:31
16 Israela chengchi i Areng Tameuh ai chiu takengkei ai ngai nai Israela theaung bawibawichi ly mymychi i Areng Tameuh teng y kapathyprachi talam ai nai Levi theaungchi hawi vanrei, Jerusalem mary y abang u nai ne.
17 Nichi ly Juda pri atho awm ali teang ai nai Solomon i chapo Rehoboam ai saneng thomrei atho pei u iy, samrang Davida hawi samrang Solomon my peang nai neng kamta awm u bo.
Rehoboam i yhm dengtheung
18 Rehoboam ly Mahlah hawi apom nai ne. Mahlah i ampo ly Davida i chapo Jerimoth ne iy, amhm ly Jese i katu, Eliaba i chaniu Abihaila ne.
19 Nini ly Jeusha, Shemaria hawi Zaham napi nai chapo leaung thomrei nga.
20 Naibaly Rehoboam ly Abasalom i chaniu Maakath hawi apom i, Abijah, Attai, Ziza hawi Shelomith napi nai chapo leaung palyhrei nga.
21 Rehoboam ly aju leaung 18 rei hawi, aju katheang leaung 60 rei awm. Ni ly chapo leaung 28 rei hawi chaniu leaung 60 reichi i ampo ne i py, my i ajuchi hawi aju katheang bawibawichi theung y Maakath ai khrei keh bo.
22 Hunaibaly samrang ly Maakath hawi nga nai chapo Abijah ai, takhra chapo chaniuchi tleaung y khrei keh nai ne i, mymy i meingtym samrang palyn ai nai vawi takhra yb nai ne.
23 Rehoboam ly tau cheng parai naimy, my i chapochi ai kalop phy pi i, Juda hawi Benjamin khu ka-peang jeungrei ra i khaw parai nai marychira y meingtym pei. Samrang ly nichi ai paawp y naimy cha nei vawnchi pei pi iy, aju neangneang la hai nai ne.