10
Tosyh mang theaungchi my tiu nai
(1 Areng 12:1-20)
1 Rehoboam ly mymy ai samrang palyn ai nai tosyh mang i Israela chengchi awm angym nai Shekhem mary y chei.
2 Samrang Solomon teng i lawira nga ai nai Aikupta pri mang y preang nai Neba i chapo Jeroboam ly huni satang thai nai khala, mymy i pri y vawi teang bo.
3 Israela pri tosyh mang i cheng theaungchi ly ni ai palau iy Rehoboam teng y chei i ni teng y,
4 “Nang i ampo ly kaichi i tlang tleaung y ji parai nai myn ang tleang bo. Nang ly ji parai nai myn hawi akawm parai nai kalopchi jang hai iy, kaichi ai tlamsa hai ai na baly, kaichi ly nang i kalopra y ka-ym awm parai naimy kasa u ai,” napi u.
5 Rehoboam my, “Kani thomrei bo y jeu u teang; huna nai khala kaimy kang pathang pi ai,” napi i, nichi ly theu u ali teang bo.
6 Naibaly samrang Rehoboam ly ampo Solomon ai tau pei nai miteaung kehchi teng y, “Huni khumichi ai kai ly mana pathang ai mo? Nangchi ati mana tau pei u ai mo?,” nanai deng.
7 Nichi my, “Nang ly huni khumichi ai pahen iy, nichi i paleung kangai pathang pi baly, nichi ly nang i kalop ra y ka-ym awm naimy sa u jojo ai,” napi u bo.
8 Na i py Rehoboam ly miteaung kehchi i tau pei nai ai dawn dang y naimy, my i tleaungri, vai i neng y mymy ai tau pei nai thawndeang deaungdichi hawi arum bo.
9 Nichi teng y samrang my, “Nangchi ly kai ai ati mana tau pei u ai mo? Mynji alaw hai ai nai ang takeng nai khumichi teng y, kai mana pathang ai mo?,” napi.
10 Nichi my, “Nang ly nichi teng y, ‘Kai i kiuchy ly kai i ampo akeng tleaung y py len keh.
11 Kai i ampo my ly nangchi i tlang tleaung y myn kaji ang tleang bo. Kaimy ly huni tleaung y ji nai myn tleang ai. Ni ly nangchi ai vuiha beang hawi ang pakhau; kai ly pakhaura vuinawn hawi kang pajeaung ai!’ nanai thui pi,” napi u.
12 Kani thomrei kani y Jeroboam hawi khumichi ly samrang Rehoboam my taviu yb nai kamta, tym u bi bo.
13 Samrang ly miteaung kehchi i tau pei nai dawndan y naimy,
14 thawndeang deaungdichi i tau pei nai kamta nichi teng y, “Kai i ampo ly nangchi i tlang tleaung y mynji angtleang bo; kai ly huni tleaung y ji nai myn kang tleang ai. Ni ly nangchi ai vuihabeang hawi ang pakhau. Kai ly pakhaura vuinawn hawi kang pajeaung ai!” nanai kado theu naimy pathang pi bo.
15 Samrang ly hina nai mipuichi i leu tangai y nai ly amo Ahijah dengdairei Neba i chapo Jeroboam teng y leu pei nai kamta tym hai ai nai Areng Tameuh i kangai ne.
16 Samrang ly mychi i leu tangai pi ai ny y leang bo, nanai pany nai khala khumichi ly “Achi ly Davida hawi ni i yhm dengtheungchi teng i ati phy py ngo y. Jese i chapo teng i achi ly ati kamtym py ngo y leang. Aw Israela khumichi awi, amychi yhm mang phai vawi u sina! Rehoboam ly mymy i yhm dengtheungchi phai khen na sy!,” nanai aeu u.Ref 10.16: 2 Sam 20:1
Hunaibaly Israela khumichi my tiu nai deaungkho y,
17 Rehoboam ly Juda khu ka-peang y awm nai khumichi ai naini peang khyh bo.
18 Huna nai khala samrang Rehoboam ly kalop ram sa nai kamkawm lu Adoniram ai Israela pri y pato. Na i py Israela khumichi my ni ai lengseaung hawi aphi ka. Naibaly Rehoboam ly my i ka-ri tleaung y atang kaliki iy, Jerusalem mary mang y angpreng vui bo.
19 Naibaly huni neng dengdairei Israela pri tosyh mang i khumichi ly Davida i samrang kangpreangchi ai vaini khrairei tiu u nai ne.