29
Achura yhm sa ai nai vui katalamra vawnsaichi
1 Samrang Davida ly khumi mipui bawibawichi teng y, “Kai i chapo Solomon ly Tameuh my vawi takhra nai khumi ne. Na i py saneng theang i pany nai sai angym y rai. Ni i sa ai nai kalop ly khri pa-rei len parai. Ati mana nai mo na baly vai sa ai nai ly khumichi i vui samrang yhm ny y, Areng Tameuh i vui Achura yhm ne lawh nai deaungkho y ne.Ref 29.1-2: 1 Neng 22:5
2 Kai ly Achura yhm sa ai nai vawnsaichi muku, tangka, kheupaja, tamo, dengkeaung, vang kateng lengseaung, vang kateng lengseaung hawi mawi sa naichi hawi, leungtau kangleung neangneangchi angveirym ai nai khri pa-rei atho kasa nai ne.
3 Kai ly hini katalamra vawnsai bawibawichi bo y, kaimy i muku hawi tangka py katalam nai ne. Ati mana nai mo na baly kai ly Tameuh i Achura yhm ai khri pa-rei khrei nai deaungkho y ne.
4 Kai ly muku tangcheng sie 168,625 rei hawi, Achura yhm dengpangchi ka-pu sa ai nai,
5 kupe kakawpchi sa ai nai awm nai ngierei tangka chang sie 390,875 rei py katalam bo. Vai ly Areng i vui y paleung apei parai naimy ami talam ai mo?,” napi.
6 Huna nai khala nupaichi ai lu sa naichi, cheng theaungchi ai lu sa nai miteaung kehchi, tavailu arengchi hawi samrang i vawnsai kry nai khumichi ly Achura yhm i vui, ngai parai nai paleung hawi talam ai nai adeu u bo.
7 Nichi ly muku kaji sie 250,750 rei, tangka kaji sie 501,500 rei, kheupaja kaji sie 914,500 rei hawi tamo kaji sie 501,500,0 rei talam u nai ne.
8 Vang kateng lengseaungchi awm nai khumichi ly hunichi ai Levi theaung Kerashon nupaichi theung i Jehiela my kry nai Achura yhm i vui yhmtheaung katuichi khai nai takun puira khai u bo.
9 Nichi ly paleung kangai hawi Areng teng talam u nai ne i, mymychi hina tanrei pei talam u nai molam y, amo theu u bo. Samrang Davida py khri pa-rei amo theu nai ne.
Davida my Tameuh ai palo nai
10 Davida ly huni meingtym y awm nai khumi mipuichi i mo y Areng ai palo. Samrang my, “Kaichi i amsi pajo Jakob i Areng Tameuh, nang teng y ly deungtasarei palo nai awm sy!
11 Nang ly nang parai iy sa thai naira phum-ang, haiho, nang parai naira kawi angym nai ne. Kani khusang hawi khaileaung salo y awm nai ngiereichi peang iy, nang ly khumi cheng cheaungkhangchi ai, sa thai naira phum-ang hawi peang nai samrang ne.
12 Nang chawn nai hawi yhmtheaung katui nang nai ngiereichi ai, nangmy pei nai ne. Nang ly ati cheaungkhangchi ai sa thai naira haiho hawi peang iy, amimi ai py tahm pasang pi bo.
13 Kaichi i Tameuh, kaichi ly nang ai kawn naimy palo iy, nang i amyn nang parai nai ai kang palo u nai ne.
14 “Meitang khyp, kai hawi kai i khumichi ly nang teng y ati sai py talam pajau y leang. Ati cheaungkhangchi ly nangmy pei nai amtheaung nairachi ne nai deaungkho y, kaichi ly nang i atitichi naini, nang teng y talam teang nai ne.
15 Aw Areng, kaichi ly amsi pajochi kamta, pri pala naira avum naichi hawi apany vai y naichi kamta, hini deung y kaheng u nai bo, nanai nang ly pany. Kaichi i neng kanichi ly pa-pui kamta ne i, kaichi ly dei naira ai en vui thai y.
16 Aw Areng, kaichi i Tameuh, nang i chai parai nai amyn tahm pasang ai nai, Achura yhm sa ai nai molam hini vawnsaichi kang syn pi bo. Na i py hini vawnsai bawibawichi ly nang i pei naichi ne iy, hunichi ai nangmy peang nai ne.
17 Nang ly khumi lutengchi i paleung khen iy, khumi meitangchi ai nang ly tamen, nanai kaichi pany. Kai ly paleung ka-dawn kahawi hawimy, hini vawnsaichi nang teng y kang talam bo. Hini meingtym y awm achu nai nang i khumichi py, nang teng y talam ai nai nga nai deaungkho y, mana tanrei amo theu u na mo, nanai kai ly niu bo.
18 Kaichi i amsi pajochi napi nai Abraham, Isaka hawi Jakobchi i Areng Tameuh, hina nai Tameuh teng y paleung apei nai ka-dawn ly nang i khumichi i paleung theung y khaw parai naimy awm hai jojo sy. Nichi ly nang i tlang tleaung y ka-ym awm na sy.
19 Nang i leu pei naichi ai paleung hawi verei tangai ai ngai nai paleung ka-dawn py, Achura yhm cheang pa-rei paleung hawi verei sa ai ngai nai paleung py, kai i chapo Solomon teng y pei pi kyh ba. Huni Achura yhm i vui kai ly hini atitichi angveirym bo,” nanai chiu sa.
20 Hunaibaly Davida ly khumichi teng y, “Nangchi i Areng Tameuh ai palo u!,” nanai leu pei bo. Huna nai khala khumi mipuichi ly mymychi amsi pajochi i Tameuh napi nai Areng ai palo u. Nichi ly Areng i mo y hawi, mymychi i samrang mo y lu meung u nai ne.
21 Kani pa-nyh nichi ly kapathypra tawnbawichi tleh iy, Areng teng talam chum baly khumichi cha ai nai pei pi. Nichi ly kreip hang katalamrachi py syn u. Huni bo y nichi ly si katai sangrei, beram katai sangrei hawi beram cho sangreichi ai maicham salo y, bom verei leng patlum u.
22 Hunai deaungkho y huni kani Areng i mo y cha nei u i, amo theu u bo.
Nichi my Solomon ly samrang ne, nanai tlen pa-nyh satang thai hai bi bo. Ni ai mymychi i samrang ne, nanai py, Zadok ly pathyp pi nai keung ne, nanai py, Areng i amyn y asitui leng pi u nai ne.
23 Hunai deaungkho y Solomon ly ampo i meingtym y amtym iy, Areng my khaw hai nai areng atehra tleaung y ateh bo. Ni ly eaung nai samrang ne. Israela cheng vereichi my py, ni i leu tangai u.Ref 29.23: 1 Areng 2:12
24 Miteaung kehchi hawi sorai risa bawibawichi hawi Davida i takhra chapochi ly samrang Solomon i tlang tleaung y, ka-ym awm ai, nanai adeu u bo.
25 Areng ly Israela cheng bawibawichi i mo y Solomon ai khri pa-rei tahm pasang iy, takhra mani Israela samrangchi py ngo vai y nai phum-ang kawi angym hai nai ne.
Davida i peang nai satang kadawi
26 Jese i chapo Davida ly Israela pri verei y saneng vui palyhrei peang nai ne.
27 Ni ly Hebron mary y saneng saryhrei, Jerusalem mary y saneng phai palyh thomrei peang.Ref 29.27: 2 Sam 5:4-5; 1 Neng 3:4
28 Ni ly khri pa-rei yhmtheaung katui nang chawn iy, khumichi my tahm khai i, khri pa-rei miteaung acheang nai khala dei nai ne.
29 Samrang Davida i satang ai angchei khala i dengdai tem pa-rei, Samuela, Nathan hawi Kad napi nai amo leaung thomreichi i recordchi ra y tajiu typ bo.
30 Huni amochi ly samrang Davida i pri peang nai sai hawi sa thai naira len nai saichi py, ni i avum nai leaungsaichi hawi vanrei, Israela pri hawi tengpang sahawi i prichi i satang bawibawichi ai py, pany hai nai ne.