27
Tavai leaungsai hawi mary leaungsai kamkawm
1 Hini ly samrang i kalop sa pi nai Israela cheng yhm dengtheung luchi, nupai luchi hawi pri peang nai miteaung kehchi i charangchi ne. Nichi ly khumi leaung 24,000 rei awm nai kamkawmchi phy iy, lorei y kamkawm harei kalop sa u bo. Huni kamkawm hahareichi ai, tavailu areng leaungrei my peang nai ne.
2-15 Lo lorei kalop amsi nai tavailu arengchi ly:
Angchei lo y ly Zabadiel i chapo Jashobeam. (Ni ly Juda theaung Perez i nupai theung y abawi.)
Pa-nyh lo y ly Ahohi i kangpreang Dodai ne.Ni i bangtang tavailu areng ly Mikalo.
Pa-thom lo y ly pathyp pi nai keung Jehojada i chapo Benaia ne. Ni ly amyn amthang nai sorai leaung phaireichi i lu ne. (Ni i chapo Amizaba ly ni i kalop amtym ai nai nga i, tavailu areng lawm bo.)
Palyh lo y ly Juaba i amnau Asahela ne. (Ni i chapo Zebadiah ly ni i amtym ai nga nai ne.)
Pa-ngo lo y ly Izaha i chapo Shamhuth.
tariu lo y ly Tekoa mary i Ikesa i chapo Ira.
saryh lo y ly Pelon mary i Ephraim theaung Heleza.
Taja lo y ly Husha mary i Sebekai ne. (Ni ly Juda theaung Zerah nupai theung i ne.)
Takaw lo y ly Anatho mary Benjamin theaung ka-peang i Abieza.
Lo horei khala ly Netopha mary i Maharai. (Ni ly Zerah nupai theung i ne.)
Lo holai harei khala ly Pirathon mary Ephraim theaung ka-peang theung i Benaia.
Lo holai nyhrei khala ly Netopha mary i Heladai. (Ni ly Othniela kangpreang ne.)
Israela cheng theaungchi ai peang nai keungchi
16-22 Hinichi ly Israela cheng theaungchi ai peang nai miteaung kehchi ne.
23 Areng my Israela khumichi ai kani mang i ka-sichi kamta peung hai ai, nanai adeu pi nai deaungkho y, samrang Davida ly saneng apomrei anui khumichi ai amyn vuikanai lo y.Ref 27:23: AA 15:5, 22:17, 26:4
24 Zeruiah i chapo Juaba ly khumi vuikanai tlenrei la i py, angym bawi y nai ne. Hini amyn vuikanai la nai molam y, Tameuh my Israela chengchi ai pajeng bo. Na i py amyn vuikanai la nai vuikanai ly samrang Davida i recordchi ra y tajiu nai by leang.Ref 27.24: 2 Sam 24:1-15; 1 Neng 21:1-14
Samrang i vawnsaichi kry pi nai keungchi i vuikanai
25-31 Samrang i vawnsaichi kry pi nai keungchi i amyn vuikanai ly anui mang ichi ne.
Samrang i vawnsai khai nai takun puichi ai Adiela i chapo Azimava my kry.
Awm nai meingtym i vawnsai khai nai takun puichi ai Uzia i chapo Jonathan my kry.
Li hlau sa naichi ai Khelu i chapo Ezari my kry.
Kreip akhochi ai Ramah mary i Shimei my kry.
Kreip hang khai naira takunchi ai Shepham mary i Zabdi my kry.
Nidym mawi kheutang ra i olive keungchi hawi thaidu keungchi ai Kederi mary i Bela Hanan my kry.
Asitui khai nai takun ai Josha my kry.
Sharon adymra i sichi ai ly Sharon mary i Shiratai my kry.
Leaunghawichi ra i sichi ai ly Adalai i chapo Shaphat my kry.
Kula-iuchi ai ly Ismaela theaung Obil my kry.
Keaungngo kano kasauchi ai ly Merono mary i Jedeia my kry.
Beram hawi Mi-ichi ai ly Hakara theaung Jazi my kry nai ne.
Davida ai tau pei nai bangtangchi
32 Davida i ampochy Jonathan ly pany kawp iy tau pei pajau nai khumi kacheng ne. Ni hawi Hakhamoni i chapo Jehiela nini ly samrang i chapochi ai cha patiu pi.
33 Ahithophela ly samrang ai tau pei nai keung ne. Akhi mary i Hushai ly samrang i ahawi, arum apang nai keung ne.
34 Ahithophela dei nai bo y, Abiatha hawi Benaia i chapo Jehojada nini ly tau pei nai keung lawm bo. Juaba ly samrang i tavailu areng keh ne.