26
Achura yhm tamcheaung risachi
1 Achura yhm tamcheaung risachi ai phy pi nai kalopchi ly anui mang i kamta ne. Korah i nupaichi theung i Asap i yhm dengtheungra y Kore i chapo Meshelemia napi nai awm.
2 Ni ly Zekhariah, Jedeaela, Zebadiah, Jathaniela,
3 Elam, Jehohanan hawi Elioenai napi nai kalen ka-thui chapo leaung saryh awm nai ne.
4 Obed Edom ai py Tameuh my chapo leaung tajarei amtheaung hai bo. Hunichi kalen ka-thui na baly, Shemaiah, Jehozaba, Joah, Sakha, Nethanela,Ref 26.4-5: 2 Sam 6:11; 1 Neng 13:14
5 Amiela, Isakhar hawi Peulethaichi ne.
6-7 Obed Edom i chapo chalu Shemaiah ly chapo leaung tariurei awm; nichi ly atho ham parai iy aly len nai khumichi ne. Nichi ly Othani, Rephael, Obed, Elazaba, Elihu hawi Semakhiachi ne. Kangkhym i chapo leaung nyhrei ly ami tleaung y sa thai naira awm nai ne.
8 Obed Edom i yhm dengtheungchi ra y hini kalop i vui khri pa-rei sa thai naira kawi angym nai khumi leaung 62 rei awm.
9 Meshelemia yhm dengtheungchi ra y sa thai naira kawi angym nai khumi leaung holai tajarei awm.
10 Merari i yhm dengtheungra y Hosah napi nai khumi leaungrei awm. Ni teng y Shimri (Shimri ly chapo chalu ny y teu i py, ampo my khai nai deaungkho y miteaung keh lawm bo.)
11 Hilikia, Tebaliah hawi Zekhariah napi nai chapo leaung palyhrei awm. Hosah i yhm dengtheung ra y Achura yhm risa leaung holai thomrei awm nai ne.
12 Achura yhm tamcheaungchi ai yhm dengtheungchi ka-thui kamkawmchi sa iy, takhra Levi theaungchi kamta, kalopchi phy pi bo.
13 Khumi nawi nai di nai dawn y naimy, yhm dengtheung tleirei mymychi typ ai tla nai katheu pa-kho ai tambe va iy typ u nai ne.
14 Shelemiah ly nisi katheu pa-kho nga iy, ni i chapo Zekhariah ly tosyh katheu pa-kho nga. Ni ly tau kahawi pei reng nai khumi ne.
15 Obed Edom ly tokalawi katheu pa-kho tym ai nai tla. Ni i chapochi ly vawnsaichi khaira takun puichi typ ai nai tla.
16 Shupim hawi Hosah nini ly nidym katheu pa-kho hawi tleng mang i lamra awm nai Shalekhi katheu pa-kho typ ai nai tla. Tamcheaung typ ai nai neng kamtleh sa nai ne.
17 Nisi ngan mang y tamcheaung risa leaung tariurei, tosyh ngan mang y leaung palyhrei hawi tokalawi ngan mang y leaung palyhrei, kani tleirei typ nai ne. Vawnsaichi khai nai takun puichira y, takun pui harei ly leaung tariurei, kani tleirei risa leaung palyhrei typ ai nai tla.
18 Nidym ngan mang i meaungjai sahawi lam salo y tamcheaung risa leaung palyhrei hawi, aleaungra kheupo ra y leaung nyhrei.
19 Hini ly Korah i yhm dengtheung hawi Merari i yhm dengtheungchi ai tamcheaung kalop phy pi nai saichi ne.
Achura yhm y sa nai takhra kalopchi
20 Takhra Levi theaungchinote 26:20\xk takhra Levi theaungchi: Hebrai leu y “Ahijah” napi. \x*ly Achura yhm i yhmtheaung katui khaira yhm hawi Tameuh teng talam nai katalamra vawnsaichi khai nai takun puichi ai kry.
21 Kerashon i chapo Ladan ly Jehiela yhm dengtheungchira abawi nai yhm dengtheungchi i amsi pajo ne.
22 Ladan i chapochi napi nai Zetham hawi Joela nini ly Achura yhm i yhmtheaung katui khaira yhm hawi vawnsaichi khaira takun puichi kry nai ne.
23 Amaram i kangpreangchi napi nai Izaha, Hebron hawi Uzielachi ai py kalopchi phy pi.
24 Mosi i chapo Kerashom nupai theung i Shebuela ly Achura yhm i yhmtheaung katuichi khai nai yhm typ naichi i miteaung keh kalen ne.
25 Ni ly Kerashom i amnau Elieza hawi amtawn iy, Shelomith i amjo amnau lawm nai ne. Elieza i chapo ly Rehabia, Rehabia i chapo ly Jeshaia, Jeshaia i chapo ly Joram ne. Joram i chapo ly Zikhri, Zikhri i chapo ly Shelomith ne.
26 Shelomith hawi ni i yhm dengtheungchi ly Tameuh teng y, samrang Davida, yhm dengtheung luchi, nupaichi ai lu sa naichi hawi tavai luchi my talam nai katalamra vawnsaichi kry ai tla nai ne.
27 Nichi ly tavai atiu naira i nga nai vawnsai phyreichi la iy, Achura yhm y teaung ai nai talam u bo.
28 Shelomith hawi ni i yhm dengtheungchi ly amo Samuela, Samrang Sawla, Nera i chapo Abana hawi, Zeruiah i chapo Juabachi my syn nai katalamra vawnsaichi raurei, Achura yhm y teaung ai nai talam nai ngiereichi ai kry u nai ne.
Takhra Levi theaungchi i kalopchi
29 Izaha kangpreangchi theung i Khenania hawi chapochi ly atiti charangchi kry nai hawi, Israela khumi tengtawi ka-jo ka-thuichi padyh pi nai, hunichi kry nai kalop ne.
30 Hebron kangpreangchi theung i Hashabiah hawi ni i amjo amnau leaung 1,700 reichi ly Jordan tavo nidym mang i, Israela chengchi i reita hawi mary theung i atiti leaungsai ngiereichi ai kalop pacheang nai ne. Nichi bawibawi ly kawp katlen nai khumichi ne.
31 Jeria ly Hebron i kangpreangchi theung y lu sa nai ne. Samrang Davida i peang nai saneng 40 rei nai khala y, Hebron i kangpreangchi ai hau cham i, huni kangpreangchi theung y kawp katlen nai risachi ly Kilead pri Jaza mary y awm, nanai avum bo.
32 Samrang Davida ly Jeria i amjo amnauchi theung y kawp katlen nai yhm dengtheung lu leaung 2,700 reichi ai vawi takhra iy, Ruben pri, Kad pri hawi Manase nisi mangchi ai, reita hawi mary theung i atiti leaungsai ngiereichi kalop pacheang ai nai kalop pei nai ne.