18
Davida i tavai eaung naichi
(2 Sam 8:1-18)
1 Naibaly neng kra kyh nai bo y samrang Davida ly Philistia chengchi hawi atiu i eaung bo. Ni ly kath mary tengpang i avangchi py peang nai ne.
2 Moba chengchi ai py tiu i, eaung nai deaungkho y nichi ly ni i peang nai anui y awm u iy, kahmchi pei u bo.
3 Hunaibaly samrang Davida ly Hamath mary sahawi y Zobah samrang Hadadeza ai tiu. Ati mana nai mo na baly Hadadeza ly Euphrat tavo tleaung mang i khu peang vui ai nai atho sa nai deaungkho y ne.
4 Davida ly huni samrang i tavai ka-ri sangrei, keaungngo atang nai risa leaung 7,000 rei hawi tavaimi risa leaung 20,000 reichi ai patiu nai ne. Ni ly tavai ka-ri chungvairei i vui aly ngai nai keaungngochi la vui chum baly, takhra keaungngochi ai ly kheu pakhaupe vui iy, kheu tabai hai vui bo.
5 Damaska mary i Suria chengchi ly samrang Hadadeza ai sabawm ai nai tavaimi kamkawm harei pato u. Samrang Davida ly nichi ai tiu iy, khumi leaung 22,000 reichi ai padei nai ne.
6 Hunaibaly huni khumichi i khu theung y tavai tairachi sa. Nichi py samrang Davida i anui y awm u i, kahm pei u ai tla. Areng ly samrang Davida ai meingtym tleirei y eaung hai bo.
7 Davida ly Hadadeza i miteaung kehchi syn nai khopuichi la pi vui iy, Jerusalem mary y syn vui nai ne.
8 Ni ly Hadadeza i peang nai Tibahath mary hawi Kun marychira i, kheupaja neangneangchi py la pi pawn. (Kangkhym i neng y huni kheupajachi ai samrang Solomon my tuikan yhmmawm puichi, Achura yhm i vui khauchi sa nai ne.)Ref 18.8: 1 Areng 7:40-47; 2 Neng 4:11-18
9 Samrang Davida ly samrang Hadadeza i tavaimi kamkawm vereichi ai pajau vui bo, nanai Hamath samrang Toi thai nai khala,
10 samrang Davida teng kawn nai leu thui ai nai hawi tavai eaung nai molam y amo theu nai sai pany hai ai nai chapo Joram ai pato. Joram ly samrang Davida i vui muku, tangka, kheupajachi hawi sa nai langseaungchi syn.
11 Samrang Davida ly huni vawnsaichi ai mymy i tavai eaung nai Edom pri, Moba pri, Ammon pri, Philistia pri hawi Amalek pri y awm nai khumi cheng cheaungkhangchi teng i nga nai muku, tangka hawi vanrei, chiu sa naira y teaung ai nai talam bo.
12 Zeruiah i chapo Abisai ly palawi leaunghawi ra y Edom khumi leaung 18,000 reichi ai padei bo.Ref 18.12: Sam 60 (Title)
13 Ni ly Edom pri verei y tavai tairachi sa iy khai nai deaungkho y, huni meingtym y awm nai khumichi ly Davida anui i khumichi lawm u bo. Areng ly Davida ai meingtym tleirei y eaung naira pei nai ne.
14 Davida ly Israela pri verei y peang iy, mymy i khumi bawibawichi tlang tleaung y leu meitang adyh adawi naimy peang jojo bo.
15 Abisai i amnau Juaba ly tavailu areng keh ne iy, Ahilud i chapo Jehoshapha ly recordchi kry nai keung ne.
16 Ahitub i chapo Zadok hawi Abiatha i chapo Ahimelek ly pathyp pi nai keungchi ne. Seraiah ly samrang yhm secretary ne.
17 Jehoiada i chapo Benaia ly Davida i tamcheaung risa, samrang Davida i chapochi ly tahm asang nai meingtymchira y samrang i kalopchi sa u nai ne.