17
Samrang Davida teng y amo Nathan my leu pei nai
(2 Sam 7:1-17)
1 Vai ly samrang Davida ly mymy i yhm y awm nai ne. Kanirei nai khala ni ly amo Nathan ai palau iy, “Kai ly saitleang keung hawi sa nai yhm y awm. Tameuh i Leu Maikawm Pawm ly tai theung y awm nai ne!” napi.
2 Nathan my, “Nangmy i dawn nai kamta so ba. Tameuh ly nang hawi vanrei awm nai ne,” napi.
3 Na i py huni vum Tameuh my Nathan teng y,
4 “Kai i miseaung Davida teng y chei iy ni ly kai i awm ai nai Achura yhm sa ai nai khumi ny y leang, nanai thui pi.
5 Israela chengchi ai Aikupta pri i nai kaimy pahawi nai neng dengdairei, kai ly mana khala py, Achura yhm y awm vai y leang. Taichira y naini ka-awi iy, meingtym harei i nai meingtym harei mang y ang pyn.
6 Israela khumichi hawi vanrei amki nai meingtym tleirei y, kai ly kaimy i vawi takhra nai mani luchi teng py, ‘Nangchi ly kai i vui saitleang keung hawi Achura yhm so,’ nanai thui pi vai y leang.
7 “Hunai deaungkho y kai i miseaung Davida teng y ati cheaungkhang sa thai nai keung Areng my leu pei nai ly ‘Kai ly nang ai beramchi typ naira i nai kang palau iy, kai i khumi Israela chengchi i samrang y palyn bo.
8 Nang i chei naira tleirei y kai ly nang hawi vanrei awm. Nang i lam y awm nai paleung ka-echi ai kaimy patheu pawn iy eaung hai bo. Khaileaung pri y len keh nai khumichi kamta, nang ai kaimy amyn amthang hai ai.
9-10 Kai ly kaimy i khumi Israela chengchi awm ai nai meingtym vawi takhra iy, nichi ai meingtym tahyh pi bo. Nichi ly mo mang y mana khala py, pahyp y naimy ana nai avum u ai ny y. Hini pri y kun nai neng dengdairei, khrukhra hai nai khumichi my tiu nai avum teu i py, mo mang y avum bi ai ny y. Kai ly nang i paleung ka-e bawibawichi ai pajau vui ai, nang i cheng theaungchi py khaw hai ai nai adeu bo.
11 Nang ly dei iy amsi pajochi i tapreaung sahawi y up nai khala, kai ly nang i chapo leaungrei ai samrang palyn iy, ni i pri khaw hai ai.
12 Ni ly kai i vui Achura yhm sa pi ai. Kai py ni i samrang kangpreang khaw hai jojo ai.
13 Kai ly ni i ampo lawm ai. Ni py kai i chapo lawm ai. Kai ly nang ai samrang palyn ai nai Sawla ai paheng vui iy, kai i kasabawmra vym vui nai kamta, nang i chapo teng i vym pi vui ai ny y.Ref 17.13: 2 Kor 6:18; Heb 1:5
14 Kai i khumi hawi kai i pri y kry jojo ai nai, ni teng y au ai. Ni i samrang kangpreang ly mana khala py avaw vui ai ny y,’ nanai thui pi,” nanai Nathan teng y leu pei nai ne.
15 Nathan ly Tameuh my thui pi nai leu ngiereichi ai, Davida teng y amti pi bo.
Davida i kawn naimy chiu sa nai
(2 Sam 7:18-29)
16 Samrang Davida ly Areng i tai theung y kun iy ateh naimy chiu sa nai ly “Aw Areng Tameuh, kai hawi kai i yhm dengtheungchi ly nang i atiti sa pi naichi hawi ataing y leang.
17 Na i py nang ly huni tleaung y chang y nai atitichi sa pi bo. Vai mo mang i sanengchi khala kai i kangpreangchi i vui mana sa pi ai mo, nanai adeu pi bo. Aw Areng Tameuh, nang ly kai ai khumi kalen leaungrei lawm ai nai pany pi yb bo.
18 Hini tleaung y mana hnei takeng ai mo! Nang ly kai i satang hawihai palai pany i py, nang i miseaung kai ai tahm pasang bo.
19 Momang i neng y kai ly khumi kalen lawm ai nai amteng hai nai py, kai i vui hinichi sa ai nai paran nai py, nang i kangai ne.
20 Aw Areng, nang hawi ly ami py atawm y. Nang leaungrei naini Tameuh ne, nanai kaichi my pany jojo bo.
21 Khaileaung pri y Israela chengchi hawi atawm nai khumi cheng by y. Nichi ly nangmy i khumichi lawm ai nai miseaung i nai atleu pi bo. Nichi i vui nang i sa pi nai atitichi molam y, amyn amthang nai ly khaileaung pri verei y ahei nai ne. Nang ly nangmy i khumichi ai Aikupta pri i dengdairei atleu iy, nichi theu u nai khala, cheng takhra khumichi ai paryh pawn bo.
22 Nang ly Israela chengchi ai nangmy i khumichi lawm hai jojo. Aw Areng, nang ly nichi i Tameuh lawm bo.
23 “Naibaly aw Areng, kai hawi kai i kangpreangchi i vui nang i adeu pi nai kamta, vaimy nang i kangai angym hai ba. Nangmy sa pi ai, nanai leu pei nai kamta, so pi jojo kyh ba.
24 Nang i satang ly amthang ai. Khumichi my py, ‘Ati cheaungkhang sa thai nai keung Areng ly Israela cheng bawibawichi i Tameuh ne,’ nanai thui u jojo ai. Kai i samrang kangpreang py khaw hai jojo ai.
25 Nang ly nangmy i miseaung kai ai hini atitichi patei pi nai py, kai i kangpreangchi ai samrang y tahm pasang pi ai nai leu pei nai molam py, kai ly nang teng y hnei takeng vam nai ne.
26 Aw Areng, nang ly Tameuh ne. Kai teng y hini lyh ai awm naichi adeu pi bo.
27 Kai i kangpreangchi ly nang i mo y meimai nga jojo ai nai, nichi ai amtheaungra pei pi ai nai kang takeng. Aw Areng, nang ly nichi ai amtheaung naira pei pi bo. Nichi ly nang teng i amtheaung naira ngo jojo sy,” nanai chiu sa nai ne.