SAM 9
Leu meitang adyh adawi nai y Tameuh teng y kawn nai leu thui nainote Hebrai cha lu: Davida i thui nai Sam.
1 Aw Areng, kai ly paleung hawi verei my nang ai palo ai;
nang i sa nai rengrang tlai naichi amteng hai ai.
2 Nang i saho y amo theu naimy khulym thui ai.
Ati cheaungkhang sa thai nai Tameuh,
kai ly nang teng y palo nai khulym thui ai.
3 Nang jeu nai khala y kai i paleung ka-echi ly anaw iy, angpreng pawn veng bo.
Nichi ly atlym iy dei u bo.
4 Nang ly bailang salo y ateh iy, leu meitang tara chih pi bo;
Kai i hawi ai naira molam y tara chih pi nai ne.
5 Nang ly Tameuh ai pany y nai khumichi ai pajeng bo;
khumi hawi y naichi ai taphra pawn nai deaungkho y
nichi i cheng ly myh vui ai.
6 Kaichi i paleung ka-echi ly sum jojo nai ne.
Nang ly nichi i mary puichi ai taphra nai deaungkho y
hunichi ai tami iy, tama hai pawn veng bo.
7 Na i py Areng ly deungtasarei samrang ne.
Mymy ly tara chih ai nai atehra bailang sa bo.
8 Khaileaung pri y leu meitang naimy peang iy,
khumi cheng cheaungkhangchi ai adyh adawi naimy tara chih nai ne.
9 Areng ly ana patang naira avum naichi i abyhra hawi,
ngari kamtang avum nai neng khala chymme naira ne.
10 Aw Areng, nang ai pany nai khumichi ly nang ai ym u ai;
nang ly nangmy teng y ahihawi nai ngiereichi ai khai su y leang.
11 Zion mary ai peang nai keung Areng ai ly palo nai khulym thui u!
Mymy i sa nai leaungsaichi ai khumi cheng cheaungkhangchi teng y thui pi u!
12 Tameuh ly patang naira avum naichi ai pany pi jo nai ne.
Nichi i aeu nai raawi tami pi y leang.
Nichi i tlang tleaung y hawi y sa nai khumichi ai pajeng nai ne.
13 Aw Areng, kai ai pahen kyh ba!
Paleung ka-echi molam y kai ly mana tanrei ngari kamtang avum na mo,
nanai pany pi kyh ba!
Aw Areng, kai ai deira i nai atleu kyh ba.
14 Huna nai khala naini kai ly Jerusalem mary khumichi i mo y angdo iy,
nang i nang parai nai sai bawibawi amteng hai pajau ai.
Nang i atleu pi nai sai molam y kai ly amo theu ai.
15 Myn y chiu nai khumichi ly mychi i tai nai angawm theung y tla u.
Mymychi i pateung nai deaungra y my, man u ali teang bo.
16 Areng ly leu meitang naimy tara chih nai deaungkho y,
mymy ai amthang hai bo.
Khumi hawi y naichi ly mychi i sa nai sai molam y,
mychi ai man u ali teang nai ne.
17 Tameuh ai khai su nai khumi bawibawichi hawi,
khumi hawi y nai bawibawichi ly dei naira y lam tem u ai.
18 Tameuh ly ngari kamtang avum naichi ai mana khala py tami vai y leang.
Khumi kamawnchi py deungrei athang khai naira by y nai lawm u ai ny y.
19 Aw Areng, jeu kyh ba! Nang i tlang tleaung y khumichi my amtang ai nai pei moh!
Myn y chiu nai khumichi ai nang i mo y jeu hai ly
nichi ai tara chih ba.
20 Aw Areng,
nichi teng y jei hyn naira tym hai ba.
Mychi ly dei ai nai khumi teu, nanai pany hai ba.