SAM 80
Pri palum teang ai nai chiu sa nainote Hebrai cha lu Asaph i thui nai Sam, pany hai nai.
1 Israela chengchi i beram typ nai keung awi,Ref 80.1: Theu 25.22
kaichi i hnei takeng nai tangai pi kyh ba.
Beram kanghuchi ai pahawi nai keung awi,
kaichi i hnei takeng nai tangai pi kyh ba. Kheruben salo y awn nai keung awi,
2 Ephraim, Benjamin hawi Manase cheng theaungchi teng y
amteng iy sa thai naira patei naimy jeu ly
3 Aw Tameuh, kaichi ai vawi ali teang hai kyh ba!
Kaichi teng y pahen naira pei kyh ba; naibaly kaichi ly atleu naira nga u ai!
4 Ati cheaungkhang sa thai nai keung Areng Tameuh,
nang ly mana tanrei, nangmy i khumichi chiu sa nai ai
kado theu naimy awm ai mo?
5 Nang ly kaichi ai paleung si naira napi nai teicha teinei pacho iy,
meikatui napi nai tui ly khau kalen pui hawi panei bo.
6 Nang ly kaichi i pri ai, tengpang y awm nai prichi i tavai atiura meingtym lawm hai bo;
paleung ka-echi ly kaichi ai khumi aniu y bo.
7 Ati cheaungkhang sa thai nai keung Tameuh! Kaichi ai vawi hai ali teang kyh ly
nang i pahen naira kaichi teng y patei kyh ba;
hunaibaly kaichi ly atleu naira nga ai!
8 Nang ly Aikupta pri i kreip keung syn iy,
cheng takhrachi ai patheu pawn chum baly, nichi i pri y huni kreip keung ui bo.
9 Nang ly kreip keung prau thai ai nai meingtym palum pachai pi bo;
huni keung ly thiu parai pa-rei tangjyn aviu i, pri verei y khiu na bo.
10 Huni kreip keung ly mawi aheungchi ai, my i ka-khui hawi khiu meuh iy,
len parai nai saitleang keungchi ai, my i changpichi hawi khiu hai meuh bo.
11 Huni i changpi ly Mrethe pangli y khrairei py,
palo parai nai Euphrat tavo tym pa-rei py amjang na.
12 Huni keung kamki akawm nai apaichi ai, nang ly ati mana nai y aphrei vui lawh mo?
Vai ly huni sahawi mang aki aleaung nai khumi luteng ly
kreip athaichi paviu ai nai nga bo.
13 Sumtavui sumngaichi ly huni keung ai chiu piupa iy,
daichi amso mawichi ly cha u nai ne.
14 Ati cheaungkhang sa thai nai keung Tameuh!
kaichi teng y jeu ali teang kyh ba;
kani mang dengdairei khen kathiu iy jeu ly
nangmy i khumichi ai atleu kyh ba!
15 Jeu ly nangmy kypkyp ui iy,
keung cheang pa-rei bawn nai kreip keung ai atleu kyh ba!
16 Kaichi i paleung ka-echi ly huni keung ai ateng iy, mai leng pawn bo;
kado theu nai mei hawi nichi ai khen iy, taphra pawn kyh ba!
17 Nangmy vawi takhra nai khumichi hawi
atho awm pa-rei nangmy palum nai khumichi ai amo hai kyh ba.
18 Kaichi ly nang teng i nai mana khala py, hi vui ai ny y;
kaichi i tlang heng ai nai pei baly, kaichi ly nang ai palo ai.
19 Ati cheaungkhang sa thai nai keung Areng Tameuh,
kaichi ai vawi ali teang ai nai pei kyh ly
nang teng i pahen naira kaichi teng y patei kyh ba;
hunaibaly kaichi ly atleu naira nga u ai.