SAM 76
Eaung nai Tameuhnote Hebrai cha lu Asaph i thui nai Sam, khulym.
1 Juda pri y ly Tameuh ai pany u bo;
Israela pri y mymy i amyn ly nang parai nai ne.
2 Mymy i yhm ly Jerusalem mary y awm;
mymy ly Zion mawi salo y awm nai ne.
3 Huni meingtym y mymy ly paleung ka-echi i thailiho,
khupui, haisau hawi tavai ateaung bawibawichi ai taphra pawn nai ne.
4 Aw Tameuh, nang ly sa thai naira haiho khri pa-rei len parai na ly!
Paleung ka-echi ai eaung nai meingtym, mawichi mang dengdairei,
nang vawi ali teang nai ly khri pa-rei tahm awm parai na a!
5 Paleung ka-echi i ham parai nai tavaimichi ly mychi teng y awm nai
vawnsai ateaungchi chau i, vai ly dei u pawn bo;
nichi i atho hawi kawp nai saichi py atyhtyh teu bo.
6 Aw Jakob i Tameuh, nangmy pajei pahyn nai khala y,
keaungngochi hawi keaungngo risachi ly atlym i dei u be bo.
7 Na i py aw Areng, nang ai khumi bawibawichi ly jei u nai ne;
Nang kado theu nai khala y
ami py nang i mo y angdo vam y nai ne.
8 Nang ly nangmy i tara chih nai sai ai
kani pri mang dengdairei thai hai bo.
9 Nang ly khaileaung pri y ana patang naira avum nai khumichi ai atleu ai nai ang thau iy,
tara chih pi nai khala, khaileaung ly jei hyn i, tyn kryh y na bo.
10 Khumichi i kado theu nai ly nang ai palo tleaung palora naira lawn hai ai;
tavai keung y dei y naimy heng rai naichi ly nang i pawi sa naichi typ u ai.
11 Nang i Areng Tameuh teng y adeu nai ly talam u;
tengpang sahawi y awm nai khumi cheaungkhangchi awi,
mymy teng y langseaungchi syn pi u.
12 Mymy ly paleung len, amlyh am-e nai samrang i cho chanauchi i
paleung panem vui iy, nang parai nai samrangchi ai jei hyn hai ai.