SAM 75
Tara chih nai keung Tameuhnote Hebrai cha lu Asaph i thui nai Sam.
1 Kaichi ly nang i pahen nai ai palo u bo;
aw Tameuh, kaichi ly nang i pahen nai ai palo u bo;
nang ly mana tanrei tahm asang na mo, nanai amthang hai iy,
nang i rengrang sa nai saichi ai py kathui pi u nai ne.
2 Tameuh my, “Kai ly tara chih ai nai neng khai rym bo;
kai ly leu meitang naimy tara chih ai.
3 Khaileaung hawi vanrei heng nai amjy
cheaungkhangchi ly anghyn teu i py,
kai ly khaileaung i sangum langdengchi ai khaw hai jo ai.
4 Kai ly hina nai leu kang pei; khumi hawi y naichi awi, amlyh u moh.
5 Amlyh am-e u moh,” napi.
6 Tara chih nai keung ly nisi mang, ti y baly nidym mang dengdairei py,
tosyh mang, ti y baly tokalawi mang dengdairei py, ang tym nai ny y leang.
7 Tara chih nai keung ly Tameuh ne;
mymy ly phyreichi ai kamngo pajeng iy, phyreichi ai law tleaung hai ai.
8 Areng ly kado theu naira napi nai
ma-hang nai kreip hang khau ly mymy i kiu y syn.
Huni kreip hang ai mymy lei nai khala, khumi hawi y naichi ly nei u bo;
nichi ly maidenreichy py by y na pa-rei nei u pyn nai ne.
9 Na i py kai ly Jakob i Tameuh satang ai, avawrei kathui ai;
mymy ai palo nai khulym kathui ai.
10 Mymy ly khumi hawi y naichi i sa thai naira panem pi vui ai;
na i py khumi kahawi i sa thai naira ai ly asang hai jojo ai.