SAM 55
Ka-ym by y nai ahawi i khai su naira avum nai khumi i chiu sa nainote Hebrai cha lu Davida i thui nai khulym leu.
1 Aw Tameuh, kai i chiu sa nai tangai pi kyh ba;
kai i hnei takeng nai khala y, meimai hi vui moh kyh ba!
2 Kai i hnei takeng nai tangai iy, pathang pi kyh ba;
kai ly paleung bi, paleung mawn naichi hawimy, atho khei na bo.
3 Paleung ka-echi i pajei nai molam y, kai ly jei hyn nai ne;
khumi hawi y naichi i ana nai molam y, kai ly paleung phra atho di bo.
Nichi ly kai ai ngari kamtang avum hai;
nichi ly kai i tlang tleaung y kado theu iy, niu ngai u y bo.
4 Kai i paleung ly jei hyn naimy awm;
deira ai khri pa-rei jei na bo.
5 Jei hyn nai hawi
khri pa-rei kaso theu nai awm bo.
6 Buhu kamta kai teng y pakhichi awm lawh teu i khyly,
kai ly kamlora akheang ai i, chymra meingtym hau ai.
7 Kai ly khri pa-rei palo nai meingtym mang y angkheang iy,
daichi ka-vymra y kaawm ai.
8 Kai ly chei kaliki iy, ali kamchai hawi
ali pui khu puichira i nai abyhra kahau ai.
9 Aw Areng, kai i paleung ka-echi ai athli piupa hai kyh ba!
Mary theung y khrukhra naira hawi, lawm naichi ai kai ly kaniu.
10 Huni khumichi ly mary ai vum kanithun katan u meuh bo;
mary theung y hawi y sa nai, khrukhra hai naichi hawi kawi na bo.
11 Meingtym tleirei y phra nairachi awm;
lamchira y ana pumpi naira, li-tapawp nairachi hawi kawi na bo.
12 Panui hai nai khumi ly kai i paleung ka-e ne lawh teu baly,
kakham pajau nai ne;
kai i molam y amlyh nai paleung ka-e ne lawh baly,
kai ly ni ai en vui pajau.
13 Na i py huna nai sa nai khumi ly kai i ahawi kamrawi,
kalop sa ahawi nai amrawi keh nai ahawi ne lawh ly!
14 Nang hawi kai ly adyh parai naimy, arum apang hawi bo;
Achura yhm y py, vanrei chiu sa ahawi nai ne.
15 Kai i paleung ka-echi ly dei kani tym y naimy dei u sy;
kangheng tang naimy tavau kho y chei u sy!
Nichi i yhmchi ly hawi y naira kawi nai meingtymchi ne;
nichi i paleung ly hawi y naira kawi na bo.
16 Kai ly Areng Tameuh teng y, kasabawmra nga ai nai chiu kasa bo;
mymy ly kai ai atleu ai.
17 Kai i tangam nai raawichi ly khawn, kanithun, vum,
huni nengchi khala mymy teng y tym i,
mymy ly ang tangai pi ai.
18 Hina tanrei nawi parai nai paleung ka-echi hawi
atiu nai tavai keung i dengdairei,
kai ai chymme naimy vawi hai ali teang ai.
19 Jangni jangkhawn i dengdairei, khumi angso bawibawichi ai
peang nai keung Tameuh ly kai i chiu sa nai thai iy,
paleung ka-echi ai sum hai ai.
Ati mana nai mo nabaly nichi ly paleung amtlau u y;
mymy ai py jei u y nai deaungkho y ne.
20 Kai i ahawi kangngym ly my i ahawichi ai tiu iy,
my i adeu nai py taphra bo.
21 Ni i leuchi ly thobai tleaung y panai iy,
ni i paleung theung y ly niu ngai y reng nai ka-dawnchi awm;
ni i leuchi ly asitui kamta panai i py,
chiu parai nai haisau kamta, tamokalem nga hai reng nai ne.
22 Nang i myn kaji ai ly Areng teng y au;
mymy ly nang ai ama hai iy ang kry ai;
khumi kahawichi ai mana khala py, sum hai ai ny y.
23 Na i py aw Tameuh, nang ly khumi ai padei nai keungchi hawi,
tapawp nai keungchi ai, nichi i deung ka-hyhrei tym y rai khala my
tapreaung angawm theung y ang vum hai ai;
kai naini ly nang ai kang-ym ai.