SAM 52
Tameuh i tara chih nai hawi pahen nainote Hebrai cha lu Davida i thui nai khulym leu, Ahimelek i yhm y Davida tym, nanai Edom cheng Doka my Sawla teng y amti chum khala, Davida i thui nai ne.
1 Sathai naira haiho awm nai khumi awi, ati mana nai amy i hawi y nai amlyh lawh mo?
Tameuh i ka-ym awm nai ly deungtasarei ne.
2 Nang ly khumi takhra phra ai nai molam dawn tau reng;
nang i palai ly sam vau acho kamta chiu parai.
Nang ly teng y nai leuchi ai, avawrei phym atyhtyh nai ne.
3 Nang ly kahawi tleaung y hawi y nai ai py,
leu meitang tleaung y leu ka-chawi ai py nang keh bo.
4 Tapawp nai khumi awi, nang ly nangmy i labeaung mang
khumichi no-ei pa-rei thui ai nai ngai keh lawh ly!
5 Hunai deaungkho y Tameuh ly nang ai deungrei, atlym hai jojo ai;
mymy ly nang ai yhm i dengdairei ryh iy, ang patheu vui ai;
nang ai ly heng nai khumichi awm nai khaileaung pri i dengdairei, ang patheu vui ai.
6 Khumi kahawichi hini leusaichi niu baly jei u ai;
nichi ly nang ai khen iy panui ai i,
7 “Amy i chymme ai nai i vui y Tameuh ai ym ai nai tleaung y ly
amy i nang chawn naira ai a-ym nai khumi ai khen u;
ni ly my i hawi y naira molam y, amy i chymme naira hau nai khumi ne,” nanai thui u ai.
8 Na i py kai ly Tameuh i yhm sahawi y prau nai olive keung hawi atawm nai ne;
kai ly nang i khaw parai nai tamen naira ai deungtasarei ym bo.
9 Aw Tameuh, nang i sa nai leaungsaichi molam y,
kai ly kawn naimy palo jojo ai;
nang i hawi nai satang, nang i khumichi mo y amthang hai ai.