SAM 31
Tameuh ai ym naimy chiu sa nainote Hebrai cha lu: Davida i thui nai Sam.
1 Aw Areng, kai ly nang teng y abyh ai nai ahihawi bo.
Kai ai mana khala py sum hai moh kyh ba.
Nang ly leu meitang adyh adawi nai Tameuh ne.
Kai ai atleu kyh ba; kai ly kang hnei kang takeng nai ne!
2 Kai i hnei takeng nai tangai pi kyh ba! vaimy kai ai atleu kyh ba!
Kai ai ama hai ai nai, kai i abyhra lengseaung ne.
Ang sabawm ai nai kai i lengseaung yhm ne.
3 Nang ly kai i lengseaung hawi lengseaung yhm ne.
Ka-deu awm nai kamta, kai ai lam patei kyh ba.
4 Kai i vui pateung yb nai deaungra i nai lawi hai kyh ba,
Nang ly kai i abyhra ne.
5 Kai ly kaimy ai nang i kiu y kang-au bo.Ref 31.5: Lk 23.46
Aw Areng, nang ly kai ai atleu ai;
nang ly ka-ym awm nai Tameuh ne.
6 Nang ly teng y nai tameuhchi ai chiu nai khumichi ai ly niu ngai y;
Na i py kai ly nang ai kang ym nai ne.
7 Nang i khaw parai nai tamen nai saho y,
kai ly amo theu ai.
Nang ly kai i patang nai niu.
Kai i kamtang pany pi bo.
8 Nang ly kai ai paleung ka-echi kiu theung y tym hai y naimy,
kaimy ngaingai chei pajau ai nai pei bo.
9 Kai ly patang naira avum nai deaungkho y,
aw Areng, kai ai pahen kyh ba.
Kai ly khri pa-rei kavo nai deaungkho y,
kai i mei ly pachau na bo.
Kai i hiuchi malawn py raw be bo.
10 Kai ly paleung si tangam nai deaungkho y, paha na bo.
Kavo nai deaungkho y kai i heng nai deung py dawi ai bo.
Kai ly kaimy i avum nai ngari kamtang deaungkho y, atho bai na bo.
Kai i hiuchi malawn py raw be bo.
11 Paleung ka-e bawibawichi ly kai ai panui hai.
Yhm deaungpa my mei aniu y nai ang sa u kehkeh bo.
Kai hawi apany nai ahawichi ly kai ai jei u nai ne.
Kai hawi lam y avum nai khala y, angpreng u pawn bo.
12 Kai dei veng nai kamta, khumi bawibawichi ly kai ai tami u pawn bo.
Kai ly aphi su nai laawm ka-kawi kamta lawm bo.
13 Paleung ka-echi i kamsyh y
arum nai leu kai ly thai bo.
Kai i sahawi y ka-jei hawi parai naichi kawi na.
Paleung ka-echi ly kai ai padei ai nai tau u bo.
14 Na i py aw Areng, kai ly nang ai kang ym;
Nang ly kai i Tameuh ne.
15 Kai i neng kanichi ly nang i kiu tleaung y awm;
kai ai paleung ka-echi hawi
ana pumpi nai khumichi kiu i nai atleu kyh ba.
16 Nang i miseaung kai ai pahen nai paleung hawi khen ba.
Nang i khaw parai nai tamen naira hawi vanrei, kai ai atleu kyh ba.
17 Aw Areng, kai ly nang teng y chiu sa hnei takeng nai ne.
Kai ai kangji ngo hai moh kyh ba.
Khumi hawi y naichi ly kangji kangai ngo u sy.
Nichi ly tavau pri y syhp, ti u sy.
18 Paleung len amlyh naimy
khumi kahawichi ai thui preaung reng nai
khumi katapawpchi i labeaung ai tamyh vui ba.
19 Nang ai jei naimy tahm khai nai khumichi i vui pateung pi yb nai
hawi nairachi ly khri pa-rei lyh ai hawi parai na ly!
Nang ly hawi, nanai py, nang teng y abyh nai khumichi ai
ama hai, nanai py, khumi bawibawichi my pany u bo.
20 Khumichi i dawn paviu naira i nai law tleaung hai ai nai nang teng y
abyh nai khumichi ai, nang ly nangmy teng y chymme naimy heu vui ba.
Paleung ka-echi i khumi aniu y nai sa naichira i nai
law tleaung hai ai nai nichi ai chymme nai meingtymra y heu me ba.
21 Areng ai ly palo u!
Kai ai taki naimy tiu u nai khala, nangmy patei pi nai
tamen naira ly khrikhri pa-rei lyh ai hawi parai na!
22 Nang ly kai ai nangmy mo i dengdairei patheu veng bo, nanai y
kai ly jei naimy paleung mawn parai nai ne.
Na i py nang teng y kasabawmra nga ai nai aeu nai khala,
nang ly kai i aeu nai raawi thai bo.
23 Mymy ai ka-ym awm nai khumi bawibawichi awi, Areng ai tamen u.
Ka-ym awm nai khumichi ai Areng ly ama hai bo.
Na i py paleung len amlyh nai khumichi ai ly amlau nai kamngo pajeng pi ai.
24 Areng ai ajeng nai khumi bawibawichi awi,
paleung khaw parai naira awm iy, vam nai paleung awm u.