SAM 29
Kamchai theung i Areng i raawinote Hebrai cha lu: Davida i thui nai Sam.
1 Aw kani pri chochi awi, Areng ai ly palo u.Ref 29.1-2: Sam 96.7-9
Mymy i nang parai nai hawi sa thai naira ai palo u.
2 Nang parai nai hawi angym nai Areng amyn palo u.
Chai parai nai keung ang jeu nai khala y,
3 Areng i raawi ly panglichi salo y amsau bo.
Nang parai nai hawi angym nai Tameuh ly kani pajyh hai.
Mymy i raawi ly suida pangli salo y avah na bo.
4 Areng i raawi ly amsau bo.
Huni raawi ly sa thai naira hawi, nang parai naira kawi angym nai ne.
5 Areng i raawi molam y saitleang keungchi ly aheang be bo.
Lebanon daichira i saitleang keungchi malawn ly aheang be bo.
6 Mymy ly Lebanon mawichi ai, sichochi kamta ampyh hai.
Heramon mawi ai py si katai beaungjeaung kamta ampyh hai bo.
7 Areng i raawi ly amlosadi kamta angvang hai bo.
8 Mymy i raawi ly daichi ka-vym ai amchyh hai.
Mymy ly kadesa daichi ka-vym ai amchyh hai bo.
9 Areng i raawi ly ngopraibiu keungchi ai ahyn hai iy,
dengkeaung keungchira i ngam awm nai ngiereichi ai vui hai bo.
Tlenrei khyh my, “Tameuh ly nang parai nai awm sy!,” nanai
Achura yhm theung y khumi bawibawichi aeu u bo.
10 Areng ly tui thiu parai nairachi ai peang.
Mymy ly deungtasa peang nai samrang ne.
11 Areng ly mymy i khumichi teng y sa thai naira pei;
nichi teng y tlamsa nai amtheaung naira pei pi bo.