SAM 28
Sabawm pi ai nai chiu sa nainote Hebrai cha lu: Davida i thui nai.
1 Kai i abyhra aw Areng, kai ly nang teng y kaau bo.
Pathang pi kyh ba!
Nangmy pathang pi y baly
kai ly tavau kho y chei ai nai tla ai.
2 Nang i Achura yhm kachai mang y kiu pheu iy,
“Sabawm kyh ba,” nanai kai aeu nai khala, tangai pi kyh ba.
3 Hawi y sa nai khumi kamngochi hawi vanrei,
kai ai pajeng moh kyh ba.
Nichi ly leu tui teu i py,
niu ngai y nai paleung awm u nai ne.
4 Nichi i sa nai saichi hawi, sa tamang nai kamngochi molam y,Ref 28.4: Amt 22.12
nichi ai kamngo vang pei pi ba.
Nichi i kamngo nai saichi molam y pajeng kyh ba.
Mychi i kamngo hawi ataing nai kamngo vang pajeng kyh ba.
5 Nichi ly Areng i sa nai leaungsaichi ai py,
mymy i atiti sa nai saichi ai py, tahm khai u y.
Hunai deaungkho y mymy ly nichi ai
kamngo vang pajeng iy, deungtasarei tama hai ai.
6 Areng ai ly palo u;
kasabawmra nga ai nai kai i aeu nai, mymy i kano patheung pi bo.
7 Areng ly kai ai ama hai iy ang kry.
Kai ly mymy ai ym bo.
Mymy ly kai ai sabawm nai deaungkho y,
kai ly amo theu naimy palo nai khulym thui nai ne.
8 Areng ly mymy i khumichi ai ama hai iy kry bo.
Mymy khai takhra pi nai samrang ai ama hai iy atleu nai ne.
9 Aw Areng, nang i khumichi ai atleu kyh ba.
Nangmy peang nai khumichi ai amtheaungra pei kyh ba.
Nichi ai beram typ keung kamta,
kry jojo kyh ba.