SAM 135
Palo nai khulym
Areng i miseaung, Areng i yhm napi nai
2 achi i Tameuh i Achura yhm theung y angdo nai khumichi awi,
mymy i amyn palo u.
3 Areng ly hawi nai deaungkho y mymy ai palo u;
mymy ly pahen nai deaungkho y, mymy i amyn palo nai khulym thui u.
4 Mymy ly Jakob ai mymy i vui hawi Israela chengchi ai,
mymy i peang nai lawn ai nai py vawi takhra bo.
5 Achi i Areng ly nang parai, nanai kai ly pany;
mymy ly tameuhchi bawibawi tleaung y py, nang parai keh nai ne.
6 Mymy ly kani hawi khaileaung tleaung y py,
pangli hawi pangli thiu parai nai theung y py,
mymy i ngai nai kamta, ati cheaungkhangchi ai sa nai ne.
7 Mymy ly khaileaung katem mang dengdairei khupanymchi sau hai i,
alipui khupui aho ai nai i vui y, amlosadichi sa pi nai ne;
ali ai py mymy i yhm theung i nai patheu bo.
8 Aikupta pri y awm nai khumichi i chapo chalu ngiereichi hawi,
tawnbawichi i cho chalu ngiereichi ai padei pi pawn bo.
9 Huni pri y awm nai samrang Pharao hawi,
ni i miteaung keh bawibawichi ai pajeng ai nai molam y,
mymy ly rengrang ka-ma-rachi hawi, lyh ai hawi naichi sa pi nai ne.
10 Mymy ly pri neangneangchi ai phra hai iy,
sa thai naira awm nai samrangchi ai padei pawm bo.
11 Amori samrang Sihon,
Bashan samrang Oka hawi,
Kanan pri i samrang bawibawichi ai padei pawn nai ne.
12 Mymy ly nichi i pri ai mymy i khumichi teng y pei pi;
huni prichi ai Israela chengchi teng y pei pi nai ne.
13 Aw Areng, nang ly Tameuh ne, nanai khumichi ly avawrei thai u ai;
nang i amyn ly deung kangthau khrairei amthang jojo ai.
14 Areng ly mymy i khumichi ai ama hai ai;
mymy i miseaungchi ai pahen ai.
15 Khumi cheng cheaungkhangchi i chiu nai mynchi ly muku tangka hawi sa naichi ne; Ref 135.15-18: Sam 115.4-8; Amt 9.20
hunichi ly khumi i kiu hawi sa naichi ne.
16 Huni mynchi ly labeaung awm i py, leu katheu thai y;
meichi awm i py niu pajau y.
17 Nichi ly kanochi awm i py thai y;
taho py taho thai y leang.
18 Mynchi ai sa naichi hawi huni mynchi ai ym nai khumi bawibawichi ly
mychi i sa nai mynchi kamta lawn u na sy!
19 Aw Israela chengchi awi, Areng ai ly palo u;
Tameuh i pathyp pi nai keungchi awi, mymy ai ly palo u!
20 Levi theaungchi awi, Areng ai palo u;
mymy ai chiu nai khumi bawibawichi awi, mymy ai ly palo u!
21 Zion mawi salo y py, mymy awm nai
Jerusalem mary theung y py, mymy ai palo u.
Areng ai palo u!