SAM 13
Kasabawmra nga ai nai chiu sa nainote Hebrai cha lu: Davida i thui nai Sam.
1 Aw Areng, nang ly kai ai mana nai neng ryrei tami ai mo?
deungtasarei tami ai a?
Mana tanrei meimai hi pi vui ai mo?
2 Kai ly mana tanrei patang ai mo?
Kanithun py, vum py, mana tanrei paleung si, vo tangam ai mo?
Kai i paleung ka-echi ly mana tanrei, kai i tlang tleaung y pajau u ai mo?
3 Aw kai i Areng Tameuh, kaimy kang palau nai khala, khen iy pathang pi ba.
Kai ai atho angym hai aliteang kyh ba; kai ai dei hai moh kyh ba.
4 Kai i paleung ka-echi my, “Achi ly ni ai pajau bo,”
nanai thui ai nai pei moh kyh ba.
Nichi teng y kai i atlym nai molam y, amo theu ai nai pei moh kyh ba.
5 Kai ly nang i khaw parai nai tamen naira ai ym nai ne;
nang ly kai ai atleu nai ne i, kai ly amo theu ai.
6 Aw Areng, nang ly kai ai hawi hai nai deaungkho y,
kai ly nang teng y palo nai khulym thui ai.