SAM 119
Areng i Reita Leu
1 Areng i Reita leu ai sa patawm iy,
kamngo by y pa-rei heng nai khumi ly taham hawi.
2 Mymy i thui parip naichi ai sa patawm iy, leu pei naichi ai
paleung hawi verei tangai nai khumichi ly taham hawi.
3 Huni khumichi ly kamngo so u y naimy,
Areng i reita lam y tako u reng nai ne.
4 Aw Areng, nang ly nangmy i Reita leuchi ai kaichi teng y pei iy,
hunichi ai sai py takhawi y pa-rei, sa patawm ai nai leu pei bo.
5 Kai ly nang i leu pei naichi ai sau py takhawi y pa-rei,
sa patawm ai nai khri pa-rei ngai parai nai ne.
6 Kai ly nang i leu pei nai bawibawichi ai dawn ryh patyh lawh baly,
kangji kangai nga ai ny y.
7 Kai ly nang i leu meitang naimy tara chih naichi ai tangai iy,
chai parai nai paleung hawi nang ai palo ai.
8 Kai ly nang i reita leu pei naichi sa patawm ai;
kai ai mana khala py khai su moh ba.
Areng i reita leu tangai nai
9 Thawndeang deaungdichi ly chai pyn pa-rei mana heng pajau ai mo?
Nang i reita leu pei naichi tangai baly. chai parai naimy awm pajau nai ne.
10 Kai ly paleung hawi verei, nang i miseaung lawm ai nai atho sa ai;
kai ly nang i reita leu pei naichira i nai amphri vui moh sy.
11 Kai ly nang i tlang tleaung y kamngo so y ai nai,
kaimy i paleung theung y nang i reita leu ai kapateung me bo.
12 Aw Areng, kai ly nang ai kang palo bo;
kai ai nang i reita leuchi patiu pi kyh ba.
13 Kai ly nang i pei nai reita leu bawibawichi ai
tao pajeng parai naimy kathui ai.
14 Kai ly yhmtheaung katuichi tleaung y,
nang i leu pei naichi ai ngai keh.
15 Kai ly nang i reita leaungsaichi ai dawn pasym naimy,
nang i lam patei naichi ai dawn patyp jojo ai.
16 Kai ly nang i reita tanynchi ai ngai;
kai ly nang i leu pei naichi tami ai ny y.
Areng i Reita Leu ai sa patawm nai khumi ly taham hawi nai
17 Nang i miseaung kai ai hawi so pi kyh ba;
hunaibaly kai ly heng nai ryrei, nang i thui pi naichi tangai pajau ai.
18 Nang i reita theung i lyh ai hawi naichi
niu thai ai nai kai i mei angvang hai kyh ba.
19 Kai ly hini khaileaung pri y tanarei chy awm khyh nai ne;
nang i reita leu pei naichi ai, kai teng i nai heu pi veng moh kyh ba.
20 Kai ly nang i tara chih pi nai saichi ai neng tleirei,
paleung theung y kadeaung naimy awm bo.
21 Nang ly paleung len amlyh nai khumichi ai parip patyp nai ne;
nang i reita leu pei naichi tangai y nai khumichi ly taham si u bo.
22 Kai ly nang i reita leu pei naichi sa patawm nai ne i,
kai ai huni khumichi my mei aniu y nai hawi
tahm khai y naichira i nai lawi hai kyh ba.
23 Peang nai keungchi ly kai ai ka-awi sa ai nai arum u bo;
nang i miseaung kai ly nang i reita leaungsaichi dawn pasym ai.
24 Nang i thui parip nai saichi ly kai ai amo theu hai bo;
hunichi ly kai ai lam patei nai ne.
Areng i Reita leu tangai patyp nai
25 Kai ly sum i, spryhra y atlym nai deaungkho y,
nang i adeu nai kamta heng ai nai pei kyh ba.
26 Kai ly kaimy i sa nai kamngochi ahui teang bo i,
nang ly kai i takeng nai tangai pi kyh ba;
nang i reita lamchi kai ai patiu pi kyh ba.
27 Nang i reita leu pei naichi pany thai ai nai kai ai sabawm kyh ba;
kaichi ly nang i lyh ai hawi nai patiu pi naichinote 119:27 patiu pi nai; ti y baly Tameuh i kalop.dawn pasym ai.
28 Kai ly paleung si naira avum naimy awm bo;
nang i leu adeu nai kamta, kai ai atho pei kyh ba.
29 Kai ly lam tamang naira y tako y ai nai sabawm kyh ba;
nang i pahen naira molam y, kai ai reita leu pei naichi patiu kyh ba.
30 Kai ly nang i leu tangai ai nai dawn yb bo;
nang i sa pi nai reitachi ai py tangai patyp bo.
31 Aw Areng, kai ly nang i leu pei naichi tangai bo mang;
kai ai kangji ngo hai mo kyh ba.
32 Nang ly kai ai cheng naira am-eaung hai ra nai ne i,
kai ly leu pei naichi paleung ngai parai naimy tangai ai.
Cheng naira pany thai ai nai chiu sa nai
33 Aw Areng, kai ai nang i reita theung i, thui pachai nai pany ai nai patiu pi kyh ba;
kai ly hunichi avawrei tangai ai.
34 Nang i reita kai ai thui pi kyh ba; huni ai kai ly tangai ai;
paleung hawi verei atyp ai.
35 Kai ly nang i reita leu pei naichi tangai nai deaungkho y,
huni reita leu pei naichi atyp pajau ai nai sabawm kyh ba.
36 Yhmtheaung katui nang chawn ai ngai nai paleung ka-dawn tleaung y,
nang i reitachi tangai ai ngai nai paleung ka-dawn kai ai pei kyh ba.
37 Hawi y naichi tangai y ai nai kai ai amkyn hai ly
nang i adeu nai kamta, kai ai hawi so pi kyh ba.
38 Nang ai jei naimy tahm khai nai khumichi teng y
leu adeu naichi ly nang i miseaung kai ai pei kyh ba.
39 Kai i jei hyn nai khumi aniu y naichi teng i nai, kai ai atleu kyh ba;
nang i tara chih nai saichi ly lyh ai hawi parai na a!
40 Kai ly nang i reita leu pei naichi tangai ai nai khri pa-rei ngai;
nang ly leu meitang ne nai deaungkho y, kai ai heng ai nai pei kyh ba.
Areng i reita ai ym nai
41 Aw Areng, nang ly kai ai mana tanrei tamen mo, nanai patei ba;
nang i leu adeu nai kamta, kai ai atleu kyh ba.
42 Huna nai khala kai ai khumi aniu y naichi ai, vawitheung tha pajau ai;
ati mana nai mo nabaly kai ly nang i leu ai ym nai deaungkho y ne.
43 Kai ly nang i tara chih nai saichi ai ajeng nai ne i,
neng tleirei ka-ym awm nai leu thui pajau ai nai kai ai sabawm ba.
44 Kai ly nang i leu pei naichi tangai jojo ai;
deungtasa khrairei tangai ai.
45 Kaimy ngai ngai tlamsa naimy kaawm ai; ati mana nai mo nabaly
nang i leu pei naichi ai atho sa naimy tangai nai deaungkho y.
46 Kai ly nang i thui parip nai saichi ai, samrangchi i mo y pany hai ai;
kai ly kangji kangai nga ai ny y.
47 Kai ly nang i reitachi ai ngai parai nai deaungkho y,
hunichi tangai naira y amo theu naira awm nai ne.
48 Kai ly nang i reita leu pei naichi tahm khai bo;
kai ly nang i reita leaungsaichi ai adawn pasym ai.
Areng i reita ai ym tatang nai
49 Nang i miseaung kai teng y adeu nai ly pany pi jo kyh ba;
huni leu ka-deu ly kai ai athang khai naira pei nai ne.
50 Nang i adeu nai ly kai ai heng hai nai ne i, ngari kamtang
avum nai khala malawn py, kai ly paleung awmnem naira nga bo.
51 Paleung len amlyh nai khumichi ly kai ai avawrei panui hai teu i py,
kai ly nang i reita lam i nai hi vui y leang.
52 Jangni deung i nangmy pei nai tara chih nai saichi ai kapany jo;
aw Areng, hunichi ly kai ai paleung awm hai nem bo.
53 Khumi aso y naichi my nang i reita ai khai su nai niu nai khala y,
kai ly kado theu nai ne.
54 Kai ly hini khaileaung pri y kani tanarei chy heng nai thym khala,
nang i reita leaungsaichi ai khulym adi iy thui nai ne.
55 Aw Areng, vum y kai ly nang ai tami y naimy
nang i reita ai adawn pasym nai ne.
56 Nang i reitachi tangai nai ly
kai ai amo theu hai bo.
Areng i reita ai paleung apei nai
57 Aw Areng, kai ly nang ai naini kadeaung nai ne;
nang i reita leu pei naichi tangai ai nai adeu bo.
58 Nang i leu adeu nai kamta,
kai ai pahen ai nai paleung hawi tlang verei, kang takeng nai ne.
59 Kai ly kaimy i amhi amtlau nai dawn pasym teang bo;
nang i thui parip nai saichi kamta, katangai ai nai adeu nai ne.
60 Kai ly nang i reita leu pei naichi ai,
vaimy tangai praw ryp ai.
61 Khumi hawi y naichi ly kai i vui deaung pateung u;
na i py kai ly nang i reita leu pei naichi tami y ai.
62 Kai ly vum anenghyh y anglaw iy,
nang i meitang naimy tara chih nai saichi molam y, nang ai palo ai.
63 Kai ly nang i kalop sa pi nai khumi bawibawichi hawi,
reita leu tangai nai khumi bawibawichi i ahawi ne.
64 Aw Areng, khaileaung pri ly nang i khawi parai nai
tamen naira hawimy kawi angym bo;
kai ai nang i reita leu pei naichi patiu pi kyh ba.
Areng i reita leu vang teng nai
65 Aw Areng, nang ly ka-ym awm nai ne i,
nang i miseaung kai ai hawi hai ba.
66 Kai ly nang i reita leu pei naichi ym nai deaungkho y,
kai ai cheng naira hawi pany thai naira pei kyh ba.
67 Nang ly kai ai pajeng y rai khala kai ly lam tamang lawh teu i py,
vai ly nang i leu tangai bo mang.
68 Nang ly khri pa-rei hawi iy pahen na ly!
kai ai reita leaungsai patiu pi kyh ba.
69 Paleung len amlyh nai khumichi ly kai i satang ka-chawi naimy thui u bo;
kai ly reitachi ai paleung hawi verei tangai nai ne.
70 Huni khumichi ly pany thai naichi ny y;
na i py kai ly nang i reitara y amo theu bo.
71 Pajeng naira avum nai ly kai i vui hawi khyp; ati mana nai mo nabaly
huna nai avum nai molam y kai ly reita leaungsaichi ai pany thai nai ne.
72 Nang i pei nai reita leuchi ly kai i vui khaileaung pri i
muku tangka bawibawi tleaung y vang teng keh nai ne.
Areng i reita leu ly adyh adawi nai
73 Nang ly kai ai sa iy chymme naimy khai bo;
nang i reita leuchi pany thai ai nai, kai ai cheng naira pei kyh ba.
74 Kai ly nang i adeu nai leu ym nai deaungkho y,
nang ai jei naimy tahm khai nai khumichi ly kai ai niu iy amo theu u ai.
75 Aw Areng, nang i tara chih nai saichi ly adyh adawi nai ne, nanai py,
meitang khyp naimy kai ai pajeng, nanai py kai ly pany bo.
76 Nang i adeu nai kamta nang i khaw parai nai tamen naira ly
nang i miseaung kai ai paleung awmnemra pei sy.
77 Kai ly nang i reita leu ai paleung apei nai ne i, kai ai pahen kyh ba;
hunaibaly kai ly heng ai.
78 Paleung len amlyh nai khumichi ly
kai ai ka-chawi naimy seu u nai molam y kangji ngo u sy;
kai i vui ly nang i patiu pi naichi adawn pasym ai.
79 Nang ai jei naimy tahm khai nai khumi, nang i thui parip nai saichi
pany nai khumichi ly kai teng y jeu u sy.
80 Kai ly nang i reita leu pei naichi ai sai py takhawi y naimy
tangai nai deaungkho y, sum naira hawi kangji kangai ngo hai mo kyh ba.
Atleura nga ai nai chiu sa nai
81 Aw Areng, kai ly nangmy atleu ai, nanai ajeng i atho khei be bo;
kai ly nang i leu ai ym nai ne.
82 “Kai ai mana khala sabawm ai mo?,” nanai kang deng nai khala y,
nang i adeu nai ai ajeng nai ly kai i meichi khohai na bo.
83 Kai ly aphi su nai mawi peih adym kamta, teaung ai nai ngo y bo;
na i py nang i leu pei naichi tami y leang.
84 Kai ly mana tanrei neng ajeng ai mo?
kai ai ana nai khumichi ai, mana khala pajeng ai mo?
85 Nang i reita leu tangai y nai paleung len amlyh nai khumichi ly
kai ai patiu ai nai angawmchi tai u nai ne.
86 Reita leu pei nai ngiereichi ly ym ai nai hawi parai;
khumichi ly ka-chawi thui naimy kai ai ana u bo, kai ai sabawm kyh ba!
87 Nichi i kai ai padei ai nai atho sa nai ly eaung vi na bo;
na i py kai ly nang i leu pei naichi ai dawn y naimy awm y leang.
88 Kai ly nang i reita leu pei naichi ai tangai pajau ai nai,
nang i khaw parai nai tamen naira deaungkho y kai ai pahen kyh ba.
Areng i reita leu ai ym nai
89 Aw Areng, nang i reita leu ly
kani pri mang y deungtasarei awm jo nai ne.
90 Nang i ka-ym awm nai py deungtasarei awm jojo;
khaileaung pri ly nangmy meingtym sa pi nai kamta awm bo.
91 Ati cheaungkhangchi ly nang i miseaungchi ne nai deaungkho y,
nang i leu pei nai kamta, vaini khrairei awm jo nai ne.
92 Nang i reita leu ly kai i vui amo theu naira lawm y lawh baly,
kai ly kaimy i avum nai ngari kamtang molam y dei ai nai ne.
93 Nang ly reita leuchi saho y kai ai heng hai nai deaungkho y,
kai ly hunichi ai mana khala py dawn y nai awm ai ny y.
94 Nang ly kai ai peang; hunai deaungkho y atleu kyh ba;
kai ly nang i reita leu ai atho sa naimy tangai bo.
95 Khumi hawi y naichi ly kai ai padei ai nai ajeng u teu i py,
kai ly reita leu pei naichi adawn pasym jojo ai.
96 Nang i reita leu ly kau parai;
na i py reita leu ny y baly ati sai py angym nai by y, nanai kai ly pany nai ne.
Areng i reita leu ai paleung apei nai
97 Kai ly nang i reita leu ai khri pa-rei paleung apei nai ne!
huni reita leu ai kai ly kani khengrei adawn pasym bo.
98 Nang i reita leu ly kai hawi vanrei awm jo nai ne;
huni reita leu saho y kai ly paleung ka-echi tleaung y cheng keh.
99 Kai ly nang i thui parip nai saichi ai adawn pasym jo nai deaungkho y,
kai i sara bawibawichi tleaung y pany nai ne.
100 Nang i reita leuchi tangai nai deaungkho y,
saneng len naichi tleaung y cheng naira awm keh.
101 Nang i thui nai leu kamta tangai nai ne i,
amhi amtlau nai sai hawi y nai bawibawichi khai su bo.
102 Kai ai thui parip nai keung ly nang ne nai deaungkho y,
kai ly nang i leu pei naichira i nai hi vui y leang.
103 Nang i thui parip nai saichi ly kai i palai kadeaung y khri pa-rei tui na;
khawi hang tleaung y malawn py tui nai ne.!
104 Kai ly reita leuchi theung i cheng naira nga nai deaungkho y,
amhi amtlau nai sai hawi y nai ngiereichi ai, kaniu ngai y bo.
Areng i reita leu kangvang
105 Nang i leu ly kai i kheu keung y maisi yhm ne i,
kai i tako nai lam y angvang hai bo.
106 Nang i meitang naimy tara chih naichi tangai ai, nanai
kai ly amy i vaineng abeu nai khaw hai ai.
107 Aw Areng, kai ly khri pa-rei patang naira avum bo;
nangmy i adeu nai kamta, kai ai heng ai nai pei kyh ba.
108 Aw Areng, kai i kawn nai leu thui naimy chiu sa nai ly kawn pi iy,
nang i leu pei naichi py kai ai patiu pi kyh ba.
109 Kai ly kani tleirei dei naira avum nai ne;
na i py nang i reita leu ai tami y leang.
110 Khumi aso y naichi ly kai i vui deaung pateung pi u bo;
na i py kai ly nang i reita leaungsaichi ai khai su y leang.
111 Nang i reita leuchi ly kai i vui deungtasarei ne i,
kai ai amo theu hai nai ne.
112 Kai ly dei pa-rei reita leuchi tangai ai nai
leu pacheang yb bo.
Areng i reita theung i nga nai chymme naira
113 Kai ly nang i tlang tleaung y paleung adi adiu awm naichi ai kaniu ngai y;
nang i reita leu ai ly paleung apei nai ne.
114 Nang ly kai i ama hai naira hawi abyhra ne;
kai ly nang i adeu nai leu ajeng naimy awm bo.
115 Nangchi kamngo sa nai khumichi awi, kai teng i nai theu u pawn;
kai ly kai i Tameuh my pei nai reitachi tangai ai.
116 Nangmy adeu nai kamta kai ai atho pei kyh ba; hunaibaly kai ly heng ai;
kai i athang khai naira phra hai moh kyh jemjem ba.
117 Tlamsa naira nga hai ai nai kai ai dawmkhawn pi kyh ba;
kai ly nang i reita leaungsaichi ai tangai jojo ai.
118 Nang ly reita leuchi tangai y nai khumi bawibawichi ai khai su bo;
huni khumichi i tapawp nai ka-dawnchi ly tyhtyh teu bo.
119 Nang i mo y khumi aso y nai bawibawichi ly anyn angso kamta ne;
hunai deaungkho y kai ly nang i thui parip naichi paleung apei nai ne.
120 Nang ai jei nai deaungkho y kai ly khuma phau na bo;
nang i tara chih nai saichi molam y kai ly jei na bo.
Areng i reita leu tangai nai
121 Kai ly kateng kataw kasa nai ne;
kai ai paleung ka-echi i kiu y khai su moh kyh ba!
122 Nang i miseaung ai sabawm ai, nanai adeu nai leu pei kyh ba.
paleung len am-e nai khumichi ai, kai ai ana ai nai pei moh ba.
123 Nang i sabawm ai nai hawi, atleu ai adeu nai
ajeng nai ly kai i mei khohai na bo.
124 Nang i khaw parai nai tamen naira ly kai ai sabawm iy,
reita leaungsaichi patiu pi kyh ba.
125 Kai ly nang i miseaung ne nai deaungkho y
patiu pi naichi pany thai ai nai, kai ai cheng naira pei kyh ba.
126 Aw Areng, khumichi ly nang i reita ai tangai u y nai deaungkho y,
nangmy pajeng ai nai neng tym nai ne.
127 Kai ly nang i reita leu pei naichi ai muku tleaung y py,
muku tangcheng tleaung y malawn py ngai keh nai ne.
128 Hunai deaungkho y kai ly nang i leu patiu pi nai ngiereichi ai tangai iy,
lam teng y nai ngiereichi ai niu ngai y bo.
Areng i reita leu patawm ai ngai nai paleung
129 Nang i thui parip nai saichi ly lyh ai nai hawi parai;
hunichi ai kai ly paleung hawi verei tangai nai ne.
130 Nang i leu ai thui pi pachai nai ly kangvang pei iy
cheng y naichi ai cheng naira nga hai bo.
131 Kai ly nang i leu pei naichi ai ngai nai kadeaung i,
akawm nai y labeaung anghau nai, tao jeng na bo.
132 Nang ai tamen nai khumichi ai pahen nai kamta,
kai ai khen iy pahen teang kyh ba.
133 Nang i adeu nai kamta, kai atlym y ai nai kry kyh ba;
kamngo my ly kai ai peang moh sy.
134 Kai ly nang i reita leaungsaichi tangai pajau ai nai
kai ai ana nai khumichi teng i nai atleu kyh ba.
135 Nang i kangvang ly kai i tlang tleaung y angvang hai iy,
kai ai reita leu pei naichi patiu pi kyh ba.
136 Khumichi ly nang i reita leu ai tangai u y nai deaungkho y,
kai i mei katuichi ly tavo tui kamta leaung na bo.
Areng i reita leu ly adyh adawi naira
137 Aw Areng, nang ly adyh adawi nai keung ne;
reita leuchi py adyh adawi nai ne.
138 Nang i pei nai reita leaungsaichi ly
khri pa-rei adyh adawi nai ne i, teng parai.
139 Kai i paleung ka-echi ly nang i leu ai tahm khai u y nai deaungkho y,
kai i kado theu nai ly mai kadeu kamta angveaung na bo.
140 Nang i adeu nai ly khri pa-rei ka-ym awm nai ne!
kai ly huni adeu nai leu ai paleung apei nai ne!
141 Kai ly tahm by y nai khumi ne i, ami my py khumi aniu y bo;
na i py reita leaungsaichi ai tami y leang.
142 Nang i neaung hawi nai ly deungtasarei ne;
nang i reita leu ly teng jojo.
143 Kai ly paleung bi, paleung mawn naira avum;
na i py reita leuchi my, kai ai amo theu naira ang pei bo.
144 Nang i thui parip naichi ly teng jojo;
kai ai cheng naira pei kyh ba; hunaibaly kai ly heng ai.
Law tleaung ai nai chiu sa nai
145 Kai ly paleung hawi verei chiu kasa bo;
aw Areng, kai ai pathang pi kyh ba; kai ly nang i leu pei naichi tangai ai!
146 Kai ly nang ai kang palau bo; kai ai atleu kyh ba;
kai ly nang i reita leu pei naichi tangai bo.
147 Kai ly sabawm naira nga ai nai kani si y rai khala, nang ai kang palau bo.
kai ly nang i adeu naichi ai kadeaung bo.
148 Kai ly nang i parip naichi dawn pasym ai nai,
vumtorei i y naimy aseaung jo nai ne.
149 Aw Areng, nang i tamen naira khaw parai nai deaungkho y,
kai i chiu sa nai tangai pi kyh ba;
pahen parai naimy kai i hengra tamo hai moh kyh!
150 Kai ai pahyp y naimy ana nai khumichi ly sa hawi y ang tym dudu bo;
nichi ly nang i reita leu mang y abang u y nai khumichi ne.
151 Na i py aw Areng, nang ly kai i sa hawi y awm bo;
nang i leu pei nai ngiereichi ly teng parai nai ne.
152 Kai ly deaungdi khala i dengdairei, nang i thui parip nai saichi ai kapany yb bo;
hunichi ai nang ly khaw hai jojo nai ne.
Sabawm ai nai takeng nai
153 Kai i patang nai saichi khen pi cham ly atleu kyh ba;
ati mana nai mo nabaly kai ly nang i reita leu dawn y naimy awm ai ny y.
154 Kai i molam y kai mang y awm hai iy, kai ai tlamsa naira pei kyh ba;
nangmy i adeu nai kamta kai ai atleu kyh ba.
155 Khumi aso y naichi ly nang i reita leu pei naichi tangai u y nai deaungkho y,
nang ly nichi ai atleu pi ai ny y.
156 Na i py aw Areng, nang i pahen naira ly len parai na i,
pahen parai naimy kai ai atleu kyh ba.
157 Kai ai ka-jo hau naichi hawi ana naichi ly nawi parai;
na i py kai ly reita leu pei naichi tangai ai nai phra vai y leang.
158 Kai ly leu atangai y nai khumichi ai niu nai khala y, khri pa-rei paso parai;
ati mana nai mo nabaly nichi ly nang i leu pei naichi so patawm u y nai ne.
159 Aw Areng, kai ly nang i reita leu pei naichi ai
mana tanrei paleung apei mo, nanai pany pi kyh ba.
nang i tamen nai ly takhra vai y nai deaungkho y, kai ai atleu kyh ba.
160 Nang i reita sangum ly leu meitang ne; nang i leu meitang naimy
tara chih nai bawibawi ly deungtasarei awm jo nai ne.
Areng i reita leu ai paleung apei nai
161 Sa thai naira awm nai khumichi ly kai ai atyhtyh naimy ana u bo;
na i py kai ly nang i reita leu ai tahm khai nai ne.
162 Nang i leu adeu naichi molam y , kai ly khri pa-rei amo theu;
ateaung alang neangneang niu nai khumi kamta, amo theu nai ne.
163 Kai ly ka-chawi thui nai ngiereichi ai niu ngai y i, kapaso;
na i py nang i reita leu ai paleung apei nai ne.
164 Kai ly nang i leu meitang naimy tara chih nai saichi molam y,
kanirei y tlen saryhrei, nang teng y kawn nai leu kathui bo.
165 Nang i reita leu pei nai ai paleung apei nai khumichi ly khri pa-rei
paleung awmnem naira nga u nai ne;
mani my py nichi ai atlym hai pajau y leang.
166 Aw Areng, kai ly nangmy atleu pi ai, nanai ajeng naimy
nang i reita leuchi tangai nai ne.
167 Kai ly nang i thui parip pi naichi tangai bo;
kai ly hunichi ai paleung apei nai ne.
168 Kai ly nang i leu pei naichi hawi reita leuchi tangai bo;
nang ly kai i sa nai ngiereichi ai niu nai ne.
Sabawmra nga ai nai chiu sa nai
169 Aw Areng, sabawmra nga ai nai kai i aeu nai raawi ly nang teng y tym sy!
Nangmy i adeu nai kamta, kai ai pany thai naira pei kyh ba.
170 Kai i chiu sa nai tangai pi iy,
nangmy i adeu nai kamta, kai ai atleu kyh ba.
171 Nang ly kai ai reita leu patiu pi nai deaungkho y,
kai ly nang ai kang palo jojo ai.
172 Nang i patiu pi naichi ly ka-dyh ka-dawi ne nai deaungkho y,
kai ly nang i pei nai leu ai khulym thui ai.
173 Kai ly leu pei naichi ai kry nai deaungkho y,
kai ai sabawm ai nai angveirym jo kyh ba.
174 Aw Areng, kai ly nang i atleu naira nga ai nai kadeaung jojo!
Nang i reita ly kai ai amo theu hai bo.
175 Nang ai palo pajau thai ai nai, kai ai heng ai nai pei kyh ba;
nang i patiu pi nai saichi ly kai ai sabawm sy.
176 Kai ly tama nai beram kamta lam tamang bo;
hunai deaungkho y jeu ly nang i miseaung kai ai hau kyh ba;
kai ly nang i reita leu pei naichi ai tami y leang.