SAM 115
Tameuh meitang ly harei khyh
1 Aw Areng, nang i khaw parai nai tamen naira hawi
ka-ym awm nai molam y, nang teng y naini nang parai naira awm khyh;
kaichi teng y nang parai naira by y.
2 “Nangchi i Tameuh ly ma y awm mo?,” nanai khumi cheng cheaungkhangchi ly
ati mana nai y kaichi teng y deng u lawh mo?
3 Kaichi i Tameuh ly kani pri mang y awm iy,
mymy i ngai nai kamta, ati cheaungkhangchi ai sa bo.
4 Nichi i tameuhchi ly muku, tangka hawiRef 115.4-8: Sam 135.15-18; Amt 9.20
khumi i kiu y sa nai tameuhchi ne.
5 Hunichi ly labeaungchi awm i py leu katheu thai y;
meichi awm i py niu pajau y.
6 Hunichi ly kanochi awm i py thai pajau y;
notareangchi awm i py mui thai y.
7 Hunichi ly kiu awm i py nam thai y;
kheuchi awm i py tako thai y;
hunichi ly raawi katyn sai py patheu thai y.
8 Huni mynchi ai sa nai khumichi hawi ym nai khumichi ly
mychi sa nai mynchi kamta lawm u sy.
9 Israela chengchi awi, Areng ai ym u.
Mymy ly nangchi ai sabawm iy ama hai nai ne.
10 Nangchi Tameuh i pathyp pi nai keungchi awi, Areng ai ym u.
Mymy ly nangchi ai sabawm iy ama hai nai ne.
11 Areng ai jei naimy tahm khai nai khumi bawibawichi awi, mymy ai ym u.
Mymy ly nangchi ai sabawm iy ama hai nai ne.
12 Areng ly achi ai pany jo iy amtheaung naira pei ai;
mymy ly Israela chengchi ai py,
Tameuh i pathyp pi nai keung bawibawichi ai py, amtheaung naira pei ai.
13 Mymy ly mymy ai jei naimy tahm khai nai khumi bawibawichi teng y,Ref 115.13: Amt 11.18, 19.5
kamawn, kanang khawi patleh y naimy amtheaung naira pei ai.
14 Areng ly nangchi hawi
nangchi i katu chanauchi teng y, cho chanauchi pei sy!
15 Kani hawi khaileaung sa nai keung Areng ly
nangchi ai amtheaung naira pei sy!
16 Kani khusang ai ly Areng leaungrei my peang khyh;
na i py khaileaung ai ly achi khumichi ai pei nai ne.
17 Dei chum naichi hawi, tavau kho y ang vum kathiu nai khumichi ly
Areng ai palo u y.
18 Na i py achi heng jo nai khumichi ly vai i dengdairei,
mymy ai kawn naimy palo u ai.
Areng ai palo u!