SAM 111
Areng ai palo nai
Kai ly Areng i khumichi achu nai theung y
mymy i pahen nai sai ai paleung hawi verei palo ai.
2 Areng i sa nai saichi ly lyh ai hawi parai na!
Huni sa nai saichi ai ngai nai khumi bawibawichi ly
hunichi pany ai nai hau u nai ne.
3 Mymy i sa nai leaungsai ngiereichi ly nang parai nai hawimy kawi na bo;
mymy i hawi naira ly deungtasarei ne.
4 Areng ly mymy i sa nai lyh ai hawi parai naichi ai, achi my tami y ai nai ang sa pi;
mymy ly pahen naira, tamen naira hawimy kawi angym bo.
5 Mymy ai tahm khai nai khumichi ai pacho panei nai ne;
mymy i Leu Maikawm ai mana khala py tami y ai.
6 Mymy ly khumi takhrachi i prichi ai, mymy i khumichi teng y
pei nai hawimy, mymy i sa thai naira patei pi ai.
7 Mymy i sa nai leaungsai bawibawichi ly ka-ym awm nai hawi, leu meitang py amlau nai ne;
mymy i Reita leu pei nai bawibawichi ly ym ai nai hawi parai.
8 Huni Reita leu pei naichi ly khaw jojo nai ne;
hunichi ai ly leu meitang naira py, hawi naira py, sa pi yb nai bo.
9 Mymy ly mymy i khumichi ai tlamsa naira pei chum baly,
nichi hawi deungtasarei Leu Maikawm asa bo.
Mymy ly kachai ne iy sa thai naira len parai na a!
10 Areng ai jei kaji thai nai ka-dawn ly cheng naira i pakeung sangum ne;Ref 111.10: Job 28.28; Lkch 1.7, 9.10
Reita leu patawm nai khumi bawibawichi teng y
meitang naimy leu pacheang pajau ai nai, mymy ly pei bo.
Mymy ai ly deungtasarei palo u jojo sy.