SAM 107
PHY PANGREI
Tameuh i hawi nai sai ai palo nai
1 “Areng ly hawi nai deaungkho y kawn naimy palo u;Ref 107.1: 1 Neng 16.34; 2 Neng 5.13, 7.3; Eza 3.11; Sam 100.5, 106.1, 118.1, 136.1; Jer 33.11
mymy i tamen naira ly deungtasarei ne!,” nanai
2 paleung ka-echi kiu i nai Areng my atleu bo.
Nidym nisi, tosyh tokalawi y awm nai
3 pri takhra i dengdairei palau teang naira
avum nai khumichi ly palo u sy.
4 Khumi phyreichi ly lam by y iy khutaha daichi ka-vym y amki u;
nichi ly mychi awm ai nai marychi mang y tako nai lam niu u y.
5 Nichi ly kajeu kanglam, tui kanghai avum naimy
paleung phra, atho di u bo.
6 Nichi ly patang naira avum u nai deaungkho y Areng ai palau u i,
mymy ly nichi ai patang naira i nai atleu bo.
7 Mymy ly nichi awm ai nai mary mang y
lam kataw mang pahawi bo.
8 Nichi ly Areng i tamen naira khaw parai nai molam y py,
mychi ai sa pi nai lyh ai awm naichi molam y py,
kawn nai leu thui naimy palo u ai.
9 Mymy ly tui ahai naichi ai tui kanghai dam hai;
kajeu alam naichi ai, ati mo hawi parai naichi hawi kajeu kawi hai bo.
10 Phyrei khumichi ly kaveng my khiu nai theung y awm u i,
sengkry hawi pakheng nai y, patang naira avum u bo.
11 Ati mana nai mo nabaly Tameuh i leu pei nai tangai y iy,
ati cheaungkhang sa thai nai keung i leu pei naichi ai khai su nai deaungkho y ne.
12 Nichi ly akawm parai na pa-rei, kalop sa ai nai tla nai deaungkho y atho py khei be bo;
atlym teu i py, nichi ai pathau teang ai nai khumi leaungrei py by y.
13 Nichi ly patang naira avum u nai deaungkho y, Areng ai palau u i,
mymy ly nichi ai patangra i nai atleu bo.
14 Mymy ly nichi ai kaveng my khiu nai theung i patheu iy,
nichi ai pakheng nai sengkrychi leu hai pawn bo.
15 Nichi ly Areng i khaw parai nai tamen nai saho py,
mychi ai sa pi nai lyh ai awm nairachi saho py, kawn naimy palo ai.
16 Mymy ly kheupaja katheuchi ai taphra pi pawn iy,
tamo atleangrachi ai py, tleu hai piupa pawn nai ne.
17 Phyrei khumichi ly mychi i kamngo molam y no patang u;
mymychi i sa tamang nai molam y, ngari kamtang avum u bo.
18 Nichi ly teicha teinei malawn py, niu ai ngai nai paleung by y na bo i,
deira pa-kho sahawi y tym u bo.
19 Huna nai khala y nichi ly patang naira tym u nai deaungkho y,
Areng ai palau u i, mymy ly nichi ai patangra i nai atleu pi bo.
20 Mymy ly leu pei iy nichi ai no hawi hai chum baly,
tapreaung angawm i nai atleu pi bo.
21 Nichi ly Areng i khaw parai nai tamen nai saho y py,
mychi ai sa pi nai lyh ai awm nairachi saho py, kawn naimy palo u ai.
22 Nichi ly kapathypra hawi mymy ai kawn naimy palo u ai;
amo theu naimy khulym thui u iy, mymy i sa nai saichi amteng hai ai.
23 Khumi phyreichi ly suida pangli theung y sampho so iy,
ka-sum ka-pai sa naimy, mychi i kajeu apakawi ai nai hau u bo.
24 Nichi ly Areng i sa nai saichi hawi,
pangli theung y sa nai lyh ai awm nai saichi niu u nai ne.
25 Mymy leu pei nai khala y ali kamchai theu i,
tui sampyhchi theu.
26 Samphochi ly ali theung y achaw kalau iy, tui theung y tla kathiu bo;
huna nai dei lam avum u nai deaungkho y, khumichi ly jei hyn naimy kaso theu u na bo.
27 Nichi ly ahm rah pavui naichi kamta, atlym u khikha na;
nichi i kawp nai saichi ly ati sai py ny y bo.
28 Huna nai khala y nichi ly patang naira avum u nai deaungkho y,
Areng ai palau u i, mymy ly nichi ai patangra i nai atleu pi nai ne.
29 Mymy ly ali kamchai ai anawn hai nai deaungkho y,
tui sampyhchi py rym ryb bo.
30 Huna nai ali anawn nai y, nichi ly amo theu u bo;
mymy ly nichi i ngai nai meingtym mang y, chymme naimy tym hai bo.
31 Nichi ly Areng i khaw parai nai tamen nai saho y py,
mychi i vui sa pi nai lyh ai awm nairachi saho y py, kawn naimy palo u ai.
32 Nichi ly nang i nang parai nai saichi ai, khumichi achu naira y amthang hai ai;
lu sa naichi i meetingra y mymy ai palo u ai.
33 Areng ly tavochi ai tui kang hai pawn bo;
tavo micheaungchi ai py tamym typ pawn nai ne.
34 Mymy ly khaileaung kahawi ai, teaung ai ngo y nai palawi khaileaung lawm hai bo;
ati mana nai mo nabaly hu y awm nai khumichi i hawi y nai molam y ne.
35 Mymy ly khutaha daichi ka-vymchi ai tui sampumchi lawm hai iy,
jengha nai meingtymchi ai py, tui leaung nai micheaung lawm hai bo.
36 Mymy ly huni meingtym y kajeu alam nai khumichi awm ai nai pei pi bo;
nichi py mymychi awm ai nai mary sa u nai ne.
37 Nichi ly li hlau sa u iy, kreip keungchi py ui u;
Nichi ly amti amjangchi neangneang pakym u bo.
38 Mymy ly mymy i khumichi ai amtheaung naira pei nai deaungkho y,
nichi ly cho chanauchi neangneang nga u;
mymy ly nichi i si kanghuchi ai py, peung ai nai kry pi bo.
39 Tameuh i khumichi ly ana pumpi nai hawi, ngari kamtangchi avum nai molam y,
sum naira hawimy kangji kangai nga u nai khala y,
40 mymy ly huna nai ana pumpi nai khumichi ai paso i,
lam by y nai daichi ka-vymra y amki hai ryry bo.
41 Na i py mymy ly khumi kamawnchi ai ngari kamtangra i nai atleu iy,
nichi i yhm dengtheungchi ai, beram kanghuchi kamta peung hai ai.
42 Khumi kahawichi ly huna nai niu i, amo theu u nai ne;
na i py khumi aso y nai bawibawichi ly labeaung amkyn me veng bo.
43 Khumi kachengchi ly huni atitichi ai, paleung theung y pateung me iy,
Areng i khaw parai nai tamen nai satang dawn u pasym sy.