SAM 105
Tameuh hawi mymy i khumi
(1 Neng 16:8-22)
1 Areng i pahen nai ai palo u; mymy i nang parai nai sai ai amthang hai u;
mymy i sa nai saichi ai khumi cheng cheaungkhangchi teng y thui pi u.
2 Areng i nang parai nai ai khulym thui iy palo u;
mymy i sa nai lyh ai hawi parai naichi thui pi u.
3 Mymy ly achi ai peang nai deaungkho y amo theu u;
mymy ai chiu nai bawibawichi awi, amo theu u.
4 Sabawm naira hnei ai nai Areng teng y ahihawi u;
mymy i mo y chiu so u jojo.
5-6 Mymy i miseaung Abraham i kangpreangchi awi,
mymy i vawi takhra nai Jakob i kangpreangchi awi,
nangchi ly Tameuh i patei nai rengrang ka-ma-rachi ai py,
mymy i khai pi nai tara chih nairachi ai py, pany u jo ba.
7 Areng ly achi i Tameuh ne;
mymy i leu pei nai ly khaileaung pri verei i vui ne.
8 Mymy ly mymy i Leu Maikawm ai deungtasa khaw hai ai;
mymy i adeu naichi ai deung kangthau tym pa-rei awm hai ai.
9 Abraham hawi asa nai Leu Maikawm hawi,Ref 105.9: AA 12.7, 17.8, 26.3
Isaka teng y adeu nai leu ai py, khaw hai ai.
10 “Kai ly nang ai kanan pri kang pei ai;
nang ly huni pri amtym ai,”nanai
11 Areng ly Jakob hawi Leu Maikawm sa nai ne.
Hini Leu Maikawm ly deungtasarei awm jo ai.
12 Tameuh i khumichi ly vuikanai di parai i,
kanan pri i angvynchi ne.
13 Nichi ly pri harei dengdai pri harei mang py,
meingtym harei dengdai meingtym harei mang py, amki u ai nai tla bo.
14 Na i py Tameuh ly nichi theung i leaungrei ai py, ana patang hai ai nai pei y;Ref 105.14-15: AA 20.3-7
nichi ai kry ai nai samrangchi ai leu pei nai ne.
15 Mymy ly “Kai i vawi takhra nai miseaungchi ai patang hai u moh;
kai i amochi ai kiu pajeung kadeaung hawi py teaung u moh, nanai
samrangchi ai leu pei bo.
16 Areng ly nichi i pri y teicha teinei takang hai nai deaungkho y,Ref 105.16: AA 41.53-57
teicha teinei avaw nai khala y,
17 miseaung y jo vui nai Josepha ai,Ref 105.17: AA 37.28, 45.5
nichi i mo y pato nai ne.
18 Josepha my thui yb nai kamta tym y rai khala y,Ref 105.18-19: Atiti 39.20—40.23
Josepha ly kheu y dengki thiu naira avum bo.
19 Ni i kaneaung y py sengkry hawi pakheng cheng bo.
Ni i molam y Areng i thui naichi ly angym nai ne.
20 Naibaly Aikupta samrang ly Josepha ai theaung i nai lawi hai;Ref 105.20: AA 41.14
khumi cheng cheaungkhangchi i samrang ly Josepha ai lawi hai bo.
21 Samrang ly ni teng y pri peang nai kalop au iy,Ref 105.21: AA 41.39-41
pri verei i samrang i bangtang kalenra y khai bo.
22 Ni ly samrang my khai nai miteaung kehchi ai leu pei pajau nai sa thai naira py,
samrang i bangtangchi ai leu pei pajau nai haiho py nga nai ne.
23 Naibaly Jakob ly Aikupta pri y tym i,Ref 105.23: AA 46.6, 47.11
huni pri y khuteng sa bo.
24 Areng ly mymy i khumichi ai cho chanau neangneang peung hai i,Ref 105.24-25: Theu 1.7-14
paleung ka-echi tleaung y malawn py atho awm hai bo.
25 Mymy ly Aikupta khumichi ai paleung amtlau hai nai deaungkho y
nichi ly mymy i khumichi ai niu ngai y i, tapawp u nai ne.
26 Naibaly mymy ly mymy i miseaung Mosi hawiRef 105.26: Theu 3.1—4.17
mymy vawi takhra nai Aron ai pato bo.
27 Nini ly Aikupta pri y Tameuh i lyh ai awm nai sa thai naira hawi
rengrang ka-ma-rachi patei pi nai ne.
28 Tameuh my pri verei y khuveng theu hai bo;Ref 105.28: Theu 10.21-23
na i py Aikupta khumichi ly mymy i leu pei nai tangai u y.
29 Mymy ly nichi i tavo tuichi ai thi lawm hai i,Ref 105.29: Theu 7.17-21
ngo awm nai ngiereichi dei hai be bo.
30 Samrang i yhm raurei,Ref 105.30: Theu 8.1-6
nichi i pri ly uiphochi kawi na bo.
31 Tameuh my leu pei i,Ref 105.31: Theu 8.16-17, 20-24
pathauchi hawi saimawmchi ly pri verei y tym miu bo.
32 Mymy ly huni pri y kanitui i jeng y,Ref 105.32-33: Theu 9.22-25
ji akawi tla hai iy amlosadichi theu hai bo.
33 Nichi i kreip keungchi hawi thaidu keungchi ai py taphra pawn iy,
pri verei i dengkeaung keungchi ai tleu hai bo.
34 Mymy leu pei nai khala y Ref 105.34-35: Theu 10.12-15
kati pajau y na pa-rei akhutamachi tym iy,
35 huni pri y awm nai keung katheang ngiereichi ai cha krai iy,
thengthai bawibawichi cha be nai ne.
36 Mymy ly Aikupta pri yhm dengtheung bawibawira iRef 105.36: Theu12.29
chapo chaluchi ai padei chauchau bo.
37 Hunaibaly Israela chengchi ai patheu iy pahawi bo;Ref 105.37-38: Theu 12.33-36
nichi ly muku, tangkachi syn u;
nichi bawibawi ly tlumtlang atho awm nai khumichi ne.
38 Aikupta chengchi ly nichi ai jei nai deaungkho y,
nichi theu u nai khala y amo theu u bo.
39 Tameuh ly mymy i khumichi salo y tamai deng hai iy,Ref 105.39: Theu 13.21-22
vum y kangvang nga ai nai mai khai pi bo.
40 Nichi my hnei nai deaungkho y, mymy ly thengmynchi pato pi;Ref 105.40: Theu 16.2-15
nichi bym pa-rei cha ai nai kani mang dengdairei, teicha teinei pala pi bo.
41 Mymy ly lengseaung khawi nai khala, tui achawn hai i,Ref 105.41: Theu 17.1-7; Kati 20.2-13
khutaha daichi ka-vym y tavo kamta leaung bo.
42 Mymy ly mymy i miseaung Abraham teng y
adeu nai leu ai pany pi bo.
43 Hunai deaungkho y mymy ly mymy i khumichi ai pahawi nai ne;
nichi ly amo theu naimy khulym thui iy aeu u bo.
44 Mymy ly nichi teng y khumi takhrachi i prichi pei pi nai deaungkho y,Ref 105.44: Jos 11.16-23
nichi ly huni khumichi i li hlauchi nga nai ne.
45 Hina nai sa nai ly mymy i khumichi ly mymy pei nai Reitachi kry iy,
leu pei naichi tangai hai ai nai ne.
Areng ai palo u!