8
Cheng naira ai palo nai
1 Tangai cham! Cheng naira my ang palau. Ref 8.1-3: Leu kacheng 1.20-21
Pany thai nai cheng naira ly my i raawi khumichi thai ai nai aeu nai ne.
2 Lam sahawi mawi saleungchira py,
lam sangum lam kampreichira py, cheng naira ly angdo nai ne.
3 Mary theung y kun nai pa-kho ra y py,
mary apai pa-kho sahawi y py, angdo nai cheng naira my ly
4 “Khumi bawibawichi awi, nangchi teng y kang takeng;
khaileaung pri y awm nai khumi bawibawichi ai kang palau nai ne.
5 Nangchi ly cheng naira angym bo a?
Cheng naira angym pa-rei amtiu u.
Nangchi ly khumi ka-khumchi a? Cheng naira nga ai nai amtiu u.
6 Kai ly leu kahawi katheu ai; tangai u.
Kai i thui nai leu bawibawichi ly kateng ne.
7 Kai i katheu nai leu ly ka-ym awm nai leu ne.
Kai ly ka-chawi leu ai niu ngai y.
8 Kai i katheu nai leuchi ly ka-ym awm nai leuchi ne.
Teng y nai leu, li-tapawp nai leuchi abawi y.
9 Huni leuchi ly pany thai praw nai cheng naira awm nai khumi i vui ly pany chai pyn nai ne.
Lulip pany parai nai khumi i vui ly pany chang pyn pajau.
10 Tangka i jeng y kai i patiu pi nai ai vawi patyp ba.
Muku tangcheng i jeng y, pany thai nai cheng naira ai vawi patyp ba.
11 “Kai ly cheng naira ne i, amia lengseaungchi tleaung y py hawi keh nai ne.
Paleung ka-nora bawibawichi ly kai hawi pata pajau y leang.
12 Kai ly cheng naira ne; kai teng y pany thai praw nai cheng naira awm.
Kai ly cheng naira hawi meitang naimy, tara chih pajau nai py kawi angym nai ne.
13 Areng ai jei kaji naimy tahm khai nai ly hawi y naira ai amso ngai nai py ne.
Kai ly paleung len nai hawi amlyh nai,
hawi y nai lam y tako nai hawi ka-chawi thui nai leuchi ai niu ngai y nai ne.
14 Kai ly katauchi sa iy, amlum amcheang hai bo.
Kai ly pany thai nai cheng naira hawi, sorai paleung py kawi angym nai ne.
15 Kai ly samrangchi ai pri peang thai ai nai py,
peang nai keungchi ai peang nai reita kahawichi, khai pi yb ai nai py sabawm nai ne.
16 Samrang i chapo hawi bangtangchi dengdairei, khaileaung pri y awm nai samrang bawibawichi ly
kai i sabawm nai hawi peang u nai ne,
17 Kai ai tamen nai khumi ai, kai py tamen;
ami py ne sy, kai ai hau baly avum pajau.
18 Kai ly nangchi ai nang chawn ai nai hawi tahm awm ai nai py,
nang naira hawi eaung naira py pei bo.
19 Kai teng i nangchi nga nai amtheaung naira ly muku tangka tleaung y hawi keh.
tangka tangcheng tleaung y py hawi keh nai ne.
20 Kai ly khumi kahawi i lam napi nai,
leu meitang adyh adawi nai lam y tako bo.
21 Kai ai tamen nai khumichi i yhm y,
yhmtheaung katuichi kawi hai bo.
Nichi ai nang chawn naira kapei pi.
22 “Areng ly jangni jangkhawn khala my, kai ai sa manme nai ne.Ref 8.22: Amt 3.14
Kai ly mymy i sa angchei nai kuchi ne.
23 Kai ly khaileaung palum y rai khala my,
kangman keh y kai ai sa angchei nai ne.
24 Tavo micheaungchi by y rai khala,
panglichi so y rai khala, kai ai tapen.
25 Mawichi so y rai khala,
mawi aheungchi palum y rai khala,
26 Tameuh my khaileaung hawi li hlau meingtymchi,
angchei i spryh ai malawn py so y rai khala, kai ai tapen bo.
27 mymy ly kani khusang ai palum nai neng,
pangli y tako prei iy, khusang ai kadai nai neng khala kai awm nai ne.
28 Mymy ly kani mang y khupanymchi ai meingtym tasyh pi nai neng,
pangli tuino khochi paeaung nai neng khala py kai awm.
29 Mymy ly pangli tuichi py leu pei nai ryrei, tui tym khyh ai nai
leu pei nai neng y kai ly hu y awm.
Khaileaung i sangum langdeng panui nai neng khala py, kai ly awm yb nai ne.
30 Kai ly kupe kakawp leaungrei kamta, mymy sahawi y awm;
Kai ly mymy ai kani tleirei amo theu hai.
Kai ly mymy i mo y avawrei amo theu naimy,
31 khaileaung pri molam amo theu iy,
khumi bawibawichi hawi vanrei, paleung anyp naimy awm bo.
32 “Hunai deaungkho y deaungdichi awi, kai i leu tangai u.
Nangchi ly kaimy kang thui pi nai kamta, sa u baly taham hawi ai.
33 Kai i patiu pi naichi tangai u.
Tau kacheng awm u; kai i patiu pi naichi ai, athang khai y naimy naimy awm u moh.
34 Kai i leu tangai nai khumi,
kai i yhm katheu pa-kho y kani tleirei,
ajeng nai khumi ly taham hawi ai.
35 Kai ai hau iy niu nai khumi ly hengra py niu ai.
Areng ly huni khumi ai khrei ai.
36 Kai ai hau iy niu y nai khumi ly amymy ai no patang hai nai khumi ne.
Kai ai niu ngai y nai khumi ngiereichi ly dei areng ai khrei nai khumichi ne.