7
1 Deang awi, kai i thui nai leu pany jo ba. Kai i leu pei naichi ai mana khala py tami moh.
2 Kai i thui pi nai kamta so ba. Huna nai sa baly nang heng ai. Nang ly nangmy i meicho kangvai ai akry nai kamta, kai i parip naichi tangai ba.
3 Hunichi ai kiusabyh kamta amchiu ba. Nang i paleung pakawi ra y tajiu typ ba.
4 Cheng naira ai ly nangmy i tuicho kamta, pany thai praw nai cheng naira ai ly ahawi ka-dawi kamta palawn ba.
5 Hunichi my ly nang ai ami i ajuchi, labeaung palai hawi parawi reng nai neampachychi teng i nai py amkyn hai ai.
Neampachy kamleaung
6 Kanirei nai khala y kai ly kaimy i yhm thaibeng mang dengdairei, angam mang y khen angdeang nai thym khala,
7 pany nai sai angym y nai thawndeang deaungdi neangneangchi ai kaniu bo. Na i py hunichi theung y khumi ka-khum leaungrei ai khen patawm nai ne.
8-9 Ni ly kani dym mo y lam aleaung i, kani dym baly lam taki sahawi y awm nai neampachy leaungrei i yhm mo y tym bo.
10 Huni neampachy ly bimanu kamta ateaungchi amthyp; ni ly hawi y nai katau hawi, huni thawndeang deaungdi ai lamchung bo.
11 Neampachy ly vam parai iy, kangji by y nai khumi, lamchira y aleaung reng nai khumi ne.
12 Ti y i py ni ly tlen tlenrei lam takichira y mo, lamchira y mo, seng meingtymra y mo, ajeng jo reng nai ne.
13 Neampachy ly huni thawndeang deaungdi ai takawi naimy pachawm iy, meimai ai hawihai khen i,
14 “Vaini kai ly apathyp nairachi katalam chum bo i, kai teng y mawi anchi awm.
15 Hunai deaungkho y kai ly nang ai avum ai ngai nai molam y theu i, vai ly avum bo.
16 Kai ly kaimy i ira ai, Aikupta pri i an amjy cheaungkhang kanih mai ka-syn hawi bai yb bo.
17 Huni ira ly mura, kulataruchy hawi sinamon rimuichi mui amseaung yhyh nai ne.
18 Jeu ba; vumtorei akhrei ahawi sina; leaung leaungrei atakawi naimy amo theu hawi sina.
19 Kai i juvo ly yhm y by y; ni ly khuleaung kamlora y chei vui veng.
20 Ni ly tangka neangneang angpiu nai ne i, kani holai palyhrei khala ang vawi teang ai,” napi.
21 Huni neampachy ly my i li-parawi hyp nai hawi parawi nai deaungkho y, thawndeang deaungdi ly ni i kangai mang y abang vui bo.
22-23 Ni ly tleh ai nai pahawi jo nai si katai kamta, my i paleung pakawi y thailiho chyn chawm khyp pa-rei humra y ampyh iy,satla nai sisiu kamta, huni neampachy hawi abang praw ryp bo. Ni ly paleupyra y man nai tavo kamta atawm. Mymy i ka-jeira avum nai malawn py pany y.
24 Hunai deaungkho y deangchi awi, kai i leu tangai u. kaimy kang thui pi nai leuchi tangai u patyp.
25 Huna nai neampachy ai ly paleung apei u moh. Ni i nithun y abang u moh.
26 Ni ly neampacho neangneangchi ai taphra chum veng bo. Kati pajau y na pa-rei neampachochi ai dei hai chum bo.
27 Ni i yhm ly tapreaung mang y chei nai lam ne i, tavau saleaung chei nai katheu pa-kho py ne. Dei neng ny y naimy dei reng nai leaungsai ne.