23
Tariu i thui achih nai leu
1 Aly len nai miteaung keh leaungrei hawi ateh iy cha nei nai thym khala, huni khumi ly ami mo, nanai adawn patyp ba.
2 Nang ly biu ha parai nai ne lawh baly, amymy ai amkyn ba.
3 Nang ai sawn pi nai cha nei kahawichi ai paleung no moh. Huni khumi ly nang ai ang parawi hyp naimy, pacho panei nai ne lym ai.
Saryh i thui achih nai leu
4 Nang chawn ai nai molam atho sa naira y, amymy ai akawm hai ala y ai nai cheng naira awm ba.
5 Nang i paisa tangkachi ly pakhi sai iy, ahm i angkheang nai kamta, mei amsynrei sala y tama pajau nai ne.
Taja i thui achih nai leu
6 Nun-si nai khumi hawi vanrei, cho nei ahawi moh. Ni i sawn pi nai cha nei kahawi paleung no moh.
7 Huni khumi my, “Cho nei kyh rai ba " ang napi ai. Na i py ni ly cha ai nai , ngai hai kalei nai ny y leang. Ni i paleung y awm nai sai tatang patei nai ne.
8 Nang ly nangmy i cha nei chum nai teicha teinei paleu ali teang ai. Ni i tlang tleaung y nang i palo nai leuchi py, ati sai py ny y nai lawm ai.
Takaw i thui achih nai leu
9 Khumi ka-khum i mo y leu katheu moh; ni ly nang i cheng nai leu ai tahm khai ai ny y.
Horei i thui achih nai leu
10 Mana khala py khaileaung khujyh kangngym ly kasyh vui moh. Nurochochi i khaileaung ly lo pi veng moh.
11 Areng ly sa thai naira hawimy nichi ai ama hai ai i, mymy ly nang ai ka-awi sa iy, nichi mang y asa ai.
Holai harei i thui achih nai leu
12 Nang ai patiu nai sara i thui parip nai leu ai hawihai tangai iy, cheng naira ai ly ham parai naimy amtiu ba.
Holai nyhrei i thui achih nai leu
13 Deaungdi ai parip ai nai ly patyh moh. Pakhau nai ryrei y ni ly dei pajau y leang.
14 Meitang khyp thui ai nabaly, khyh pakhau naimy ly ni ai, dei areng kiu i nai atleu ai.
Holai thomrei i thui achih nai leu
15 Deang awi, nang ly cheng naira amtiu nai kawp baly, kai ly khri pa-rei amo theu ai.
16 Nang i katheu nai cheng nai leuchi thai nai khala, kai ly tahm khai amlyh ai.
Holai palyhrei i thui achih nai leu
17 Kamngo sa ala nai khumichi ai paleung no moh. Nangmy deungrei Areng ai jei kaji ba.
18 Huna nai sa baly nang i vui mo mang i deung ly hawi ai.
Holai pangrei i thui achih nai leu
19 Deang awi, tangai ba; cheng naira amtiu iy, nangmy i tako nai lam ai, hawihai palai adawn patyp ba.
20 Kreip hang nei ala nai khumichi, cha nei ha ala nai khumichi hawi amkawm moh.
21 Mhm-rah nei ala nai khumichi hawi cha ha ala nai khumichi ly kamawn kateu lawm u ai. Nang ly cha nai hawi, i nai hawi awm khyh lawh teu baly, kra y nai sala y kanih kamawnchi akhiu naimy awm ai.
Holai tariurei i thui achih nai leu
22 Ngampo i leu tangai ba; ngampo phai by y lawh teu i khyly, nang ly khumi amlawn y leang. Ngamhm miteaung cheang nai khala, ni i tlang tleaung y tahm khai nai sai amteng ba.
23 Ka-ym leu, cheng naira, thui parip nai leu, tau cheng naichi ai ly tangka hawi van iy amtiu ba. Hunichi ly vang teng parai nai ne i, paisa tangka hawi angtheung pajau y.
24 Khumi kahawi i ampo ly khri pa-rei amo theu ai nai leaungsai awm. Ni ly cheng nai chapo i vui y amlyh pajau.
25 Ngamhm ngampo ly nang i molam y amo theu amlyh sy; nang i amhm ly amo theu pajau na sy.
Holai saryhrei i thui achih nai leu
26 Deang awi, kai i leu dawn ryhpatyh iy tangai ba. Kai i heng nai kucha amtiu ba
27 Bimanuchi hawi neampachy kamleaungchi ly ka-jeira hawi parai nai deaung hawi atawm.
28 Nichi ly damrachi kamta, nang ai oh u reng nai ne. Neampacho neangneangchi ai, vaineng takan ai nai pa-rei sa u bo.
Holai tajarei i thui achih nai leu
29-30 Mhm-rah nei ala iy mhm-rah kangtha pateang cham y baly awm pajau y nai khumi ly avawrei ka-jo ka-thui ngai nai khumi, avawrei tangam nai khumi, paleung si paleung phra reng nai khumi ne. Ni i mei ly pasen iy ati sai py ny y naimy, tamo nga reng nai ne.
31 Kreip hang ly pasen jeaung naimy, angvang chei naimy, tuirym naimy awm teu i py, nei ai nai paleung ka-no awm moh.
32 Huni ai nei patyhm lawh baly, huni bo i khawn mang y ly pavui kangso my patiu nai kamta avum ai.
33 Nang ly jei hyn nai ka-ma-rachi ai paleung theung y niu huihai naimy, chai pyn pa-rei dawn pajau y, thui pachai thai ai ny y.
34 Nang ly pangli salo y tui sampyh my pachaw nai deaungkho y, anem vui, asang vui nai sampho alika kateang amkhaw naimy sampho pavui nai khumi hawi atawm.
35 Kai ly ang khyh ang pakhau, nanai athang khai teu i py, mana ang pakhau nai mo, nanai kai pany y. Kai ly ati mana nai y anglaw thai y lawh mo? Vai khaurei nei ai ngai bi rai,” nanai nang thui ai.