14
1 Neampachychi i cheng naira my ly yhm dengtheungchi ai khaw hai; na i py akhum naimy ly hunichi ai taphra reng nai ne.
2 Neaung hawi nai khumi ly Areng ai tahm khai nai khumi ne; neaung hawi y nai khumi ly mymy ai mei aniu y nai khumi ne.
3 Khumi ka-khum i paleung len nai ly leu khri pa-rei nawi hai parai; khumi kacheng ly my i leu hawimy, amymy ai ama hai ai.
4 Lithawn si by y nai khumi i chohpai ly akeurang ai; lithawn si awm nai khumi i chohpai ly choh hawimy kawi mang ai.
5 Ka-ym awm nai pany hai nai keung ly leu kateng katheu reng; na i py ka-ym by y nai pany hai nai keung ly leu ka-chawi naini katheu reng.
6 Paleung asang nai khumichi ly mana khala py, khumi kacheng lawm pajau y; na i py tau cheng nai khumichi ly rai y naimy amtiu thai nai ne.
7 Khumi ka-khumchi ai ly asyn u; nichi teng i cheng nai leu thai ai ny y.
8 Lulip pany nai khumi ly ati mana nai y khumi kacheng lawm mo? Ati mana nai mo nabaly ni ly mymy i sa ai avo nai sai pany nai deaung kho y ne. Cheng naira by y nai khumi ly ati mana nai y khumi ka-khum lawm mo? Ati mana nai mo nabaly ni ly mymy pany y pui naimy, pany ka-awi sa nai deaungkho y ne.
9 Khumi ka-khumchi ly kamngo sa ai nai jei y; na i py khumi kahawichi ly kamngo lawira nga ai nai kadeaung u reng.
10 Amo theu naira hawi paleung mawn nai ly keungko hawi naini abi khyh; hunichi ai takhra ami py amtym thai y.
11 Khumi kahawi i yhm ly khaw typ jo ai; khumi hawi y nai i yhm ly phra reng nai ne.
12 Lam kateng, nanai athang khai nai lam ly dei areng teng y pahawi nai lam ne pajau.
13 Amotheu panui nai ly paleung si nai ai khiu pajau teu i py, amo theu chum nai bo y paleung si nai ly awm aninau reng.Ref 14.12: Leu kacheng 16.25
14 Khumi hawi y naichi ly mymychi i nga ai ataing nai hawi y naira nga u ai; khumi kahawichi ly mymychi i hawi nai saho y, kawn vang nga u ai.
15 Khumi ka-khumchi ly ami i thui nai leuchi ai ym reng; tau cheng nai khumichi ly leu meitang teaung u reng nai ne.
16 Khumi kachengchi ly tau awm i, ka-jeira ai en vui reng; na i py khumi hawi y naichi ly dawndan y naimy sa tamangtang reng.
17 Paleung dawi nai khumichi ly ka-khum kalopchi sa reng; cheng nai khumichi ly paleung amkyn thai.
18 Tau cheng naira by y nai khumichi ly mymychi i ka-khum lai ka-taing nga u; na i py lulip pany nai khumichi ly cheng naira nga u reng.
19 Khumi hawi y naichi ly khumi kahawichi teng y, meimai nga ai nai lu meung iy, ahui kajeaung kaji ai nai tla.
20 Khumi kamawn ai ly my i saleaung deaungpa malawn py, amkawm ahawi ai nai ngai y; na i py khumi kanang teng y ly ahawi neangneang awm.
21 Khumi kamawnchi ai pahen reng nai khumi ly taham hawi; ami ai mei aniu y nai ly kamngo ne.
22 Pahen reng nai khumi ly amichi my ka-ym awm nai hawi, tahm khai nai avum ai; hawi y nai ai dawn tau reng nai khumi ly lam tamang nai khumi ne.
23 Kalopra y atho sa reng nai khumichi ly tlang apacho pajau ai nai i vui aleu ai; ateh iy leu peung ryry reng nai khumi ly kamawn acheang ai.
24 Khumi kachengchi ly yhmtheaung katuichi nga u reng; na i py khumi ka-khumchi ly ka-khum ka-lai naini sa u reng nai ne.
25 Teng nai leu katheu reng nai pany hai nai keung ly ami i tlang ai atleu nai khumi ne. Ka-chawi thui reng nai khumi ly khumichi i tlang tleaung y ka-ym by y nai ne.
26 Areng ai jei kaji naimy tahm khai nai ly my hawi, my i yhm dengtheungchi ai chymme naira hawi, ka-ymra nga hai pajau nai ai.
27 Deira i nai lawi ai nai ngai a? Areng ai jei kaji naimy tahm khai nai ly hengra tuino angawm ne.
28 Samrang i phum-ang ly mipui nawi nai i tlang tleaung y sangum tla; khumi mipui by y baly, ati ra py tym pajau y.
29 Paleung amkyn thai reng nai khumi ly kacheng ne; na i py paleung dawi nai khumi ly mymy i hawi y nai sai patei nai ne.
30 Paleung savairu pa-rei awm thai nai khumi ly mymy i tlang noso aho ai; takhosi nai ka-dawn awm reng nai khumi ly deino roka man nai khumi hawi atawm.
31 Khumi kamawnchi ai ana nai khumi ly nichi ai sa nai keung Tameuh ai mei aniu y nai ne; na i py khumi kamawnchi ai pahen reng nai khumi ly Tameuh ai chiu nai ne.
32 Khumi hawi y naichi ly hawi y nairachi sa nai molam y, mychi ai mychi naimy atlymra sa u nai ne. Na i py khumi kahawichi ly mychi i leu meitang saho y, mychi ai ama hai ai.
33 Tau cheng naira awm nai khumichi i paleung theung y cheng naira awm. Khumi ka-khumchi i paleung theung y ly cheng naira takang nai ne.
34 Leu meitang teaung nai ly pri ai sa thai naira len hai. Kamngo my ly pri ai tahm anem hai.
35 Samrang ly kalopra y kyhchaw nai miseaung ai ly khrei; na i py vang y nai khumi ai ly pajeng nai ne.