3
Hawi naira tatang
1 Kangkhym i naira y ly amjo amnauchi awi, Areng y kawn u. Nangchi teng y huni atiti tajiu anawi bi nai ly kai i vui palei ai awm nai ny y leang, nangchi i vui chawn lawh veng.
2 Uichi teng y ly amkym u, atiti kahawi so y naichi teng y ly amkym u, mymychi i ngan taphra naichi teng y py amkym u.
3 Achi, Tameuh i Phailo i saho y Tameuh ai chiu nai hawi Krista Isu ai amlyh nai, achi i tlang y ym naira den py by y naichi ly lengkhym takip naichi tatang ne lawh veng.
4 Ngai iy khyly kai py tlang y ym naira amtei pajau nai ne chy bo. Khumi takhra nanai ly tlang y ym naira amtei nai awm, nanai dawn baly, kai ly dawn nai tleaung y dawn ra nai ne:
5 kai ly kani tajarei kani y lengkhym takip nai py ne, Israela i kangpreang benjamin cheng i khumi py ne, Herbraichi theung y Herbrai y tapen nai py ne; Reita mang y ly Pharisai py ne;Ref 3.5: Ataw 23.6, 26.5; Rom 11.1
6 atho sa naira mang y ly palau takhra kamkawm ai ana nai keung py ne; Reita leu y hawi naira y ly cheh ai by y nai py ne.Ref 3.6: Ataw 8.3, 22.4, 26.9–11
7 Na i py kai i vui amran ai naira ngierei ly, hunichi ly Krista deaungkho y chau naira y kapalawn bo.
8 Ne khyp, kai i Areng, Krista Isu ai pany naira ly atiti bawibawi tleaung y hawi keh nai deaungkho y ati cheaungkhang py chau naira y kapalawn nai ne.
9 Krista ai kanga thai ai nai hawi, amy i hawi naira ly (huni ly Reita i hawi naira) by y naimy, Krista ai ym nai deaungkho y hawi naira ly (huni ly ym nai deaungkho y Tameuh teng i hawi naira) nga lawh iy, mymy y kaawm lawh thai ai nai hawi,
10 mymy i dei nai ka-tawm dei iy, mymy ai hawi mymy i angthau bi naira i atiti sa thai naira hawi, mymy i patang nairachi amtawm hai nai py kapany thai ai nai hawi,
11 kadeichi theung i dengdairei angthau bi naira ly kango tanga thai teu na mo, nanai py kai ly mymy deaungkho y atiti bawibawi kachau be i, hunichi ai ly sai py aly by y nai kadawn.
Katem y khrairei katapai tanga nai
12 Kanga chum veng bo kana nai ny y leang, angym chum veng bo, kana nai py ny y leang; na i py Krista Isu my ang patiu naira ai ly kango pajau lawh teu na mo, nanai kahui veangveang nai ne.
13 Amjo amnauchi awi, kanga bo nanai kadawn y leang. Na i py hini harei ly kasa reng: nithun mang i atiti awm naichi ai ly dawn y iy, mo mang i atiti awm naichi ai ly katapo tanga nai,
14 Krista Isu i saho y Tameuh i salo mang y ang palau nai kawn nai vang nga ai nai katem y tym pa-rei katapai tanga nai ne.
15 Hunaibaly cheang nai ngiereichi ly hunai kamta paleung takhra apu nai awm u sina; naibaly atira y py paleung takhra apu u nai ne baly, huni py Tameuh my ang pany hai ai mang.
16 Ati py ne sy, achi i tym nai ryrei nai huni kamta phai tako u sina.
17 Amjo amnauchi awi, nangchi ly kai i amtiu nai keung y lawn u, naibaly nangchi ly kaichi ai khen pata ai nai awm i, huni kamta tako naichi ai ly hawihai khen u.Ref 3.17: 1 Kor 4.16, 11.1
18 Ati mana nai mo nabaly khumi neangneangchi ly tako i,. hunichi ly Krista i kraws paleung ke-echi ne, nanai kaimy nichi i satang ly kang thui pi jojo chy bo, vai py vo nai tarawi y kang thui pi chy bo he;
19 hunichi i tem naira ly tama naira ne, mymychi i tameuh ly mymychi i kajeu ne, mymychi i tahm apasang naira py mymychi i amthang leaung naira ne, nichi ly khaileaung pri i atitichi ngai lawh.
20 Na i py achi i khuteng sa nai ly kani pri mang y ne; achi ly Paheng Keung, Areng Isu Krista ai ly hu i dengdairei satla ai nai ajeng jojo nai ne.
21 Mymy ly mymy i sa nai kamta sa iy, ati cheaungkhang ai py mymy ngaingai anui y khai pajau, achi i tahm anem nai thym kha i tlang ai ly mymy i nang parai nai tlang kamta awm ai nai sa palai bi ai.